تازه خبرونه
اسلامي امارت زمونږ اندېښنې اوري – د پاکستان لنډمهالی لومړی وزیر
د پاکستان لنډمهالی لومړی وزیر انوارالحق کاکړ دا خبره رد کړې، چې ګواکې د افغانستان اسلامي امارت د پاکستان خبرې نه اوري.
د شنبې پر ورځ ( د وږي ۲۵ ) د پاکستان لنډمهالي لومړی وزیر انوار الحق کاکړ د امریکا غږ اردو تلویزیون ته د مرکې پر مهال وایي: زه فکر نهکوم، چې طالبان (اسلامي امارت) دې د پاکستان خبرې نه اوري؛ ځکه پاکستان له طالبانو (اسلامي امارت) څخه کومه ځانګړې غوښتنه نهلري.
نوموړي دا څرګندونې د دې پوښتنې په ځواب کې کړي، چې اسلامي امارت د پاکستان خبرې ولې نهاوري؟! په داسې حال کې، چې اسلاماباد له اسلامي امارت سره د نړۍ د اړیکو د پیاوړتیا هڅې کوي.
دغه راز یې د دې پوښتنې په ځواب کې، چې ایا په افغانستان کې د تي تي پي مخ پر زیاتېدونکي ګواښ ته د درون بریدونو کوم غوراوی شته؟ کاکړ ویلي: پاکستان د ځان د دفاع حق لري. چېرته، چې مونږ د خپلې خاورې او خلکو د ساتنې اړتیا احساس کړو؛ هغه به ترسره کوو.
هغه زیاته کړې: زه به د عملیاتي پرېکړو جزئیاتو ته، چې پاکستان ورته اړ کیږي؛ لاړ نهشم، خو که د ګواښ له کبله اړینه شي – مونږ به یې په اړه بیا پرېکړه کوو.
د پاکستان لنډمهالي لومړي وزیر ویلي، چې د افغانستان له اسلامي امارت سره خبرې د پاکستان د ګټو په لومړیتوبونو کې دي.
انوار الحق کاکړ د دوحې تړون ته په نغوته کې ویلي: اسلامي امارت هوکړه کړې، چې د افغانستان خاوره به د نورو هېوادونو پر ضد نه کاروي؛ اسلامي امارت هم په دې باوري دی، چې په سیمه کې د دغه تړون پلي کول له ګاونډ هېوادونو سره د ځواکمنو او دوستانه اړیکو د ټینګښت لپاره یوه اړتیا ده.
نوموړي دا هم ویلي: د تړون د شرایطو د نه پوره کېدو یو څو لاملونه شته… مونږ په دې برخه کې خپل رول لوبوو او د هغه رول په اړه په حقوقي غونډو کې برخه اخلو، چې له بل لوري یې د لوبولو تمه لرو.
کاکړ دا هم څرګنده کړې، چې د پاکستان او افغانستان او منځنۍ اسیا ترمنځ سوداګریزې اړیکې مخ پر ښه کېدو دي.
پاکستانيو چارواکو پر ځلونو ادعا کړې، چې د افغانستان خاوره په پاکستان کې د بریدونو لپاره کارول کیږي؛ خو اسلامي امارت دغه ادعاوې رد کړي او ویلي یې دي، چې پاکستان باید د خپلو ستونزو حل په خپل قلمرو کې ولټوي.
تازه خبرونه
جاپان د افغانستان له سیلاب ځپلیو سره د بېړنیو مرستو ژمنه وکړه
په افغانستان کې د جاپان سفارت د پنجشنبې پر ورځ په ډاګه کړه، چې د افغانستان د شمال له سیلاب ځپلیو خلکو سره به بېړنۍ مرستې وکړي.
د سفارت د خپرې شوې خبرپاڼې له مخې؛ دا مرستې به د جاپان د نړيوالې همکارۍ ادارې (JICA) له لارې د سره صليب او سرې مياشتې ټولنې (IFRC) او افغاني سرې مياشتې ټولنې (ARCS) پر همکارۍ ترسره شي.
دا مرست خیمې، کمبلې او نور اړین توکي رانغاړي.
په یادې خبرپاڼه کې راغلي؛ جاپان پرېکړه کړې، چې ډېر ژر به د افغانستان د سيلاب ځپلیو خلکو د مرستې لپاره بېړنۍ مرستې وکړي. مونږ تل د افغانستان د خلکو تر څنګ ولاړ یوو.
