Connect with us

تازه خبرونه

اسلامي امارت به هيڅکله پر اسلامي اصولو معاملې ته چمتو نه‌شي – مولوي عبدالکبير

خپور شوی

د

د افغانستان اسلامي امارت د ریاست الوزرا سیاسي مرستیال مولوي عبدالکبیر د شنبې پر ورځ (د چنګاښ ۳۱) په کابل پوهنتون کې د دیني او علمي سیمینار پر مهال، چې د شرعیاتو او اسلامي ثقافت د پوهنځيو له استادانو، د امارتي پوهنتونونو او د دعوت او ارشاد د امامانو او خطیبانو جوړ شوې و؛ څرګنده کړې، چې اسلامي امارت به هیڅکله د اسلامي امارت له اصولو سرغړونه ونه‌کړي.

مولوي عبدالکبیر په خپلو خبرو کې دا هم ویلي: اسلامي امارت له نړۍ سره د متقابل احترام په فضا کې د مثبت تعامل او ښو اړیکو غوښتونکی دی.

هغه زیاته کړې: هیڅکله به د اسلامي اصولو پر سر معاملې ته زړه ښه نه‌کړي او هیڅکله به د نورو د خوښۍ په خاطر له اسلامي اصولو تېر نه‌شي.

 په دې سيمينار کې مولوي عبدالکبير ويلي، چې په افغانستان کې اسلام د ډېرو سرښندنو او قربانیو په پايله کې راغلى او پر سرښندنو او قربانیو به يې ساتنه کېږي.

هغه زیاته کړې؛ د تېرو شل کلونو په جهاد کې د هېواد خلکو، د پوهنتون استادانو، محصلینو او عالمانو ونډه اخیستې او اسلامي امارت دوی د جهاد او اسلامي نظام په ټینګښت کې شریک ګڼي.

مولوي عبدالکبير دا هم ويلي: د اسلامي نظام ساتنه او پياوړتيا د هر چا ګډه دنده او مسوولیت دی.

د رياست الوزرا سياسي مرستيال په ډاګه کړې، چې د افغانستان اسلامي امارت د ټولو ديني او عصري علومو د پراختيا او پياوړتيا لپاره هلې ځلې کوي؛ ټول علوم ضروري ګڼي او په يوه سترګه ورته ګوري، خو په دې دوه لسيزو کې ديني علومو ته هيڅ پاملرنه نه‌ده شوې. همدا علت دی، چې د ديني علومو دا تشه باید ډکه او ډېره پاملرنه ورته وشي.

هغه د سیمینار ګډونوالو ته وویل: دا ثابته شوې؛ هغو، چې دیني او عصرې زده‌کړې درلودې د دین او هېواد لپاره خدمت کوي او کړی دی.

هغه زیاته کړې؛ مونږ هغه داکتران او انجنیران غواړو، چې پر تخصص سربېره د اسلام اساسي او اړین تعلیمات هم ولري.

نوموړي په دې ناسته کې استادانو ته وویل: تاسې باید خپلو محصلینو ته څرګنده کړئ، چې مونږ د اسلامي نظام د ټینګښت او پیاوړتیا ترڅنګ په سیاسي او اقتصادي ډګرونو کې د افغانستان د ځلولو لپاره کار کوو.

مولوي عبدالکبیر دا هم ویلي؛ اسلامي امارت په رښتیني توګه اسلام پلي کوي او هیڅ ډول معامله نه‌کوي. له همدې کبله اسلامي ثقافت او زده‌کړه یوه مهمه اړتیا ګڼي.

تازه خبرونه

د اسلامي همکاریو ټولنه له اسلامي امارت سره د پړاوایز تعامل د لارې نقشه جوړوي

په دې غونډه کې ګډونوالو د افغانستان د سیاسي بدلونونو او بشري وضعیت په اړه د اسلامي همکاریو ټولنې اړوند مهم موضوعات وڅېړل او له واکمنو چارواکو سره یې د منظم او پړاوایز تعامل لپاره د یوه چوکاټ د رامنځته کولو لارې چارې وڅېړلې.

Published

on

 

د اسلامي همکاریو ټولنې د افغانستان په اړه د وزیرانو د تماس ډلې د جدې ښار په مقدماتي تخنیکي غونډه کې له اسلامي امارت سره د پړاوایز تعامل او اړیکو د تنظیم لپاره د لارې نقشې پر جوړولو بحث او خبرې کړې دي.

