Connect with us

سیمه ییز خبرونه

اسلامي امارت په رستورانتونو او پارکونو کې د جنسیتي توپیر موضوع رد کړه

Published

 on

(Last Updated On: غویی ۲۵, ۱۴۰۱)

د اسلامي امارت د امربالمعروف او نهی عن المنکر وزارت د هرات په رستورانتونو کې د جنسیتي توپیر موضوع رد کړه.

په دې وروستیو کې داسې ګنګوسي وه، چې د هرات ولایت د امربالمعرف او نهی عن المنکر ریاست یو شمېر کارکوونکي په ښار کې رستورانتونو ته ورغلي، چې د جنسیت توپیر باید وشي او حتی یوه جوړه هم په رستورانت کې په ګډه ډوډۍ نشي خوړلی؛ خو اوس د هرات ولایت یوشمېر سیمه ییز چارواکي وايي، چې دا یوه تېر وتنه وه او هیڅوک نشي کولی، چې کورنۍ په رستورانتونو او پارکونو کې له یوځای کیدو څخه منع کړي.

د رستورانت مدیر بصیر احمد احمدي ویلي: کله، چې دوی له خپلو کورنیو سره راځي؛ مونږ باید کورنۍ ته ووایو، چې جلا کېني. دا کار په زړه پورې ندی او کله، چې مونږ کورنیو ته داسپارښتنه وکړو؛ هغوی وايي، چې مونږ دا رنګه خوراک په کورونو کې کولی شو او ځي.

په هرات کې د یوه رستورانت کارکوونکی جاوید توانګر ویلي: له نېکه مرغه له هغې وروسته، چې په کابل کې د امربالمعرف او نهی عن المنکر وزارت  غبرګون وښود؛ د بندیزونو مسله بېرته عادي حالت ته راګرزېدلې او رستورانتونه کولی شي کورنیو ته اجازه ورکړي، چې بیا یوځای خواړه وخوري.

د یاد وزارت ویاند عاکف مهاجر په دې اړه په خپل غبرګون کې څرګنده کړې؛ دا موضوع په بشپړه توګه رد شوې او هیڅوک حق نلري، چې له کوره بهر د کورنیو د وتلو مخه ونیسي.

عاکف مهاجر زیاته کړې: زمونږ هېوادوال کولی شي له خپلو کورنیو سره هوټلونو او رستورانتونو ته ولاړ شي؛ ډوډۍ وخوري او چای وڅښي او یا له خپلو کورنیو سره پېرودلو ته ولاړ شي، دا بې بنسټه خبره ده.

له بلې خوا د هرات یو شمېر سیمه ییزو چارواکو هم ویلي، چې له هیڅ ادرسه دا ډول امر ندی صادر شوی او کورنۍ کولی شي په آسانۍ دمځي او رستورانتونه د ناستې او ګرزېدو لپاره وکاروي.

د هرات د اطلاعاتو او فرهنګ مشر نعیم الحق حقاني ویلي: مونږ دا خبره په کلکه ردوو او دا حقیقت نلري.

د هرات اوسېدونکې نګینه بارک وایي: د میز په شاوخوا کې ناست او له کورنۍ سره خواړه خوړل د اسلامي نظر یا د ټولنې له دود سره کومه ستونزه نده؛ خو دا د کورنیو هڅولو او په ټولنه کې د دوی د ښکېلتیا لپاره ګټور کیدی شي.

د یادونې ده، چې له یو لړ ټولنيزو پديدو سره د امربالمعرف او نهی عن المنکر وزارت د کارکوونکیو چلند او په ټولنه کې د خلکو محدوديتونو یو لړ غږونه او ټینګارونه راپورته کړي دي.

سیمه ییز خبرونه

ننګرهار کې ماین چاودنې ۳۰ کسانو ته مرګ و ژوبله اړولې

Published

on

(Last Updated On: غبرګولى ۳۰, ۱۴۰۱)

د ننګرهار ولایت د غني خېل ولسوال څرګنده کړې؛ نن سهار ۹ بجې د یادې ولسوالۍ په شېرګړ بازار کې د ولسوالۍ د روغتيا د برخې د مدیر پر کرولا ډوله موټر نښلېدونکي ماین چاودنه کړې.

د ننګرهار ولایت د غني خېل ولسوالۍ ولسوال مولوي صدیق الله ویلي، چې په دې چاودنه کې دوه ملکي وګړي وژل شوي او د اسلامي امارت د پېنځه سرتېرو په ګډون اته ویشت کسان ټپیان دي.

