Connect with us

تازه خبرونه

د تاوتریخوالي د کمښت طرحې ځنې برخې په ډاګه شوې

Published

 on

(Last Updated On: کب ۱, ۱۳۹۸)

له آریانانیوز سره ځینو سرچینو د تاوتریخوالي د کمې طرحې ځینې برخې  شریکې کړي، چې له مخې یې؛ د طالبانو بریدونه په ورځ کې له ۷۵ څخه ۱۵ ته را ټیټیږي او پر ښارونو، لویو لارو، امریکایي اډو او د افغان ځواکونو پر مرکزونو به بریدونه نه کوي.

افغان ځواکونه او طالبان د تاوتریخوالي د کمي، خلک د امریکا او طالبانو تر منځ د سولې هوکړه لیک لاسلیک او د افغانانو خپلمنځي خبرو ته په تمه دي. که څه هم د تاوتریخوالي د کمي بشپړ وخت ندی ښکاره شوی.

یو شمېر سرچینو له آریانا نیوز سره د دې طرحې ځینې برخې شریکې کړي، چې افغان ځواکونه به په دې موده کې د تیارسئ په حال کې وي.

د دغې طرحې له مخې:

۱ – د طالبانو بریدونه په ورځ کې له ۷۵  څخه ۱۵ ته را ټیټیږي.

۲ – طالبان په ښارونو، لویو لارو، امریکایي اډو او د افغان ځواکونو پر مرکزونو بریدونه نه کوي.

۳ – افغان ځواکونه عملیات نکوي.

۴ – د ناټو پرېکنده ملاتړ ماموریت هیڅ عملیات نکوي؛ خو که پر افغان ځواکونو برید وشي، ملاتړ ته یې وردانګي.

۵ – د افغان او بهرنیو ځواکونو د څارنې یوه ډله جوړیږي، چې د طالبانو د ژمنو څارنه وکړي.

د سرغړونو د لیدو په صورت کې د طالبانو د دوحې له دفتر سره اړیکه نیول کیږي او افغان امنیتي او دفاعي ځواکونه د تیارسئ حال خپلوي، د طالبانو هر برید ته، چې د تاوتریخوالي د کمي مورد تر پښو لاندې کړي، ځواب ورکول کیږي.

د طالبانو د ډلې پخوانی غړی سید اکبر آغا ویلي؛ د تاوتریخوالي د کمښت ټاکلی وخت ښکاره ندی؛ خو کیدی شي ټاکنیزې ناندرې منفي اغېز ولري.                

ولسمشرۍ ماڼۍ د تاوتریخوالي د کمې طرحې په اړه څه ندي ویلي؛ خو له دې مخکې یې ویلي وه، چې امنیتي مسوولینو له سکات میلر سره په لیدنه کې د تاوتریخوالي د کمیدو پر طرحه کار پیل کړی.

پخواني پوځي عتیق الله امرخېل څرګنده کړې؛ د تاوتریخوالي کموالی بې معنا ده؛ جګړه معنا لري او اوربند هم بې معنا ندی.   

طالبانو تر دې دمه د دغې طرحې په اړه څه ندي ویلي.         

دا په داسې حال کې ده، چې د طالبانو د  قطر سیاسي دفتر ویاند سهیل شاهین له یوې رسنۍ سره په خبرو کې ویلي، چې په یوه یا دوه ورځو کې به د تاوتریخوالي د کمیدو او له امریکا سره د هوکړه لیک د لاسلیک نېټه ښکاره شي.

نوموړي زیاته کړې؛ له امریکا سره په هوکړه لیک کې دا ندي ویل شوي، چې له افغان دولت سره خبرې او اوربند ځای شوی ندی؛ یوازې د جګړې له ښکېلو خواوو سره د خبرو کولو یادونه شوې ده.

تازه خبرونه

هند په کابل کې خپلې سفارتي چارې بیا پیل کړې

Published

on

(Last Updated On: چنګاښ ۴, ۱۴۰۱)

هندي رسنیو څرګنده کړې، چې هند د پنجشنبې پر ورځ له لس میاشتني ځنډ وروسته د یوې تخنیکي ډلې پر استولو یو ځل بیا خپل سفارت په کابل کې پرانیست.

دا هڅه له هغې څو اوونۍ وروسته ترسره کیږي، چې د هند د بهرنیو چارو وزارت د لوړ پوړي چارواکي جې پي سینګ په مشرۍ یوه پلاوي کابل ته سفر وکړ او د اسلامي امارت له چارواکو سره یې وکتل.

