د ریاست‌الوزرا اقتصادي مرستیال ملا عبدالغني برادر نن دوشنبه( د غویي اوومه) په جوزجان ولایت کې د  یتیم‌تاق د سمنټو د تولیدي کارخونې د جوړولو کار پرانیست.

په دې مراسمو کې ملا برادر ټینګار وکړ، چې د کورني صنعت پیاوړتیا او له کورنیو تولیداتو ملاتړ د افغانستان د اقتصادي ودې بنسټیزه برخه ده او هېواد ورو ورو له تولیدي اقتصاد سره مخ کوي.

هغه وویل، د دې سترې صنعتي پروژې پیل د کورني تولید د ظرفیت د پراختیا، پر وارداتو د تکیا کمولو او د دوامداره اقتصادي پرمختګ د ترویج لپاره د پرله‌پسې هڅو ښکارندویي کوي.

د نوموړي د څرګندونو له مخې: د اسلامي امارت اقتصادي پالیسي پر کورنيو تولیدات راڅرخیږي او خام مواد د دې پر ځای، چې بې‌پروسسه صادر شي؛ په هېواد کې دننه پروسس شي.

ملا برادر همدارنګه له نړیوالې ټولنې وغوښتل؛ له افغانستان سره اقتصادي تعامل له رسمي لارو پیاوړی کړي او هغه څه یې، چې د هېواد د امنیتي وضعیت ښه‌والی، سیاسي ثبات او نه‌کارېدلي اقتصادي فرصتونه وبلل، وځلول.

هغه خبرداری ورکړ، چې د نړیوالې اقتصادي همکارۍ محدودول، د انزوا پالیسۍ تعقیبول او د بندیزونو اوږدېدل نه یوازې نړیوالې اقتصادي ستونزې نه حلوي، بلکې نوي خطرونه هم رامنځته کوي او سیمه‌ییزې او نړیوالې همکارۍ کمزورې کوي.

نوموړي هېوادوالو ته د دې پروژې د پیل مبارکي وویله او له اړوند مسوولانو او قراردادي شرکت څخه یې وغوښتل، چې د لوړ کیفیت لرونکی کار او پر وخت بشپړول یقیني کړي.

ویل کېږي، چې د یتیم‌تاق د سمنټو کارخونه د ۱۶۰ میلیون ډالرو پر پانګونه د یوه ترکي شرکت له لوري جوړېږي. تمه ده، چې له بشپړېدا وروسته به دغه کارخونه هره ورځ ۳۰۰۰ ټنه سمنټ تولید او شاوخوا ۵۰۰۰ مستقیم او غیرمستقیم کاري فرصتونه به رامنځته کړي. دا پروژه به په دوه کلونو کې بشپړه شي.

د اسلامي امارت پوهنې وزیر حبیب‌الله آغا ویلي، چې په اوسنۍ زمانه کې د کلاشینکوف او ژېړو بشکو پر کارولو د دښمن پر وړاندې دفاع شونې نه‌ده.

هغه د یکشنبې پر ورځ په بامیان ولایت کې یوې غونډې ته ویلي، چې پر ژېړو بشکو یوازې هغه وخت دفاع کېدی شي، چې دښمن د هېواد په خاوره کې شتون ولري.

نوموړی وایي: «که دښمن په سمندر یا بل ځای کې وي او له هغه ځایه توغندي وتوغوي یا د الوتکو پر مټ مونږ بمبارډ کړي؛ نو دفاعي تجهیزات باید مونږ خپله جوړ کړو.»

د پوهنې وزیر زیاته کړې؛ ایران داسې دفاعي سیسټم جوړ کړی، چې امریکا یې پر وړاندې پاتې راغلې ده.

هغه دا ټینګار هم وکړ؛ د مسلمانانو ترمنځ نفاق دومره ډېر شوی، چې ځینې یې د ایران پر ضد په جګړه کې له امریکا سره همکاري کوي.