په دې غونډه کې ګډونوالو د افغانستان د سیاسي بدلونونو او بشري وضعیت په اړه د اسلامي همکاریو ټولنې اړوند مهم موضوعات وڅېړل او له واکمنو چارواکو سره یې د منظم او پړاوایز تعامل لپاره د یوه چوکاټ د رامنځته کولو لارې چارې وڅېړلې.

د اسلامي همکاریو ټولنې د څرګندونو له مخې؛ دغه چوکاټ د افغانانو د ګټو د خوندي کولو او په افغانستان کې د ثبات او پرمختګ لپاره د مرستې لپاره په پام کې نیول شوی دی.

دغه راز په دې غونډه کې هغه لومړیتوبونه وڅېړل شول، چې د تماس ډله به پرې د اسلامي همکاریو ټولنې د بهرنیو چارو د وزیرانو شورا د اړوند پرېکړه‌لیکونو د عملي کولو لپاره تمرکز کوي.

ګډونوالو له اسلامي امارت چارواکو سره د ګډو لومړیتوبونو په اړه مستقیمې او رغنده خبرو اترو پر ترسره کولو هم نظرونه وړاندې کړل.

Continue Reading

تازه خبرونه

د کورنیو چارو وزارت د کوکنارو د کښت د زیاتوالي په اړه د ملګرو ملتونو راپور رد کړ

یاد وزارت ویلي، چې په ۲۰۲۶ز.کال کې یې له ۲۳ زره هکټارو څخه زیاته ځمکه د نشه‌یي توکو له کښت څخه پاکه کړې او د ارزونو له مخې یې په هېواد کې د کوکنارو کښت نږدې صفر ته رسېدلی دی.

Published

on

 

د اسلامي امارت د کورنیو چارو وزارت په افغانستان کې د کوکنارو د کښت د زیاتوالي په اړه د ملګرو ملتونو د نشه‌یي توکو او جرمونو پر وړاندې د مبارزې دفتر تازه راپور رد کړی او د دغه راپور د ارزونې پر کړنلارې یې نیوکه کړې ده.

یاد وزارت ویلي، چې په ۲۰۲۶ز.کال کې یې له ۲۳ زره هکټارو څخه زیاته ځمکه د نشه‌یي توکو له کښت څخه پاکه کړې او د ارزونو له مخې یې په هېواد کې د کوکنارو کښت نږدې صفر ته رسېدلی دی.

د ملګرو ملتونو د نشه‌یي توکو او جرمونو پر وړاندې د مبارزې دفتر په خپل تازه راپور کې ویلي، چې په افغانستان کې د کوکنارو کښت په ۲۰۲۶ز.کال کې تر ۳۰۰ سلنې ډېر زیات شوی او څه باندې ۴۳ زره هکټاره ځمکې ته رسېدلی دی. په داسې حال کې، چې دغه کچه تېر کال شاوخوا ۱۰ زره هکټاره وه.

د یاد دفتر د«۲۰۲۶ز. کال لپاره د افغانستان د تریاکو د وضعیت ارزونې» د راپور له مخې؛ د تریاکو تولید هم نږدې ۴۰۰ سلنه زیات شوی او په ۲۰۲۵ز.کال کې له نږدې ۳۰۰ ټنو څخه په روان کال کې شاوخوا یو زر او ۵۰۰ ټنو ته رسېدلی دی.

راپور ښيي، چې په افغانستان کې د کوکنارو د کښت مرکز شمال‌ختیځو ولایتونو ته لېږدول شوی او د کښت شاوخوا ۷۶ سلنه ځمکه په همدې سیمه کې ده.

بدخشان او تخار د کوکنارو د کښت له مهمو مرکزونو څخه بلل شوي دي.

د دغه بنسټ د څرګندونو له مخې؛ په ۲۰۲۶ز. کال کې د ۱۶ ولایتونو د کوکنارو کښت ثبت شوی، چې د تېر کال پر پرتله پنځه ولایتونه زیاتوالی ښيي.

د ملګرو ملتونو دغه دفتر د بزګرانو اقتصادي ستونزې او د بدیل عاید د فرصتونو محدودیت د کوکنارو د کښت د بیا زیاتېدا اصلي لاملونه بللي او خبرداری یې ورکړی، چې له بزګرانو څخه له دوامدار ملاتړ پرته به د دغه بوټي د کښت مخنیوی ستونزمن وي.