دغه راز د ملګرو ملتونو د بشري چارو د همغږۍ دفتر (OCHA) ویلي، چې په بغلان، بدخشان او تخار ولایتونو کې د سختو بارانونو او سیلابونو له کبله ۸ زره ۹۷۵ کورونه ویجاړ شوي او یا هم زیانمن شوي دي.
روسیې هم د اړتیا په صورت کې د مرستې ژمنه کړې ده.
دا په داسې حال کې، چې د اسلامي همکاریو ټولنې (OIC) هم له اسلامي هېوادونو او مرستندویه ټولونو غوښتي، چې د افغانستان له سیلاب ځپلیو سره مرسته وکړي.
تازه خبرونه
د ترکیې سفیر د افغانستان سیلاب ځپلیو ته د ۶۷۰ ټنو مرستې اعلان وکړ
په کابل کې د ترکیې سفیر د اقتصاد وزارت له چارسمبالي سره په کتنه کې څرګنده کړې، چې سبا (جمعه د غویی ۲۸ ) ته به د افغانستان د وروستیو سیلاب ځپلیو لپاره د لومړنیو توکو څه باندې۲۰ ټنه مرسته راولېږدول شي.
د اقتصاد وزارت د خبرپاڼې له مخې؛ جنګ اونال له دین محمد حنیف سره په کتنه کې له ترکیې څخه د ۶۵۰ ټنو نورو بشري مرستو له رالېدولو هم خبر ورکړی، چې په کې خیمې، خوراکي توکي، درمل، جامې او نور توکي شامل دي.
هغه دا ډاډ هم ورکړی، چې افغانستان ته به دا مرستې د اوسپنېپټلۍ له لارې د هرات تورغنډۍ بندر ته رادننه شي.
په دې کتنه کې دین محمد حنیف له دغو مرستو څخه د هرکلي تر څنګ ویلي، چې د ترکیې هېواد د تاریخ په اوږدو کې د افغانستان یو ښه دوست او همکار پاتې شوی دی.
تازه خبرونه
ملګري ملتونه غواړي په افغانستان کې د ځمکو خړبولو لپاره سولري پمپونه ولګوي
د ریاست الوزراء اداري مرستیال عبدالسلام حنفي د سې شنبې پر ورځ ( د غویی پېنځهویشتمه ) د ملګرو ملتونو د پروژې خدمتونو د دفتر (UNOPS) له اجرائیوي رییس جورج موریرا داسیلوا سره وکتل.
په دې کتنه کې جورج موریرا داسیلوا اداري مرستيال ته د خپلو تېرو هڅو او لاسته راوړنو په اړه معلومات ورکړل او څرګندوي؛ دا اداره غواړي، چې په افغانستان کې د سولري پمپونو پر لګولو د کرنيزو ځمکو د خړوبولو يوه نوې پروژه پيل کړي.
عبدالسلام حنفي د دې ادارې د فعالیتونو او لاسته راوړنو د ستاینې ترڅنګ ویلي، چې اسلامي امارت په افغانستان کې د (UNOPS) ادارې له هڅو ملاتړ کوي او د پروژو د پلي کولو لپاره یې لازمې اسانتیاوې برابروي.
ویل کیږي، چې عبدالسلام حنفي له ټولو نړیوالو مرستندویه بنسټونو وغوښتل، چې کروندګرو ته د کوکنارو د بدیل کښت او افغان ځوانانو ته د کار د زمینې په برابرولو کې همکاري وکړي.
-
تازه خبرونه5 days ago
الله ګل مجاهد د قتل پر تور ونیول شو
-
تازه خبرونه4 days ago
په بغلان کې سېلابونو ۱۹۴۵ کسانو ته مرګ او ژوبله اړولې
-
لوبی3 days ago
د کابل کرکټ غوره لیګ لوبغاړو د داوطلبۍ مراسم ترسره شول
-
تازه خبرونه3 days ago
د یوناما استازې د ایران له بهرنیو چارو وزیر سره وکتل
-
تازه خبرونه4 days ago
د اسلامي هېوادونو همکاریو ټولنې د افغانستان له سیلاب ځپلیو سره د مرستې غوښتنه وکړه
-
تازه خبرونه4 days ago
څو ایراني شرکتونو د افغانستان په کانونو کې د پانګونې پرېکړه وکړه – قدیر قیافه
-
سوداگري5 days ago
افغانستان او پاکستان د بار وړونکیو موټرو پر نوي ټرانسپورټي میکانیزم هوکړه وکړه
-
تازه خبرونه2 days ago
په ننګرهار کې د ناکامورا کانال پروژه بشپړه شوه