د خیبر پښتونخوا والي فیصل کریم کنډي په پېښور کې د «پاکستان او افغانستان امنیت، سوداګري او سیمه‌ییزاقتصاد» تر سرلیک لاندې یوې سیمه‌ییزې غونډې ته له اسلامي امارت سره د سیاسي خبرو اترو پر اړتیا ټینګار وکړ.

دا غونډه د پېښور پوهنتون نړیوالو اړیکو څانګې رابللې وه.

فیصل کریم کنډي ویلي، چې کورنۍ او د پولې هاخوا ننګونې یوازې د سیاسي مشرانو ترمنځ د رغنده ښکېلتیا له لارې حل کېدی شي.

هغه ټینګار کړی، چې یو باثباته افغانستان نه یوازې د پاکستان لپاره، بلکې د ټولې سیمې لپاره اړین دی او  دواړو لوریو ته تلپاتې سوله، اقتصادي وده او سوداګري بشپړ ارزښت لري.

په دې ناسته کې د سیمه‌ییز امنیت، سوداګریزو ننګونو او د پاکستان-افغانستان د لارو د ظرفیت په اړه هم خبرې شوې دي، چې ورسره له مرکزي آسیا سره اړیکې پیاوړې کیږي.

کنډي ویلي، چې په خیبر پښتونخوا کې امنیت په مستقیم ډول د افغانستان د شرایطو له‌خوا اغېزمن کیږي. لکه څنګه، چې تېرو شخړو( د شوروي له جګړو او سپټمبر یوولسمې وروسته پېښو) په سیمه کې اورپکۍ ته وده ورکړې وه.

دا په داسې حال کې ده، چې د اسلامي امارت ادارې د کنډي د څرګندونو په اړه تر دې دمه څه ندي ویلي؛ خو چارواکو تل له ګاونډ هېوادونو سره د همکاریو او اقتصادي اړیکو د پیاوړتیا لپاره د مثبتو خبرو اترو پر اړتیا ټینګار کړی دی.

د فبروري پر شپاړلسمه، په باجوړ کې پر امنیتي ځواکونو وسلوال برید تر سره شوی، چې په کې ۱۱ پاکستاني سرتېري وژل شوي دي.

د پاکستان بهرنیو چارو وزارت ویاند ټینګار کړی، چې د تحریک طالبان پاکستان (TTP) مشران په افغانستان کې میشت دي او له دې خاورې یې ښکاره فعالیت روان ساتلی دی. دا هغه ادعا ده، چې اسلامي امارت تل رد کړې او بې‌بنسټه یې بولي.

طاهر اندرابي افغان ډیپلومات ته یادونه کړې؛ دا ډول پېښې دوه اړخیزې اړیکې او سیمه‌ییزې سولې ته زیان رسوي او پاکستان له افغان حکومت څخه غوښتي، چې د ورته بریدونو د بیا تکرار د مخنیوي لپاره په خپله خاوره کې میشت وسلوالو ډلو پر وړاندې اغېزمن او محسوس اقدامات وکړي.

د پاکستان او افغانستان ترمنځ اړیکې په وروستیو کلونو کې د امنیتي اندېښنو له کبله له لوړو او ژورو ډکې وې؛ خو کابل تل ټینګار کړی، چې د افغانستان خاوره به د نورو پر ضد ونه کارول شي.

د پاکستان دفاع وزیر خواجه آصف خبرداری ورکړی، چې که اړتیا پېښه شي؛ اسلام‌آباد ښايي د افغانستان دننه هوايي بریدونه ترسره کړي.

خواجه آصف د فرانسې له یوې رسنۍ سره په مرکه کې ادعا کړې؛ په پاکستان کې وروستي بریدونه د هغه څه پایله ده، چې دا یې د افغانستان د حکومت او هند ترمنځ «نیابتي جګړه» بولي.

خواجه آصف د پاکستان او هند ترمنځ روانو ترینګلتیاوو ته هم په نغوته(اشاره) کې ویلي، چې د دوه اټومي وسلو لرونکو هېوادونو ترمنځ د شخړې احتمال اوس هم لیدل کیږي او د اسلام‌آباد او نوي ډیلي اړیکې په ترینګلي وضعیت کې دي.

دا څرګندونې په داسې حال کې راپورته کېږي، چې د اسلامي امارت ویاند ذبیح‌الله مجاهد د چارشنبې پر ورځ د مبارکې روژې پر درناوي د درې پاکستانيو اسیرو سرتېرو له خوشې‌کېدا خبر ورکړ.

هغه ویلي، چې دا اسیر شوي سرتېري د ۱۴۰۴ لمریز لېږدیز کال د تلې د نښتو پر مهال د افغان ځواکونو له‌خوا نیول شوي وه.

د ذبیح‌الله مجاهد د څرګندونو له مخې؛ د اسیرانو د خوشې کېدا هڅه د اسلامي امارت د هغې پالیسۍ له مخې تر سره شوې، چې له نړۍ سره د مثبتو اړیکو د ساتلو لپاره ورته پاملرنه کیږي او اسیران هم د سعودي عربستان د غوښتنې له مخې یوه سعودي پلاوي ته وسپارل شول.

د پاکستان او افغانستان ترمنځ اړیکې په وروستیو کلونو کې د امنیتي اندېښنو له کبله له لوړو ژورو سره مخ دي؛ خو د کابل تل ټینګار کړی، چې د افغانستان خاوره به د هیچا او هیڅ ګاونډ پر ضد ونه کارول شي.