په راپور کې راغلي، چې د وچو تریاکو د هر کیلوګرام منځنۍ بیه په ۲۰۲۵ز.کال کې له شاوخوا ۵۷۰ ډالرو څخه په روان کال کې ۵۰۰ ډالرو ته راټیټه شوې؛ خو اوس هم د نشه‌یي توکو پر سراسري بندیز د لګېدو له مخکینۍ کچې څخه د پام وړ لوړه ده.

ملګرو ملتونو زیاته کړې؛ په افغانستان کې د کوکنارو کښت او د تریاکو تولید، سره له دې زیاتوالي، اوس هم د بندیز له لګېدا مخکې کچې ته نه‌دي رسېدلي. هغه مهال څه باندې ۲۰۰ زره هکټاره ځمکه د کوکنارو تر کښت لاندې وه.

دا په داسې حال کې ده، چې له دې مخکې اسلامي امارت ویلي وه؛ د کوکنارو کښت، پلور او قاچاق د افغانستان له پولو بهر ته لېږدېدلی دی.

Continue Reading

تازه خبرونه

افغانستان د اسلام‌آباد د ایکو غونډې له حذفېدا وروسته د تهران سرمشریزې ته ځي

ټاکل شوې، چې د ایکو اته‌لسمه سرمشریزه د روان میلادي کال د ډسمبر پر درېیمه او څلورمه د ایران په پلازمېنه تهران کې د غړو هېوادونو د مشرانو او لوړپوړو چارواکو پر ګډون جوړه شي او د سیمه‌ییزو همکاریو په اړه خبرې اترې وکړي.

Published

on

د بهرنیو چارو وزارت د اطلاعاتو او عامه اړیکو رییس ضیاء احمد تکل ويلي، چې د افغانستان اسلامي امارت پلاوی به د اقتصادي همکاریو ټولنې( ایکو) په اته‌لسمه سرمشریزه کې ګډون وکړي.

د نوموړي د څرګندونو له مخې، د دې پلاوي مشري به د بهرنیو چارو وزیر امیرخان متقي پر غاړه ولري.

ټاکل شوې، چې د ایکو اته‌لسمه سرمشریزه د روان میلادي کال د ډسمبر پر درېیمه او څلورمه د ایران په پلازمېنه تهران کې د غړو هېوادونو د مشرانو او لوړپوړو چارواکو پر ګډون جوړه شي او د سیمه‌ییزو همکاریو په اړه خبرې اترې وکړي.

دا اعلان په داسې حال کې کیږي، چې د نومبر پر پنځلسمه او شپاړلسمه په اسلام‌آباد کې د پاکستان پر کوربه‌توب د اقتصادي همکاریو ټولنې د بهرنیو چارو وزیرانو په دېرشمه غونډه کې له ګډون څخه پاتې شو. په داسې حال کې، چې افغانستان د دې سیمه‌ییزې ټولنې غړی هېواد دی.

د پاکستان بهرنیو چارو وزارت ویلي وه، چې کابل ته بلنه ورکړ شوې نه‌وه؛ ځکه اسلام‌آباد د افغانستان اوسنۍ اداره پر رسمیت نه‌پیژني.

پاکستانيو چارواکو دا ادعا هم کړې، چې د افغانستان غړیتوب د اقتصادي همکاریو ټولنې د دارالانشا لخوا ځنډول شوی دی.

دا پرېکړه د افغان چارواکو له نیوکو سره مخ شوه.

اسلامي امارت استدلال کوي، چې سیاسي اختلافات باید د سیمه ییزو اقتصادي نوښتونو او همکاریو په برخه کې د افغانستان د ګډون مخه ونه نیسي.

د تهران په سرمشریزه کې د افغانستان ګډون به کابل ته دا فرصت برابر کړي، چې له سیمه ییزو شریکانو سره د سوداګرۍ، اقتصادي پراختیا، ټرانسپورټي نښلون او سیمه‌ییزو همکاریو ته ورته مسایلو په اړه بیا اړیکې ټینګې او خبرې اترې وکړي.

Continue Reading
Advertisement

Trending

Copyright © 2026 Ariana News. All rights reserved!