د هند سفارت په کابل کې د اسلامي امارت له بیا واکمنېدو وروسته د روسیې، چین، پاکستان، ایران، ترکیې، قطر، سعودي عربستان، اندونیزیا، اروپايي ټولنې او د منځنۍ آسیا د څلور هېوادونو په ګډون پېنځلسم سفرت دی، چې په افغانستان کې پرانیستل کیږي.

هند په ډاګه کړې؛ د بشردوستانه مرستو د اغېزمنو رسولو، د بېلابېلو اړخونو د هڅو د نږدې څارنې او همغږي کولو او له افغانانو سره زمونږ د ښکېلتیا لپاره زمونږ یوه تخنیکي ډله نن کابل ته رسیدلې او په سفارت کې ځای پرځای شوې ده.

د بهرنیو چارو وزارت په دې ځرګندونه کې د دې پرېکړې لامل له افغانانو سره د هند تاریخي او مدني اړیکې ښودل شوې دي.

د افغانستان اسلامي امارت په کابل کې د خپل سفارت د بیا پرانستلو لپاره د هند له دې هڅې هرکلی کړی دی.

د افغانستان د بهرنیو چارو وزارت د ویاند مرستیال حافظ ضیا احمد له هند غوښتي، چې له افغانانو سره بشري مرستې روانې وساتي.

هند په داسې حال کې افغانستان ته د زلزله ځپلیو لپاره د مرستو لومړۍ ټولګه رالېږلې، چې ترې په خوست او پکتیکا له رامنځته شوي ناورینه له ۱۰۰۰ ډېر کسان وژل شوي او له زرګونه ډېر نور ټپیان دي.

د هند د بهرنیو چارو وزارت ویلي، چې دا مرسته د هندي ډلې لخوا، چې د هند د هوایي ځواک ایلیوشین ـ۷۶ په الوتکه کې سفر کوي؛ له تېر کال راپدیخوا لومړنۍ الوتنه ده.

دغه راز د افغانستان د کورنیو چارو وزارت په هند او نورو هېوادونو کې له روزل شویو افغان پوځيانو وغوښتل، چې هېواد ته راستانه شي او د خپلو خلکو خدمت وکړي.

د کورنیو چارو وزارت ټویټ کړی: په هند او نورو هېوادونو کې روزل شوي افغان زدکوونکي زمونږ د ملي ځواک کدرونه دي. د اسلامي امارت د کورنیو چارو وزارت چمتو دی، چې دغه فارغان د دوی د زدکړ او څانګې له مخې استخدام کړي. هیله ده، چې هېواد ته راستانه شي او خپلو خلکو ته خدمت وکړي.

Continue Reading

تازه خبرونه

د پکتیکا او خوست ولایتونو زلزله ځپلي د بیات بنیاد له مرستو برخمن شول

Published

on

(Last Updated On: چنګاښ ۴, ۱۴۰۱)

د پکتیکا او خوست ولایتونو زلزله ځپلیو ته د بیات بنیاد د خوراکي توکو، خېمو، کمبلو او درملو د مرستو رسېدلې ټولګې د دغه بنسټ د مسوولینو لخوا پر زیانمنو خلکو ووېشل شوې.

بیات بنیاد د مرستو د وېش تر څنګ د پکتیکا ګیان او د خوست سپیرې ولسوالیو اړوند سيمې ته خپل روغتيايي کارکوونکي لېږلي او له تېرو دوه ورځو راپدیخوا د  ټپيانو او ناروغانو درملنه کوي.

د بیات بنیاد د روغتیايي ډلې مسوول سمیع رحیمي وایي:  د بيات روغتيايي ټيم په خپل وخت راغلى او له دوه ورځو را پدیخوا د زرګونه ناروغانو درملنه کوو.

دغه راز د بیات بنیاد مرستندویه ډلې د خوست ولایت زلزله ځپلیو او زیانمنو کسانو ته د وریجې. اوړه، غوړي او د بېړنۍ سرپنا د وسایلو وېش پیل کړی دی.

د خوست د زلزلې یو ټپي عبدالسلام وایي: مونږ د بیات بنیاد له دغو مرستو مننه کوو، چې سپېرې ولسوالۍ ته راغلي او له مونږ سره یې مرسته وکړه. هیله من یوو، چې دغه راز مرستې روانې وساتل شي؛ ځکه د سیمې خلک پوره وځپل شول.

همدارنګه د افغان بېسیم مخابراتي شرکت تخنیکي ډلې هم زلزله ځپلیو سیمو ته رسېدلي، چې  زیانمنو سیمو ته بېړني مخابراتي خدمات ورسوي.

