تازه خبرونه
په ننګرهار کې ناامنیو د زدکړو بهیر ټکنی کړی
مسوولین وايي؛ دمګړۍ په اچین کې دولس، په هسکه مینې کې اته، په نازیانو کې شپږ، په خوږیاڼيو کې لس، په بټيکوټ کې دوه، په مومندره کې اته او په حصارک کې درې ښوونځي د ناامنیو له وېرې تړل شوي دي.
ننګرهار یو وخت د علم کور و؛ خو اوس په همدې کور کې د علم مخنیوی د داعش ستره موخه ده. په ښار او ولسوالیو کې پر ښوونځيو او پوهنیزو مرکزونو د داعش د جنګیالیو پرله پسې بریدونو د زدکړې بهیر ټکنی کړی؛ ښوونکي او زدکوونکي له وېرې ښوونځيو ته نه ځي او ښوونکي د امنیت په ټنګښت کې له حکومته ګیله من شويدي.
ښوونکی داد آقا شریف یار وایي، چې یو ځل ایمل خان لیسه وسوځول شوه بیا نه یوازې د ملکیار هوتک لیسه وسوځول شوه، بلکې له درې چپړاسیانو(ملازمانو) یې سرونه هم پرې شول.
یو بل ښوونکی نثاراحمد وایي؛ په ښار کې د پوهنې پر مدیریت ډله ییزبرید وشو او د ولسوالیو مدیریتونو ته ګواښونه شوی، دې کار ښوونکي او زدکوونکي وېرولي او ښوونځیو ته یې د تګ مخنیوی کیږي.
د ننګرهار لیسې مدیر څرګندوي؛ د ننګرهار معارف د سقوط خوا ته روان دی؛ خو امنیتي بنسټونه لازم اقدامات نه کوي.
د ننګرهار لیسې مدیر شېربهادرخان وایي؛ د پوهنې په اړه امنیتي چارواکو کمزوری دریځ نیولی، چې په دې توګه د پوهنې بهیر نه یوازې په مرکز، بلکي ولسوالیو کې هم ټکنی شوی دی.
دیني عالمان هم پر دې کار سخت خوابدي دي او وايي، پراهل معارف برید د انسانیت او اسلامیت خلاف دی.
دیني عالم مولوي عبدالستارخان وایي؛ ښوونکي تر فشار لاندې دي، چې یا الله پر ما او پر زدکوونکیو به څه کیږي؟ که اسلامي ارشاداتو ته پاملرنه وکړو، نو د الله نبي ویلي، چې زه تاسې ته معلم رالیږل شوی یم او الله پاک هم خپل خوږ نبي ته رسول، نبي او معلم خطاب کړی دی.
د ننګرهار د پوهنې رييس هم دې حالت اندېښمن کړی؛ خو وايي، د خلکو له همکارۍ پرته ستونزه نه حلېږي.
د ننګرهار د پوهنې رييس حسیب الله شینواری وایي؛ اوسني حالت د ټول ولایت خلک اندېښمن کړي. مونږ هڅه کوو، چې خلک د ښوونځیو ساتنې ته وهڅوو. د ولسونو له همکارۍ پرته به دا ناممکنه وي، چې ښوونځي او ادارې وساتل شي.
د یادونې وړ ده، چې په تېرو دوه میاشتو کې اته ښوونځي سوځول شوي او پرلس پوهنیزو مرکزونو وسلوالو بریدګرو بریدونه کړي دي. دغلته شاوخوا یو نیم سل زره زدکوونکي د بېلابيلو ستونزو له امله له زدکړو بې برخې پاتې دي.
دا په داسې حال کې ده، چې د شنبې پر شپه په بټیکوټ کې د کفتان بابا منځنی ښوونځی هم سوځول شوی دی.
خبریال: رحمت الله زیارمل
تازه خبرونه
سعودي عربستان ته د افغان حاجیانو د لېږد بهیر پیل شو
د ارشاد، حج او اوقافو وزارت چارسمبالي نور محمد ثاقب ويلي، چې له افغانستان څخه سعودي عربستان ته د حاجیانو د لېږد بهیر پیل شوی دی.
د نورمحمد ثاقب د څرګندونو له مخې؛ تېره شپه (چارشنبه د غویي نولسمه) شاوخوا ۲۳۰ حاجیان په لومړۍ الوتنه کې مدینې منورې ته ولېږدول شول.
نوموړي د افغان حاجيانو د لومړي کاروان د لېږد په مراسمو کې ويلي، چې سږ کال يې حج کوونکیو ته د غوره خدمتونو د وړاندې کولو لپاره د نورو کلونو په پرتله د کاري کمیټې کارکوونکي سعودي عربستان ته مخکې لېږلي دي.
دغه راز د ریاست الوزراء اداري مرستیال عبدالسلام حنفي په دې مراسمو کې حاجیانو ته په خطاب کې ویلي: ګرانو حاجیانو! تاسې په سعودي عربستان کې د افغانانو استازي یاست؛ نو دغه استازیتوب په ښه توګه ترسره کړئ.
عبدالسلام حنفي زیاته کړې؛ د ارشاد، حج او اوقافو وزارت په هلو ځلو تېرو کلونو ته ورته سږ کال هم د حج ټول فعالیتونه په منظم ډول ترسره شوي دي.
له دې مخکې د حج او اوقافو وزارت اعلان کړی و، چې سږ کال سعودي عربستان افغان حاجیانو ته ۳۰ زره سهمیه ورکړې ده.
ویل کیږي، چې آریانا افغان او کام ایر شرکتونو ته سږکال هم د افغان حاجیانو د لېږد او راستنولو مسوولیت سپارل شوی دی.
