سوداگري
افغانستان او پاکستان د یوه نوي سوداګریز دهلیز پر پرانیستلو غور کوي

د ايکسپريس تريبيون خبري آژانس د راپور له مخې؛ شونې ده، چې د پاکستان او افغانستان اړوند چارواکي د سوداګریزې ودې او پراختیا لپاره پر ځمکني هوايي دهلېز پرانیستلو هوکړه وکړي.
دواړو خواوو د افغانستان او پاکستان د اپتا ترانزیتي سوداګرۍ ته د دې بڼې د ورزیاتولو وړاندیز کړی دی.
د لومړي وزیر شهباز شریف په مشرۍ د کابینې غونډې ته په وروستي ناسته کې د پاکستان د سوداګرۍ وزارت څرګنده کړې، چې د ۲۰۱۰ اپتا ترانزیتي تړون له هوا څخه ځمکې ته څو سوداګريزې بڼې تر پوښښ لاندې نه راولي.
په هر حال د اپتا ۲۰۲۱ رغول شوې هوکړه به دا تر پوښښ لاندې راولي؛ خو تر اوسه لاسلیک شوی نه دی.
د پاکستان د سوداګرۍ وزارت کابل ته د بشردوستانه مرستو د پرلپسې رسولو د آسانتیا لپاره د اسلام آباد له هوايي ډګر څخه هوايي لېږد تر سره کړی او هم یې د تورخم او غلام خان بندر له لارې د بار وړونکیو موټرو د لېږد لپاره له کابینې څخه د تصویب غوښتنه کړې ده.
د پاکستان د عوایدو فدرالي بورد د سوداګرۍ وزارت ته وړاندیز وکړ، چې د نړۍ له ګوټ ګوټ څخه د افغانستان د وارداتو او د پاکستان د نړیوالو هوایي ډګرونو له لارې د صادراتو لپاره د څو بڼو هوایي دهلیز اجازه ورکړي.
ایکسپریس تریبیون ویلي، چې د دغه دهلیز پرانیستل به د پاکستان په اقتصادي پرمختګ کې د پام وړ مرسته وکړي.
سوداگري
د نړیوالې ټولنې میلیاردونو دالرو مرستې د افغانیو په ارزښت ساتلو کې مرسته کړې – بلومبرګ

امریکايي انلاین خپرونې بلومبرګ نن(سې شنبه د تلې ۴ ) خبر ورکړ، چې افغانستان ته د نړیوالې ټولنې د بشري مرستو میلیاردونو دالرو تګ د دې لامل شوی، چې افغانۍ د بهرنیو اسعارو په ځانګړي توګه د دالرو پر وړاندې خپل ارزښت وساتي.
د یادې رسنۍ د څرګندونو له مخې، د افغانستان له ګاونډ هېوادونو سره د سوداګرۍ زیاتېدو هم د افغانیو د بیې له ثبات سره مرسته کړې ده.
بلومبرګ لیکلي، چې د پاکستانۍ کلدارو او امریکايي دالرو پر کارولو بندیز، د انلاین سوداګرۍ بندولو او له هېواده د دالرو د ایستلو بندېدا هغه نور لاملونه دي، چې د افغانیو ارزښت یې ساتلی دی.
دا مهال د افغانستان په بازارونو کې یو امریکايي دالر شاوخوا ۸۰ افغانۍ تبادله کېږي.
دا په داسې حال کې ده، چې د اسلامي امارت له واکمنۍ وروسته نړیواله ټولنه هره اوونۍ افغانستان ته له څلوېښت میلیون دالرو ډېره نغدي بشري مرسته رسوي.
تازه خبرونه
په مرمرینه ماڼۍ کې له صنعت او صنعتکارانو څخه د ملاتړ ناسته ترسره شوه