په خوست کې د بیات بنیاد مسوولینو په راتلونکیو ورځو کې د خوست او پکتیکا ولایتونو له زلزله ځپلیو سره د نورو مرستو ډاډ هم څرګند کړی دی.

بیات بنیاد له یوې لسیزې راپدیخوا په ټول هېواد کې د روغتیا، ښوونې او روزنې په برخو کې پر بنسټيزو چارو سر بېره په طبیعي پېښو کې له زیانمنو کسانو سره هم مرستې کوي.

Continue Reading

تازه خبرونه

په هرات کې د رسنيو او خبريالانو د څارنې او ملاتړ کمېټه جوړه شوه

Published

on

(Last Updated On: چنګاښ ۲, ۱۴۰۱)

د دې کمېټې اصلي موخه د بېلابېلو بنسټونو لخوا د خبريالانو او د رسنيو د کارکوونکیو د خپلسریو مخه نيول دي.

دغه کمېټه د هرات د رسنيو د ټولنې د اړتياوو پر بنسټ جوړه شوې، چې اطلاعاتو ته د لاسرسي حق او د خبريالانو او رسنيو د قضيو د څېړلو د څرنګوالي لپاره لازمې آسانتياوې برابرې کړي.

په دې کمیټه کې خبریالان، د استخباراتو او اطلاعاتو او فرهنګ ریاست غړي برخه لري.

د هرات د اطلاعاتو او فرهنګ ریاست ټینګار کوي، چې له دې وروسته هیڅ امنیتي اداره حق نلري، چې یو خبریال یا د رسنیو کارکوونکی پخپلسري ډول ونیسي او د خبریالانو ټولې دوسیې به د دغه ولایت د اطلاعاتو او فرهنګ ریاست په همکارۍ د یوې کمېټې له لارې وڅېړل شي.

په هرات کې د رسنیو د څارنې او ملاتړ کمیټې مسوول ولی شاه بهره وایي: زمونږ ټولیزې موخې درې اصول لري: لومړی، د غږیزو او ویډیويي رسنیو د نشراتو تنظیمول. دوه یم د رسنیو له حقونو څخه په بشپړه توګه ملاتړ او دفاع، چې قانون یې پر بېلابېلو بڼو ملاتړ کوي او درېیم، د سرغړونې کمېټه مکلفه ده، چې سرغړونې وارزوي او بیا ترې ژمنې واخلي.

د سيمه ييزو رسنيو مسوولين، د اطلاعاتو فرهنګ او استخباراتو رياستونه د رسنيو د څارنې او ساتنې د کمېټې مستقيم غړي دي او د هرات سيمه ييزه اداره ډاډ ورکوي، چې د رسنيو د کار او فعاليتونو د ملاتړ لپاره به هر ډول هڅې وکړي.

د هرات د اطلاعاتو او فرهنګ مشر نعیم الحق حقاني ویلي؛ ټول امنیتي ارګانونه، چې په هرات کې دي او ټول هغه ځایونه، چې په هرات پورې اړه لري؛ د دې کمېټې له جوړولو سره او هغه مسایل، چې په دې کمیټې پورې اړه لري، د دې پر ځای، چې د یوه دولتي ارګان لخوا تر پوښتنې لاندې ونیول شي، د هغوی جریان په مستقیمه توګه ارزول کیږي؛ کمېټۍ او د اطلاعاتو او فرهنګ رياست ته به خبر ورکول کيږي.

یو شمېر خبریالان د دې کمېټې جوړېدو ته خوښ دي او له حکومت غواړي، چې اطلاعاتو ته د لاسرسي په برخه کې دې آسانتیاوې برابرې کړي او د دې کمېټې په چوکاټ کې دې خبریالانو ته د کار څرنګوالي په برخه کې کار وکړي.

خبریال مرجان وفا وایي: په اوسنیو شرایطو کې له خبریالانو د ملاتړ کمېټه یو اړتیا ده او ګټه هم لري.

یو بل خبریال نذیراحمد هاشمي ویلي: خوښ یم، چې له رسنیو څخه د ملاتړ لومړنۍ کمېټه په هرات کې جوړه شوه او خوښ یوو، چې ستونزې مو حل کړي.

د کمېټې د مشرتابه د څرګندونو له مخې؛ دوى هڅه کوي، چې د اطلاعاتو او فرهنګ رياست په همکارۍ د رسنيو او خبريالانو د کاري بهير او فعاليت په برخه کې آسانتياوې رامنځته کړي.

Continue Reading

Trending

Copyright © 2022 Ariana News. All rights reserved!