تازه خبرونه
امیرخان متقي په کابل کې د ملګرو ملتونو له ۲۱ کسیز پلاوي سره وکتل
د بهرنیو چارو وزارت چارسمبالي امیرخان متقي د ملګرو ملتونو مالي او اداري مشورتي کمیټې له ۲۱ کسیز پلاوی سره، چې کابل ته د لومړیتوبونو د څېړلو لپاره راغلی؛ په کتنه کې ویلي: اسلامي امارت نهغواړي، چې افغانستان د ډېر وخت لپاره پر بشردوستانه مرستو تکیه وکړي او دا مرستې باید اوس پر کار، کورنیو تولیداتو او صنایعو ولګول شي.
د دغې کمیټې مشر بچار بونګ عبدالله له امیر خان متقي سره په خبرو کې ویلي، چې کابل ته د دوی د سفر موخه په افغانستان کې د یوناما د چارو ارزونه ده او دوی غواړي، چې د افغان لوري لومړیتوبونه وڅېړي او د ملګرو ملتونو عمومي ناستې ته یې وړاندې کړي.
امیرخان متقي د منځنۍ سوداګرۍ وده، پراختیایي پروژو ته پاملرنه، د کروندګرو لپاره د بدیل کښت برابرولو او په بشري مرستو پورې محدود نهپاتې کیدل مهم لومړیتوبونه وګڼل او څرګندوي، چې له څو کلنو جګړو او بې ثباتیو وروسته د ټاپي پروژې، کاسا -۱۰۰۰، افغان ټرانس اورګاډي پټلۍ سترو پرژو عملي کېدو ته زمینه برابره ده.
په دې اړه د بهرنیو چارو وزارت په خبرپاڼه کې رغلي: مرستې بايد په داسې ډول ولګول شي، چې خلکو ته کار پيدا شي، کورني توليدات او صنعت وده وکړي او افغانستان له خپلو بازارونو څخه خپلې اړتياوې پوره کړي او د افغانستان د خصوصي سکټور ملاتړ رامنځته شي. دغه راز د کروندګرو لپاره بدیل کښت برابر او د وړو کسبونو ملاتړ وشي.
د بهرنیو چارو وزارت چارسمبالي زیاته کړې؛ اسلامي امارت نه غواړي، چې په اوږدمهاله بشري مرستو تکیه وکړي، بلکې غواړي د افغانستان ملي اقتصاد پخپلو پښو ودریږي.
د دغې کمیټې غړیو په بېلا بېلو برخو کې د اسلامي امارت لاسته راوړنې وستایلې او څرګندوي، چې په پام کې لري د وضعیت د ارزونې لپاره د افغانستان یو شمېر ولایتونو ته هم سفر وکړي.
افغانستان ته د ملګرو ملتونو د دغه پلاوي سفر په داسې حال کې ترسره کېږي، چې په تېرو درې کلونو کې نړيوالو مرستندويه سازمانونو په افغانستان کې د بېوزلۍ د کچې د زياتوالي او پراخېدو او د مرستو لپاره د بودجې کموالي په اړه څو ځلې خبردارى ورکړى دی.
تازه خبرونه
په بدخشان ولایت کې ماین چاودنې ۸ کسانو ته مرګ او ژوبله اړولې
کورنیو چارو وزارت تائید کړې، چې په بدخشان ولایت کې د یوه نښلېدونکي ماین په چاودنه کې ۳ امنیتي سرتېري وژل شوي او ۵ نور ټپیان دي.
د کورنیو چارو وزارت ویاند عبدالمتین قانع وايي: له بده مرغه نن له غرمې مخکې شاوخوا ۱۱ بجې د بدخشان ولایت د فیضآباد ښار د جوزون په اړوند سیمه کې پر موټرسایکل نښلول شوي ماین چاودنه کړې ده.
د عبدالمتین قانع زیاته کړې؛ دغه ماين هغه مهال چاودنه وکړه، چې د پوليسو د موټرو یو کاروان له ياد سړک څخه د کوکنارو د کښت د له منځه وړلو لپاره له سیمې څخه د تېرېدو په حال کې و.
ده زياته کړې، چې دغه پېښه د پوليسو تر څېړنې لاندې ده.
تر اوسه کومې ډلې یا شخص د دې پېښې مسوولیت پر غاړه ندی اخیستی.
-
تازه خبرونه4 days ago
په غور کې د سېلابونو له کبله سلګونه خلک بې ځایه شول
-
تازه خبرونه4 days ago
اسلامي امارت په بدخشان کې د اعتراضي لاريون د څېړلو لپاره یو پلاوي وټاکه
-
تازه خبرونه4 days ago
په افغانستان کې پر کوکنارو د بندیز له کبله کروندګرو خپل عاید له لاسه ورکړی – نړیوال بانک
-
نړۍ1 day ago
حماس او اسرائیل کولی شي په غزه کې د اوربند په اړه واټن راکم کړي – امریکا
-
تازه خبرونه1 day ago
د پاکستان خاوره د افغانستان پر ضد کارول کیږي
-
نړۍ3 days ago
اسرائیلي ځواکونو بیت المقدس ته نږدې د الجزیرې پر رسنیز دفتر چاپه ووهله
-
تازه خبرونه24 hours ago
د سې شنبې پر ورځ خراسان او سرخ پوشان لوبډلو لوبه وګټله
-
تازه خبرونه3 days ago
د اسلامي همکاریو ټولنې سرمشریزې په افغانستان کې د نجونو پر زدهکړو ټینګار څرګند کړ