تازه خبرونه
لویدیځ د رسمیت پېژندنې لپاره ځانګړي شرطونه نهدي وړاندې کړي – امیر خان متقي
د بهرنیو چارو وزارت چارسمبالي امیر خان متقي ویلي؛ لویدیځ هېوادونه د رسمیت پېژندنې له موضوع څخه د فشار د یوې وسیلې په توګه کار اخلي او تر اوسه یې د دې لپاره خپل ځانګړي شرطونه نهدي وړاندې کړي.
نوموړي د سې شنبې پر ورځ ( د زمري ۳۱ ) ملت ته د حکومت د حساب وړاندې کولو په پروګرام کې د وینا پر مهال ویلي، چې نړیواله ټولنه پر ټولشموله حکومتولۍ، بشري حقونو او امنیتي مسایلو ټینګار کوي؛ خو داسې کوم هېواد نهشته، چې د دغو شرطونو له مخې پر رسمیت پېژندل شوی وي.
د بهرنیو چارو وزارت چارسمبالي امیر خان متقي څرګنده کړې: اسلامي امارت ټولشموله حکومت دی، هغه هېوادونه، چې په افغانستان کې د ټولشموله حکومت غوښتونکي دي؛ تر اوسه یې د اسلامي امارت لپاره د ټولشمولیت واضح تعریف نهدی وړاندې کړی.
امیر خان متقي زیاته کړې: له همدې کبله مونږ دا د یوې بانې په توګه په پام کې نیولی شو. دا، چې د افغانستان په اړه څوک څه وايي؛ په نړۍ کې داسې هېواد نشته، چې سیال ونهلري او پر چا نیوکه نهوي. مهمه دا ده، چې په ټول هېواد کې مخالفت نهشته. ان یو جریب ځمکه هم د مخالفینو تر واک لاندې نهده؛ هیڅ اختلاف نشته، ناامني نهشته او مخدره توکي صفر ته راټیټ شوي دي.
د بهرنیو چارو چارسمبالی؛ اسلامي امارت د ځینو حکومتونو پر پرتله، چې د ټولشموله حکومت غوښتنه کوي ډېر ټولشموله بولي او وایي: که دا يوه قانوني او تصادفي غوښتنه وي؛ نو ولې له بل هېواد سره نه راپورته کېږي؟ په نړۍ کې مونږ کودتایي، ټاکنیز او د یوې کورنۍ او یو کس حکومتونه وینو او بېلابېل حکومتونه شته؛ خو دا شرطونه دوی ته وړاندې شوي نهدي.
د بهرنیو چارو وزارت چارسمبالي ټینګار کړی، چې په ځینو هېوادونو کې د اسلامي امارت دیپلوماتان کار کوي او په کابل کې یې هم ځینې سفارتونه پرانستي دي.
نوموړي دغه راز یادونه وکړه، چې تېر کال له اروپايي هېوادونو څخه د لس زره سیلانیانو په ګډون ۷۰ زره بهرنیانو افغانستان ته سفر کړی دی.
دغه راز ویل کیږي، چې له افغانستان سره د نړۍ اړيکې د عادي کېدو پر لوري روانې دي.
تازه خبرونه
د سولې په چارو کې د ملګرو ملتونو د عمومي منشي مرستیال کابل ته راغلی
د سولې په چارو کې د ملګرو ملتونو د عمومي منشي مرستیال ژان پیر لاکروا به د دوه ورځني سفر په بهیر کې له جګړې څخه د پاتې چاودیدونکیو توکو د خطرونو په اړه د پوهاوي پر لوړولو راوڅرخیږي.
د سولې په چارو کې د ملګرو ملتونو د عمومي منشي مرستیال ژان پیر لاکروا له یوه پلاوي سره کابل ته راغلی دی.
د ملګرو ملتونو د ویاند مرستیال فرحان له دې مخکې په یوه خبري غونډه کې ویلي وه، چې ین پییر لاکروا به افغانستان ته په خپل سفر کې د چاودېدونکیو توکو د اغېزو په اړه د اسلامي امارت له چارواکو سره خبرې وکړي.
په دغه سفر کې له نوموړي سره د ملګرو ملتونو د ماین پاکۍ د څانګې مشره هم مل ده.
هغه زیاته کړې، چې لاکروا به د مې تر اووهلسمې پورې په کابل کې وي او په دې سفر کې به د ملګرو ملتونو د ماین پاکۍ د څانګې مشره ایلین کوهن هم ورسره مل وي.
د ملګرو ملتونو دغه چارواکي ویلي، چې د افغانستان خلک د ماینونو له خطر سره مخ دي او د ۲۰۲۳ کال له جنورۍ څخه د ۲۰۲۴ کال تر مارچ پورې په افغانستان کې د ۸۲۱ چاودېدونکیو توکو د وژل شویو ۸۱ سلنه ماشومان ول.
