د ALIPH ( د کلتوري میراثونو د ساتنې نړیوالې ټولنې یا الف نړیوالې ټولنې) استازو په کابل کې د اطلاعاتو او کلتور وزارت د کلتور او هنر له مرستیال عتیق الله عزیزي سره په لیدنه کې د دې وزارت فرهنګي هڅې ستایلي او د ګڼو فرهنګي پروژو د پيل او دوام ژمنه یې وکړه.

د اطلاعاتو او کلتور وزارت د خپرې شوې خبرپاڼې له مخې؛ نن( دوشنبه د غویي یوویشتمه ) د دې وزارت د کلتور او هنر له مرستیال مولوي عتیق الله عزیزي سره د الف نړیوال بنسټ استازو کارلوس اډوارډو او الکسانډرا فایبیګ او د آغا خان بنسټ د کلتوري برخې مسوول انجنیر میوندي ولیدل.

یادو استازو د لوګر ولایت د مس‌عینک سیمې د آثارو د خوندیتوب او تحکیماتي هڅو، په بامیان کې د یو شمېر پروژو، د غور ولایت منار جام د ساتنې، د هرات د منارونو، د کابل بالاحصار او په نورو ولایتونو کې د تر کار لاندې پروژو یادونه کړې او دا یې د پام وړ بللي دي.

د فرهنګ او هنر مرستیال عتیق الله عزیزي افغانستان ته د یاد بنسټ استازو له راتګ هرکلی کړی او د افغانستان د کلتوري او لرغونو میراثونو د پیاوړتیا او خوندیتوب په برخه کې یې د دې بنسټ هڅې او ملاتړ اړین وباله.

عزیزي ویلي؛ له لسیزو وروسته، په لومړي ځل داسې زمینه برابره شوې، چې د افغانستان د تاریخي آثارو، لرغونو سیمو او کلتوري میراثونو ساتنه وشي؛ نو له نړیوالو بنسټونو تمه ده، چې له سیاسي ملاحظاتو پرته د هېواد د کلتوري میراثونو او تاریخي ابداتو په استحکام او خوندیتوب کې اغېزمن رول ولوبوي.

ویل کیږي، چې د الف نړیوال بنسټ استازو د اطلاعاتو او کلتور وزارت سره د نږدې، منظم او اغېزمن کار او همغږۍ لپاره پر یو روښانه میکانیزم او چوکاټ رامنځته کولو ټینګار وکړ.

افغانستان له ازبکستان څخه غوښتي، چې د دواړو هېوادونو د خصوصي سکټورونو ترمنځ د سوداګریزو اړیکو د پیاوړتیا لپاره د ترمذ په سرحدي بازار کې د همغږۍ او اړیکو یو دفتر رامنځته کړي.

دغه موضوع د افغانستان د صنعت او سوداګرۍ وزارت د وزیر نورالدین عزیزی او د ازبکستان د قره‌قالپاقستان د عالي شورا د رییس امانبای اورینبایوف ترمنځ په مزارشریف ښار کې د لیدنې پر مهال وړاندې شوې ده.

په دې لیدنه کې دواړو لوریو د پنبې، ډبرو سکرو، د افغانستان د تازه او وچو مېوو د صادراتو او د خوراکي توکو د تولید، ساختماني توکو، ګرځندوی، د درملو تولید، د معدني توکو پروسس او په مهمو اقتصادي برخو کې د ګډو پروژو په اړه خبرې وکړې.

ازبک چارواکو خبر ورکړی، چې د صادراتو د ملاتړ او سیمه‌ییزو بازارونو ته د ښه لاسرسي لپاره به په روسیه، قزاقستان او قرغېزستان کې د سوداګرۍ خونې جوړې کړي.

ویل کیږي، چې ازبک پلاوي د خپل سفر پر مهال په مزارشریف ښار کې د خپل هېواد د ملي تولیداتو یو نندارتون هم پرانیستی دی.

په کابل کې د جاپان سفارت د ۲۰۲۷ ز.کال لپاره نوي تحصیلي بورسونه اعلان کړي دي. ورته لېواله او وړ غوښتونکي کولی شي«په جاپان کې زده‌کړې» له رسمي اوب‌پاڼې څخه اړوند لارښوونې او د غوښتنلیک فورمې ډانلوډ او خپل غوښتنلیکونه د ۲۰۲۶ ز.کال د مې تر پېنځه‌ویشتمې پورې ورولېږي.

په کابل کې د ۲۰۲۶ ز.کال د جون پر اته‌لسمه لیکلې آزموینه اخیستل کیږي او وروسته به د جولای په میاشت کې ورسره مرکه وشي.

د جاپان سفارت ویلي، چې د آقاخان بنسټ به د غوښتنلیکونو په راټولولو او د لیکلې آزموینې په آسانولو کې مرسته وکړي؛ خو د غوراوي په بهیر کې به هیڅ راز ښکېلتیا ونه‌لري.

یاد سفارت دا ټینګار هم کړی، چې غوراوی په خپلواکه توګه د جاپان سفارت او حکومت له‌خوا، د تحصیلي وړتیا، د غوښتنلیک د اسنادو څرنګوالي او د لیکلې آزموینې او مرکې د پایلو پر بنسټ؛ پرته له دې، چې مذهبي، ژبني یا قومي مخینې ته پاملرنه وشي، ترسره کېږي.

د جاپان سفارت غوښتونکو ته خبرداری ورکړی، چې له درغلیو ځان وساتي او ډاډ څرګندوي، چې د غوښتنلیک په هیڅ پړاو کې د پیسو ورکولو ته اړتیا نشته.