ولسوال زیاته کړې؛ ټپیان د درملنې لپاره ننګرهار حوزوي روغتون ته لېږدول شوي او روغتیایي حالت یې د ډاډ وړ ښودل شوی دی.

په کابل کې د یوناما دفتر دا برید غندلی او څرګندوي، چې دا چاودنه په یوه بازار کې رامنځته شوې او د ماشومانو په ګډون یې ملکي وګړي زیانمن کړي دي.

دغه بنسټ پر ملکي وګړیو د پرلپسې بریدو نو د درولو غوښتنه کړې ده.

د یادونې ده، چې د يادې پېښې پړه تر دې دمه چا پرغاړه نده اخستې.

Continue Reading

سیمه ییز خبرونه

په بدخشان ولايت کې سيلابونو مالي زيانونه رامنځته کړي

Published

on

(Last Updated On: غبرګولى ۲۶, ۱۴۰۱)

د بدخشان ولایت سیمه ییزو چارواکو تائید کړه، چې نن په دغه ولایت کې سیلابونو د زیباک ولسوالۍ  خلکو ته پراخ مالي زیانونه اړولي دي.

د زیباک ولسوالۍ د پراختيايي شورا مشر فضل احمد فيضي ویلي؛ ګلخانه، ډنډ، دشت خان، نوآباد او خالخان د دې ولسوالۍ هغه سيمې دي، چې تر ټولو ډېرې زيانمنې شوې دي.

هغه وایي: دغه سيلابونه د سختو بارانونو له کبله رامنځته شوي دي.

فيضي باختر آژانس ته په ډاګه کړې: دغو سيلابونو ٤٤ هکتاره کرنيزه ځمکه، کښتونه، اته کورونه، د اوبو لګولو ډنډونه او هغه سړک، چې دوه کلي سره نښلوي زيانمن کړي دي.

د چارواکو په خبره په سیلابونو کې د اړوند کلیو څاروي هم مردار شوي دي.

Continue Reading

سیمه ییز خبرونه

په بدخشان ولایت کې د طبیعي ډبرو او منرالونو د پروسس او پلور مرکز جوړ شو

Published

on

(Last Updated On: غبرګولى ۲۴, ۱۴۰۱)

په بدخشان ولایت کې د لومړي ځل لپاره د صنایعو او کانونو خونه او همدارنګه د طبیعي ډبرو او منرالونو د پروسس او پلور مرکز جوړ شو.

د اقتصاد وزارت د چارسمبالی قاري دين محمد حنيف پر مشرۍ یو پلاوي د صنایعو او کانونو خونې او د قیمتي ډبرو د پروسس او پلور د مرکز د پرانستلو په موخه بدخشان ته تللی دی.

قاري دين محمد حنيف وايي؛ په تېرو کلونو کې ميلياردونه ډالر بیځایه لګول شوي او هیڅ داسې کار ندی شوي، چې افغانستان له اقتصادي انحصاره خلاص کړي.

دی وايي، چې افغانستان هر کال یوازې د برښنا له درکه ۳۴۰ میلیون ډالره نورو هېوادونو ته ورکوي. د دغه مرکز له جوړېدو څخه مو موخه ملي او نړیوالو بازارونو ته د قیمتي او نیمه قیمتي ډبرو چمتو کول او پروسس کول دي.

د اقتصاد وزارت چارسمبالي قاري دین محمد حنیف د دغه مرکز د پرانېستې پر مهال څرګنده کړه: سره له دې، چې په تېرو کلونو کې میلیونونه ډالر افغانستان ته راغلل؛ خو افغانستان له اقتصادي انحصاره خلاص نشو او هیڅ بنسټیز کار ندی شوی.

د سوداګرۍ او صنایعو خونې اجرائیوي مشر رحیم الله سمندر ويلي، چې بدخشان لسګونه ډوله قیمتي ډبرې او طبیعي کانونه لري، چې د دغه مرکز له جوړېدو سره به قیمتي ډبرې پروسس او په ملي او نړیوالو بازارونو کې به پلور ته وړاندې شي.

د بدخشان خلک هم هیله لري، چې د دغه مرکز له جوړیدو او د طبیعي زیرمو په ځانګړي توګه د قیمتي ډبرو استخراج سره به دوی ته د کار او روزګار ډاډمنه زمینه هم برابره شي.

بدخشان ولایت د طبیعي زیرمو له پلوه بډای ولایت دی، چې په تېرو څو لسیزو کې سیمه ییز چارواکي د دغو زیرمو په ناقانونه استخراج او بهرنیو هېوادونو ته پر قاچاق تورن شوي دي.

Continue Reading

Trending

Copyright © 2022 Ariana News. All rights reserved!