د بهرنیو چارو وزیر امیرخان متقي د روسیې د امنیت شورا له منشي سرګې شویګو سره لیدلي او د دواړو هېوادونو پر دوه‌اړخیزو اړیکو، سیمه‌ییز امنیت او امنیتي همکاریو یې خبرې کړې دي.

د اسلامي امارت بهرنیو چارو وزارت نن( سې‌شنبه) په یوه خبرپاڼه کې لیکلي، چې په دې لیدنه کې دواړو لوریو د نشه‌يي توکو پر وړاندې د مبارزې او د افغانستان او روسیې ترمنځ د امنیتي همکاریو د پراختیا په اړه هم خبرې کړې دي.

امیرخان متقي د دواړو هېوادونو ترمنځ د سیاسي اړیکو مثبت بهیر ته پر نغوته د افغانستان اسلامي امارت د پر رسمیت پېژندلو له کبله له روسیې مننه کړې او د امنیتي همکاریو پر پیاوړتیا، منظمو مشورو او د اقتصادي او سوداګریزو اړیکو پر پراختیا یې ټینګار کړی دی.

د بهرنیو چارو وزیر ویلي، افغانستان د سیمه‌ییز امنیت د ټینګښت او د نشه‌يي توکو پر وړاندې د مبارزې لپاره خپلې هڅې روانې ساتي او د مستقیمو اړیکو او عملي همکاریو له لارې له سیمه‌ییزو هېوادونو سره د همکاریو له پراختیا ملاتړ کوي.

دغه راز سرګي شویګو د افغانستان او روسیې اړیکې د پراختیا په حال کې بللې او د امنیت د ټینګښت او د نشه‌يي توکو پر وړاندې د مبارزې په برخه کې یې د افغانستان له هڅو خوښي څرګنده کړې ده.

د روسیې د امنیت شورا منشي ټینګار کړی، چې مسکو به له افغانستان سره سیاسي مشورو او عملي همکارۍ روانې ساتي.

د بهرنیو چارو وزیر امیرخان متقي په مسکو کې د روسیې د لومړي وزیر له مرستیال الکسي اوورچوک سره لیدلي او د افغانستان او روسیې ترمنځ د سیاسي همغږۍ ترڅنګ یې د اقتصادي، سوداګریزو، ټرانزیټي او انرژۍ د پراختیا په اړه خبرې کړې دي.

د بهرنیو چارو وزارت د خپرې شوې خبرپاڼې له مخې؛ امیرخان متقي د دواړو هېوادونو سیاسي اړیکې مثبتې بللي او د روسیې له رهبرۍ یې د افغانستان په اړه د مثبت سیاست له کبله مننه کړې ده.

نوموړي ټینګار کړی، چې شته سیاسي همغږي باید پر عملي اقتصادي شراکت بدله شي او په سوداګرۍ، ټرانزیټ، سیمه‌ییز اتصال، روسي پانګونې، انرژۍ، کانونو او بانکي او تادیاتي آسانتیاوو کې د همکاریو پر پراختیا یې ټینګار کړی دی.

الکسي اوورچوک هم له افغانستان سره د اقتصادي همکاریو لپاره د روسیې چمتووالی څرګند کړی او څرګندوي، چې د عملي همکاریو د پیل لپاره اوس مناسب شرایط برابر شوي دي.

نوموړي د ټرانزیټ، ټرانسپورټ، انرژۍ او په نورو برخو کې له افغانستان سره د ګډ کار پر پراختیا ټینګار کړی او د تېر کال د سوداګرۍ د پام وړ زیاتوالي یادونه یې کړې ده.

اوورچوک هیله څرګنده کړې، چې په نږدې راتلونکې کې به د افغانستان او روسیې ترمنځ ډېرې عملي اقتصادي همکارۍ رامنځته شي.

د امریکا د ۳۰ ایالتونو څارنوالانو د دې هېواد له سترې محکمې غوښتي، چې د افغانستان بانک د شاوخوا ۳.۵ میلیارډ کنګل شویو ډالرو قضیه وڅېړي؛ دا هغه شتمني ده، چې د سپټمبر د یوولسمې د بریدونو قربانیان او د قربانیانو کورنۍ یې د غرامت لپاره غواړي.

د آیوا ایالت د لویې څارنوالۍ دفتر ویلي، دغو ایالتونو سترې محکمې ته په وړاندې کړي غوښتنلیک(عریضه) کې د بریدونو د قربانیانو او د هغوی د کورنیو ملاتړ کړی؛ هغو کسانو، چې د امریکا په فدرالي محکمو کې یې د غرامت د ترلاسه کولو حکمونه ترلاسه کړي دي.

د دغه دفتر د څرګندونو له مخې، دغو کسانو له کلونو قضايي هڅو وروسته په ټوله کې د نږدې ۱۷ میلیارډ ډالرو غرامت د ترلاسه کولو حکمونه ترلاسه کړي؛ خو د امریکا د استیناف د دوه‌یمې حوزې محکمې حکم کړی، چې د افغانستان بانک شاوخوا ۳.۵ میلیارډ ډالر شتمنۍ د غرامت د ورکړې لپاره نه‌شي کارېدلی.

دغه شتمنۍ د ۲۰۲۱ز.کال په اګست کې د اسلامي امارت له بیا واکمنېدا سره سم د امریکا د خزانې وزارت له‌خوا کنګل شوې دي. د امریکا حکومت وروسته د شاوخوا ۷ میلیارډ کنګل شویو ډالرو له نیمایي؛ یعنې ۳.۵ میلیارډ ډالرو څخه د افغان فنډ د جوړولو پرېکړه وکړه.

د امریکا د ایالتونو لوی څارنوالان استدلال کوي، چې د دغه هېواد قوانین د دغو شتمنیو د کارولو اجازه ورکوي.

د آیوا ایالت لویې څارنوالې برینا بِرډ ویلي؛ د بریدونو قربانیانو او د هغوی کورنیو د امریکا د قضايي نظام له لارې د عدالت او غرامت لپاره هڅې کړې دي او باید هغو پیسو ته لاسرسی ولري، چې محکمو ورته د غرامت په توګه ټاکلې دي.

دا په داسې حال کې ده، چې اسلامي امارت تل د افغانستان بانک د شتمنیو د بېرته آزادولو غوښتنه کړې ده.