د آریانا نړیوال راډیو ټلویزیون ویاړي، ​​چې د افغانستان فوټسال غوره لیګ څلورم پړاو تولید او هېوادوالو ته خپروي.

ټاکل شوې، چې دا سیالۍ د غبرګولي پر یوولسمه پیل او د زمري پر یوویشتمه پای ته رسیږي.

دا لوبې به د افغانستان د فوټبال فډراسیون د فوټسال کمیټې په جمنازیم کې ترسره شي.

د افغانستان فوټبال فډراسیون مشر محمد یوسف کارګر نن (پنجشنبه) د دې سیالیو یا ټورنمنټ د تولید او خپرونې قرارداد د لاسلیک په مراسمو کې وویل: “د افغانستان فوټسال وړتیا اوس نړیواله شوې ده. زمونږ هڅې دا دي، چې دا ظرفیت د آسیا او سیمې پر کچه لوړ کړو، چې اړینه برخه په کې رسنۍ لري. پر رسنیو سربېره خصوصي سکټور خورا لوی او بنسټیز رول لوبولی شي.”

د آریانا ټلویزیون د خرڅلاو مدیر سمیع الرحمن عزیزي ویلي؛ د لومړي ځل لپاره به په دې سیالیو کې د ویډیو ملاتړی سیسټم وکارول شي، چې له لوبڅار سره د سمو پرېکړو په کولو کې مرسته وکړي.

هغه ويلي: “دا نوې ټکنالوژي به نه یوازې د لوبو څرنګوالی او رڼښت لوړ کړي، بلکې د لوبډلو او لوبغاړو لپاره به د لوړې کچې تجربه هم ډاډمنه کړي.”

سمیع الرحمن عزیزي ټینګار کړی؛ آریانا ټلویزیون اړینې نړیوالې او کورنۍ پېښې خپروي او هڅه کوي، چې د افغانستان فوټسال غوره لیګ په ټوله نړۍ کې مشهور کړي.

هغه ویلي: “دا همکاري د سپورټ په پرمختګ کې یو نوی پړاو پیلوي او مونږ بشپړ باور لرو، چې دا سیالۍ به د ځوانانو لپاره د نویو فرصتونو دروازه پرانیزي.”

د یادونې ده، چې د افغان فوټسال غوره لیګ څلورم پړاو به ۹۰ لوبې ولري او د لومړي ځل لپاره به دا لوبې د راونډ رابن په بڼه ترسره شي.

هره ورځ پرته له شنبې دوه لوبې ترسره کیږي؛ لومړۍ لوبه به د مازیګر پر ۴ بجو او دوه‌یمه هغه به له مازیګر وروسته ۶ بجې پیل شي.

په دې سیالیو کې به بهرني لوبغاړي هم برخه ولري.

د افغانستان کرکټ ملي لوبډله د یو ورځنیو نړیوالو لوبو په وروستۍ درجه بندۍ کې اووم مقام ته پورته شوې ده.

د کرکټ نړیوالې شورا په درجه بندۍ کې افغانستان له څلورو نمرو سره اووم مقام ترلاسه کړ.

تر دې دمه دا د افغانستان په یو ورځنیو نړیوالو لوبو کې تر ټولو ښه پایله ده.

د افغانستان لوبډله اوس د انګلستان، ویسټ انډیز او بنګله دېش په څېر ټیمونو پر پرتله لوړه درجه لري.

د افغانستان او سریلانکا الف کرکټ لوبډلې به د سې‌شنبې پر ورځ (د غویی نهمه) په یوه غیر رسمي ټیسټ لوبه کې له یو بل سره مخ شي.

د افغانستان الف لوبډلې یو شمېر لوبغاړو په ملي لوبډلې کې هم لوبه کړې ده.

د افغانستان الف لوبډلې جوړښت:

بهیرشاه، دروېش رسولي، اعجاز احمد مهري، عمران میر، ریاض حسن، عبدالمالک، عصمت عالم، شمس الرحمن، ضیا الرحمن، افسر ځاځی (ویکټ کیپر)، اکرام علیخېل (ویکټ کیپر)، عرب ګل، بشیر احمد، فرید احمد، فریدون داوودزی، خلیل ګربز، محمد ابراهیم، محمد سلیم، یما عرب، ضیاءالرحمن.

د سریلانکا الف لوبډله:

کمیل میشارا، ناوانیډو فرنانډو، پاسینډو سوریابنډارا، پاون راټنایکه، راوینډو رسانټا، سونال ډینوشا، وانویا سهان، لحیرو اوډارا (ویکټ ساتونکی)، صیډیرا سماراویکراما (ویکټ ساتونکی) اسانکا منوج، دیلشان ماډوشنکا، ډیلوم سوډدیرا، ایسیټا ویجسونډرا، میلان راټنایکه، شیران فرنانډو، تارینډو راتنایکه.