د ریاست الوزراء اقتصادي معاونیت د مقام پر مشرۍ د مالیې، کورنیو چارو، صنعت او سوداګرۍ او اقتصاد وزارتونو، د استخباراتو لوی ریاست او خصوصي سکتور پر غړیتوب له صنعت او صنعتکارانو څخه د ملاتړ لپاره ځانګړې غونډه ترسره شوه.
د ریاست الوزراء د اقتصادي مرستیالۍ د دفتر د څرګندونو له مخې؛ په دغه غونډه کې پرېکړه وشوه، چې د افغانستان د صنعت او معدن خونه به کورني تولیدات د رسمي لیک له لارې د تعرفې کمیتې ته ور معرفي کوي. د استخباراتو لوی ریاست، د خواړو او درملو او نورم او ستندرد ادارو پر غړیتوب به د تعرفې کمیته د معرفي شویو کورنیو تولیداتو د کیفیت، کمیت او قیمت له تثبیت وروسته د ځان بسیاینې په اندازه پر دغو وارداتي اموالو تعرفه لوړوي او راپور به یې د ریاست الوزراء اقتصادي معاونیت ته ورکوي.
همدارنګه په غونډه کې پرېکړه وشوه، چې ټولې امارتي ادارې دې د کورنیو تولیداتو او محصولاتو د ملاتړ لپاره په خپلو خریداریو او تدارکاتي پروسو کې کورنیو تولیداتو او محصولاتو ته لومړیتوب ورکړي. که څه هم کیفیت یې د بهرنیو تولیداتو او محصولاتو پر پرتله له لس تر پېنځلس سلنې ټیټ وي.
دغه راز د صنعت او سوداګرۍ وزارت ته دنده وسپارل شوه، چې د سوداګریزو نومونو، مارکو او براندونو او په هغو کې د جعل او تزویر د مخنیوي په اړه دې اسناد او وړاندیزونه د ریاستالوزراء اقتصادي معاونیت ته د وروستۍ پرېکړې لپاره راوليږي.
سوداگري
د افغانستان او جنوبي آسیا د ترانسپورتي لارو پراختیا ته چمتووالی لرو – روسیه

د روسیې لومړي وزیر میخایل میشوستین څرګنده کړې؛ هېواد یې چمتو دی، چې افغانستان او جنوبي آسیا ته د ترانسپورتي لارو په ګډون د اورآسیا ترانسپورتي لارې پراخې کړي.
د انترفاکس خبري اژانس د خبر له مخې؛ میشوستین د دوشنبې پر ورځ د ازبکستان له صدراعظم سره په کتنه کې ویلي: د شمال-جنوب د نړیوال دهلیز د پراختیا پر لوري مو راتلونکي ګامونه لومړیتوب لري. دا پروژه د مالونو او کالیو د لېږد رالېږد لپاره کولی شي له سویز کانال سره سیالي وکړي او پلي کول به یې د پروژې د ټولو برخهوالو ترمنځ سوداګریزې او اقتصادي همکارۍ زیاتې کړي.
هغه زیاته کړې: په دې برخه کې، مونږ چمتو یوو، چې د افغانستان او سویلي آسیا د لارو په ګډون د اورآسیا د ټولو ترانسپورتي لارو پر پراختیا راوڅرخیږو.
میشوستین د روسیې او ازبکستان ترمنځ د ترانسپورت د پوره نښلونې او په ټولیزه توګه د اورآشیا د ګډې فضا په اړه په خبرو کې ویلي، چې د ازبکستان لپاره د اوسپنې پټلۍ له لارې ترانسپورتي پراختیا د هراړخیزو همکاریو د پروګرام د مسودې یو مهم هدف دی.
هغه زیاته کړې: روسي پانګهاچوونکي چمتو دي، چې د هوايي ډګرونو د بېخبناوو په ښه کولو کې مرسته وکړي.
له بلې خوا د ازبکستان لومړي وزیر عبدالله اریپوف ویلي، چې د نويو نړیوالو ترانسپورتي دهلیزونو پراختیا به ښو بازارونو ته د لاسرسي زمینه هم برابره کړي.
هغه زیاته کړه: مونږ د اورآشیا په وچه کې د شمال-جنوب له نړیوال دهلیز پر پراختیا او اهمیت ټینګار کوو. مونږ لیواله یوو، چې د بیلاروس، روسیې، قزاقستان، ازبکستان، افغانستان او پاکستان ترمنځ ګډ څو وجهي ترانسپورتي دهلیز پیل کړو.
د یادونې ده، چې د دې نوښت یو اړخ د افغانستان په ترانسپورتي دهلیز کې د اوسپنېپټلۍ جوړول دي.
-
روغتيا3 days ago
له خوګ څخه انسان ته د زړه دوهیم پیوند ترسره شو
-
نړۍ4 days ago
د اوکراین زیلینسکي دې د پولندیانو سپکاوی نهکوي – د پولند لومړی وزیر
-
تازه خبرونه3 days ago
د افغانانو د حقونو ساتونکي دې متحد شي – رینا امیري
-
روغتيا1 day ago
په ټول افغانستان کې د ګوزڼ واکسین کمپاین پیل شو
-
تازه خبرونه2 days ago
د چین په اسیایي لوبو کې ۸۴ افغان لوبغاړي ګډون کوي
-
لوبی1 day ago
چين د اسيايي لوبو په لومړۍ ورځ د سرو زرو مډالونه وګټل
-
لوبی2 days ago
د ۲۰۲۳ کرکت نړیوال جام نغدي جایزې ځانګړې شوې
-
تازه خبرونه3 days ago
په کابل هوايي ډګر کې د افغانستان، ازبکستان او عربي متحده اماراتو کډه ناست ترسره شوه