د افغانستان اسلامي امارت د دوشنبې پر ورځ (د کب شپږمه) ومنله، چې په بامیان ولایت کې یې دوه بریټانوي وکړي، یو چینایي الاصله امریکایي او د هغو افغان ژباړونکی نیولي دي.

د کورنیو چارو وزارت ویاند تائید کړې، چې د نیول شویو کسانو کورنیو په ځانګړي توګه د بریټانوي جوړې کورنۍ د دغو بندیانو د خوشې کولو غوښتنه کړې ده.

د کورنیو چارو وزارت ویاند عبدالمتین قانع د فرانسې خبري سرچینې ته ویلي: “د ځانګړو ملاحظاتو له مخې چارواکو دوه بریټانوي اتباع، چې د افغانستان اسناد لري، یو امریکایي او د هغو د ژباړونکي په ګډون څلور کسان نیولي دي.”

له دې مخکې د بریټانیا بهرنیو چارو وزارت د عمر خوړلو بریټانوي جوړې نیول تائید کړل، چې په افغانستان کې پر بشري فعالیتونو بوخت ول.

د بریټانیا د بهرنیو چارو وزارت ویاند د دوشنبې پر ورځ (د کب شپږمه) یوه اعلامیه خپره کړه: “مونږ د هغو دوه بریټانوي وګړو له کورنیو ملاتړ کوو، چې په افغانستان کې نیول شوي دي.”

بریټانوي رسنیو راپور ورکړی، چې پیټر او باربي رینولډز دوه بریټانوي وګړي دي، چې د فبرورۍ پر لومړۍ په بامیان ولایت کې د یوې چینایي-امریکایي میرمنې او د دوی له افغان ژباړونکي سره یوځای ونیول شول او زنداني شول.

د دې بیټتانوي جوړې لور سنډې ټایمز ته ویلي، چې مور او پلار یې له ۱۸ کلونو راپدېخوا په افغانستان کې د ښوونیزو پروګرامونو په جوړولو کې ښکېل ول او په بامیان ولایت کې یې ژوند کاوه. د دې د معلوماتو له مخې؛ دې جوړې په کابل کې د ماشومانو او میندو لپاره پېنځه ښوونیزې پروژې او په بامیان کې یوه بله تعلیمي پروژه پیل کړې وه.

قانع له هغې وروسته، چې د بریټانوي جوړې ( پیټر او باربي رینالډز) لور له لندن څخه وغوښتل، چې د هغې د مور او پلار خوشې کول تضمین کړي؛ وویل، چې “د دې ستونزې د حل لپاره هڅې روانې دي.”

که څه هم د بریټانوي جوړې د نیول کېدو لامل ندی پر ګوته شوی؛ خو سنډي ټایمز راپور ورکړی، چې ظاهراً د ښځو د تعلیم لپاره د دوی هڅې د دوی د نیول کېدو لامل وې.

انټوېسل په دې اړه ويلي: “دا ډېره بده ده، که دوی د میندو ماشومانو ته د تدریس پر تور نیول شوي دي.”

پیټر او باربي رینولډز یوازني بهرني وګړي ندي، چې په تېرو درې نیمو کلونو کې د اسلامي امارت لخوا نیول شوي دي.

په تېرو درې نیمو کلونو کې، چې اسلامي امارت په افغانستان کې بیا واکمن شوی؛ ګڼ‌شمېر بهرني وګړي یې د کاناډا د پخواني سرتېري ډیویډ لاري، رایان کاربیټ، جورج ګلیزمان، محمود شاه حبیبي او ویلیم مک کیني، چې ټول امریکایي وګړي دي؛ نیولي.