د افغانستان بهرنیو چارو وزیر د سعودي عربستان له بهرنیو چارو وزیر سره په ټیلیفوني خبرو کې د دوه‌اړخیزو اړیکو پر پیاوړتیا، د سعودي میشتو افغانانو د ستونزو پر حل او د سیمې پر مهمو مسایلو ټینګار وشو.

په دې ټیلیفوني اړیکه کې امیرخان متقي د افغانستان او سعودي عربستان ترمنځ د اړیکو پراختیا مهمه وبلله او په سیمه کې یې د ثبات د ټینګښت لپاره د ریاض له هڅو مننه وکړه.

هغه همدارنګه د سعودي مېشتو افغانانو لپاره د آسانتیاوو برابرولو؛ په ځانګړي توګه د خدماتو د وړاندې کولو او د معلوماتو د لېږد په اړه مننه وکړه او په ډیپلوماټیکو استازولیو کې یې د بشري ظرفیتونو د پیاوړتیا پر ارزښت ټینګار وکړ.

دغه راز د سعودي عربستان بهرنیو چارو وزیر هم د دواړو هېوادونو ترمنځ د ډیپلوماټیکو اړیکو پر پراختیا ټینګار وکړ او د استازولیو له ظرفیت لوړولو یې هرکلی وکړ.

دواړو لوریو همدارنګه سیمه‌ییز ثبات د ټولو هېوادونو لپاره اړین وباله او د ستونزو د حل لپاره یې پر خبرو اترو او ډیپلوماسۍ ټینګار وکړ.

په پای کې دواړو خواوو د اړیکو د دوام او په مناسب وخت کې یې د مخامخ لیدنې هوکړه وکړه.

د بیات پاور شرکت له افغان ګاز شرکت سره د طبیعي ګاز د پېر او پلور قرارداد وغځاوه؛ دا هڅه د راتلونکو لس کلونو لپاره د ۴۰ میګاواټه برښنا د تولید زمینه برابروي.

د دې قرارداد له مخې؛ بیات پاور به د طبیعي ګاز پر کارولو د برښنا تولید ته دوام ورکړي او تولید شوې برښنا به د افغانستان برښنا شرکت له لارې د خلکو د اړتیاوو پوره کولو او د هېواد د صنعتي ودې د ملاتړ لپاره ووېشل شي.

د جوزجان ولایت د افغان ګاز شرکت مسوولان وایي، چې دا شرکت د بیات پاور لپاره د اړتیا وړ ګاز برابرولو ته ژمن دی او له دې پروژې به هر اړخیز ملاتړ وکړي.

د دوی د څرګندونو له مخې؛ د دې قرارداد ارزښت په دې کې دی، چې برښنا له کورنیو سرچینو تولیدېږي او د هېواد د انرژۍ د ځان بسیاینې په پیاوړتیا کې اړین رول لري.

د جوزجان د افغان ګاز شرکت رییس اختر محمد منصور ټینګار کړی، چې د دې پروژې لپاره د ګاز دوامداره تولید لومړیتوب لري.

له بلې خوا د بیات پاور د عمومي رییس مرستیال محمد اسماعیل ویلي، چې د دې قرارداد له غځولو سره به د طبیعي ګاز له لارې د برښنا تولید د راتلونکو لس کلونو لپاره دوام ومومي.

د بیات پاور د عمومي رییس مرستیال حاجي محمد اسماعیل وایي: ډېر خوښ یوو، چې نن له افغان ګاز شرکت سره د ګاز د پېر او پلور د قرارداد د غځېدا شاهدان یوو. لکه څنګه، چې تاسې پوهېږئ؛ بیات پاور شرکت له څو کلونو راپدېخوا په شبرغان کې له طبیعي ګاز څخه ۴۰ میګاواټه برښنا تولیدوي او دا برښنا د افغانستان برښنا شرکت له لارې وېشل کېږي. دا بهیر به د یاد قرارداد له غځېدا سره د راتلونکو لس کلونو لپاره دوام وکړي. همدارنګه د افغان ګاز شرکت او د هغې له رهبرۍ څخه مننه کول په کار دي.

بیات پاور شرکت په تېرو څه باندې څلوېښتو کلونو کې د افغانستان لومړنی خصوصي شرکت دی، چې له طبیعي ګاز څخه برښنا تولیدوي. دغه برښناکوټ، چې په جوزجان ولایت کې موقعیت لري؛ د پرمختللې ګازي توربین پر کارولو دا مهال د سلګونو زره ګډونوالو لپاره برښنا برابروي او هر کال تر ۳۰۰ میلیون کیلوواټ-ساعت ډېره برښنا تولیدوي.

دا هڅه د کورني انرژۍ د تولید د پیاوړتیا، پر بهرنیو سرچینو د اتکا د کمولو او د هېواد د اقتصادي ودانیزو بنسټونو د پراختیا پر لوري اړین ګام بلل کېږي.