تر اوسه اسلامي امارت په دې اړه جزئیات ندي ورکړي.
د سولې په چارو کې د ملګرو ملتونو د عمومي منشي مرستیال په داسې حال کې افغانستان ته سفر کوي، چې ټاکل شوې د روان کال په جون میاشت کې د افغانستان په اړه په دوحه کې درېیمه غونډه جوړه شي.
دا په داسې حال کې ده، چې د ملګرو ملتونو د څرګندونو پر بنسټ، له دې مخکې د سولې په چارو کې د ملګرو ملتونو د عمومي منشي مرستیال قطر ته د سفر پر مهال د دغه هېواد له چارواکو سره د سولې د ټینګښت او د ستونزو په اړه خبرې کړې وې.
تازه خبرونه
په غور ولايت کې د ژغورنې د عملیاتو پر مهال يوه پوځي چورلکه رالوېدلې
نن سهار (چارشنبه د غویی شپږویشتمه ) د غور ولایت په مرکز فیروزکوه ښار کې د ملي اردو یوه چورلکه راغورځېدلې، چې په کې ۱ کس مړ او ۱۲ نور ټپیان دي.
د ملي دفاع وزارت ویاند عنایت الله خوارزمي زیاته کړې؛ د هوايي ځواک «MI 17» ډوله چورلکه غور ولایت د یوه فلانکوچ موټر د هغو کسانو د جسدونو د راایستلو لپاره لېږل شوې وه، چې د هریرود سیند ته لوېدلی و. د ژغورنې له عملیاتو وروسته دغه چورلکه له تخنیکي ستونزې سره مخ او په فیروزکوه ښار کې د بېړنۍ ناستې پر مهال له یوه دیوال سره ولګېده او راوغورځېده.
آریانانیوز ته د دې چورلکې د رارسېدلې ویډیو له مخې؛ په اوبو کې د چورلکې د راغورځېدو پر مهال یو شمېر کسان هم لیدل کیږي.
ویل کیږي، چې یوه ورځ مخکې د فیروزکوه په غازي دره سیمه کې فلانکوچ موټر له سړکه واوښت او په هریرود سیند کې ډوب شو، چې له کبله یې دوه کسان مړه او یو بل ټپي شوی و.
تازه خبرونه
جاپان د لویدیځو هېوادونو پر مستقیمو اړیکو خپل ټینګار څرګند کړ
په افغانستان کې د جاپان سفیر تاکایوشي کورما د اسلامي امارت د ریاست الوزراء له سیاسي مرستیال مولوي عبدالکبیر سره په لیدنه کې ویلي، چې په افغانستان کې د لویدیځو هېوادونو د ډیپلوماټیک حضور نشتوالی د دې لامل شوی، چې دوی په افغانستان کې له مثبتو پرمختګونو بې خبره پاتې شي او پر وینا یې دا مناسبه ده، چې نړیواله ټولنه مستقیماً له اسلامي امارت سره اړیکې ولري.
تاکایوشي کورما زیاته کړې، چې جاپان له افغانانو سره د طبیعي پېښو د مخنیوي، پر نشهیي توکو د روږدو کسانو د درملنې او د افغان کروندګرو لپاره د بدیل کښت په برخو کې همکارۍ ته ژمن دی.
دغه راز مولوي عبدالکبیر په دې لیدنه کې ویلي؛ د ولسونو د ملاتړ له کبله اسلامي امارت بریالی شوی، چې ملي سوله رامنځته، سترې پروژې پیل او ګڼ نور اصلاحات رامنځته کړي.
ویل کیږي، چې اسلامي امارت د خلکو د اقتصادي ستونزو د اواري هڅه کوي او له نړۍ سره مثبت تعامل او پراخې اړیکې غواړي.
-
تازه خبرونه4 days ago
الله ګل مجاهد د قتل پر تور ونیول شو
-
تازه خبرونه3 days ago
په بغلان کې سېلابونو ۱۹۴۵ کسانو ته مرګ او ژوبله اړولې
-
تازه خبرونه3 days ago
د اسلامي هېوادونو همکاریو ټولنې د افغانستان له سیلاب ځپلیو سره د مرستې غوښتنه وکړه
-
سوداگري4 days ago
افغانستان او پاکستان د بار وړونکیو موټرو پر نوي ټرانسپورټي میکانیزم هوکړه وکړه
-
تازه خبرونه3 days ago
څو ایراني شرکتونو د افغانستان په کانونو کې د پانګونې پرېکړه وکړه – قدیر قیافه
-
تازه خبرونه2 days ago
د یوناما استازې د ایران له بهرنیو چارو وزیر سره وکتل
-
لوبی2 days ago
د کابل کرکټ غوره لیګ لوبغاړو د داوطلبۍ مراسم ترسره شول
-
تازه خبرونه1 day ago
په ننګرهار کې د ناکامورا کانال پروژه بشپړه شوه