د بدخشان د کلیو د بیارغونې او پراختیا رییس امان‌الله چهره ويلي، د «ورېښمو لارې» د سړک جوړولو پروژه د کلیو د بیارغونې او پراختیا وزارت له‌خوا پلې شوې ده.

د نوموړي د څرګندونو له مخې؛ دغه سړک ټولټال ۱۲۱،۱۳ کیلومټره اوږدوالی لري، چې د برغل له سیمې پیلېږي او د چین تر پولې پورې د بزای ګنبد سیمې ته غځېدلی دی.

هغه زیاتوي؛ د دغه سړک د جوړولو چارې په تېرو پېنځه کلونو کې پرمخ تللي او اوس یې چارې بشپړې پای ته رسېدلې دي.

چهره زیاته کړې؛ د نقشې او ډیزاین له مخې د دغه سړک سور له اووه څخه تر ۱۰ مټرو پورې دی او په اوږدوالي کې یې درې ستر پلونه جوړ شوي دي. یو پل د چین پولې ته نږدې، بل د بزای ګنبد په سیمه او درېیم پل د برغل په سیمه کې جوړ شوی، چې د هر یوه اوږدوالی شاوخوا ۲۰ څخه تر ۲۲ مټرو پورې دی.

د نوموړي د څرګندونو له مخې؛ د دغه سړک په اوږدو کې ګڼ شمېر د اوبو تېرولو واړه پلچکونه هم جوړ شوي، چې روانې اوبه په مناسبه توګه له سړک څخه واوړي.

ویل کیږي، چې دغه سړک به په نږدې راتلونکې کې ګټې اخیستنې ته وسپارل شي.

د اسلامي همکاریو ټولنې (OIC) د افغانستان د تماس ډلې د ملګرو ملتونو د عمومي اسامبلۍ د یو اتیاومې غونډې په څنډه کې د افغانستان د بشري او پراختیايي وضعیت په اړه خبرې وکړې او له دې هېواد سره یې د نړیوالې ټولنې د مرستو د پیاوړتیا لارې چارې وڅېړلې.

د اسلامي همکاریو ټولنې سرمنشي اسماعیل ولد شیخ احمد په دې غونډه کې د افغانستان له خلکو څخه د ملاتړ لپاره د دغه ټولنې پر ژمنتیا ټینګار کړی دی.

هغه ویلي، د اسلامي همکاریو ټولنې تګلاره د افغانستان له واکمنو چارواکو سره پر تعامل او عملي همکاریو ولاړه ده، چې باید د افغانستان د خلکو د ګټو او د بشري فعالیتونو د دوام لپاره وي.

د اسلامي همکاریو ټولنې سرمنشي همداراز په کابل کې د دې ټولنې د پلاوي او سیمه‌ییز دفتر له لارې د ترسره کېدونکو فعالیتونو پر دوام ټینګار وکړ او وایي، چې د نجونو زده‌کړې، روغتیا او د ټولنیز پیوستون پیاوړتیا د دغو فعالیتونو له مهمو برخو څخه دي.

د اسلامي همکاریو ټولنې د افغانستان تماس ډلې په دې غونډه کې د افغانستان وروستي بشري او پراختیايي وضعیت او د افغانانو د ملاتړ لپاره د نړیوالې همکارۍ د زیاتولو لارې هم وڅېړلې.

د بریټانیا دفاع وزارت د ۹۷ میلیون نویو سندونو له موندل کېدا خبر ورکړی، چې ښايي یو شمېر یې په افغانستان کې د بریټانیا د ځانګړو ځواکونو پر وړاندې د جنګي جرمونو د ادعاوو له عامه څېړنې سره تړاو ولري.

د بریټانیا دفاع وزارت د وکیلانو له‌خوا په خپور شوي لیک کې راغلي، دغه اسناد د معلوماتو په یوه ستره ټولګه کې موجود ول. له دې مخکې داسې انګېرنه کېده، چې ډېره برخه به یې له څېړنې پاتې وي.

د دغې څېړنې مشر چارلز هیډن-کیو د اسنادو په پېژندلو او وړاندې کولو کې د ځنډ په اړه اندېښنه ښودلې او څرګندوي: که دغه نوي موندل شوي اسناد چټک ونه څېړل شي د څېړنې بهیر، چې اوس پرمختللیو پړاوونو ته رسېدلی؛ نور هم  وځنډوي.

دغه څېړنه په ۲۰۲۳ز.کال کې د بي‌بي‌سي له‌خوا د یوه مستند فلم له خپرېدا وروسته پیل شوه. په دې مستند فلم کې داسې ادعا شوې وه: د بریټانیا ځانګړو هوايي ځواکونو، چې  SAS نومیږي؛ څه باندې یوه لسیزه مخکې د افغانستان د جګړې پر مهال ۵۴ کسان په مشکوکو شرایطو کې وژلي دي.

د څېړنې مشر زیاته کړې: د جمعې ورځې په غونډه کې به د بریټانیا له دفاع وزارت څخه وغواړي، چې ډاډ ورکړي؛ هر هغه سند، چې له دغې څېړنې سره تړاو لري چټک وپېژني او څېړنې ته یې وسپاري او دا حالت دا ډول بیا تکرار نه‌شي.

ټاکل شوې وه، چې دا څېړنه لږ تر لږه یو لنډمهالی راپور په ۱۸ میاشتو کې خپور کړي؛ خو د څېړنې له پیل نږدې څلور کاله تېرشوي او تر دې دمه هېڅ موندنه خپره شوې نه‌ده.

د بریټانیا دفاع وزارت د جمعې ورځې له غونډې مخکې د دې موضوع په اړه له څرګندونو ډډه کړې ده.