Connect with us

تازه خبرونه

امریکا ته د افغان کډوالو د لېږد او بیا میشتېدنې دفتر تړل کیږي

رویټرز لیکلي، چې که دا سپارښتنه پلي شي؛ نو شاوخوا ۲۰۰ زره وړ افغان کډوال به امریکا ته له لېږد بې برخې شي.

خپور شوی

د

رویټرز د باخبره سرچینو د څرګندونو له مخې راپور ورکړی، چې د امریکا بهرنیو چارو وزارت د افغانانو د بیا میشتېدنې دفتر چارواکو ته ویلي، چې د روان کال په اپریل کې تړلو ته چمتووالی ونیسي.

رویټرز لیکلي، چې که دا سپارښتنه پلي شي؛ نو شاوخوا ۲۰۰ زره وړ افغان کډوال به امریکا ته له لېږد بې برخې شي.

د افغان کډوالو د بیا میشتېدنې یوه ملاتړي وکیل دې خبري سرچینې ته ویلي، چې د افغان – امریکایي پوځي پرسونل د کورنۍ غړي، ماشومان او په امریکا کې د میشت افغانانو خپلوان او په لسګونه زره افغانان، چې په افغانستان کې د شل کلنې جګړې پرمهال یې د امریکا حکومت ته کار کړی؛ د هغو کسانو په ډله کې دي، چې ښایي د دفتر د تړلو په صورت کې یې امریکا ته د ننوتلو مخه ونیول شي.

د افغانانو د بیا میشتېدنې افغان ایواک نومي ملاتړ کوونکي بنسټ بنسټوال شان ونډایورویلي: “د دې دفتر تړل به یو ملي شرم، افغان متحدینو، هغو پخوانیو سرتېرو، چې زمونږ لپاره وجنګېده او د امریکا له ژمنې سره خیانت وي.”

دا اقدام په داسې وخت کې کیږي، چې د امریکا حکومت په ټوله نړۍ کې له خپلو سفارتونو څخه غوښتي، چې د کارمندانو د کمولو لپاره پلان جوړ کړي.

دا سپارښتنه د امریکا د ولسمشر ډونالډ ټرمپ د هغې پالیسۍ یوه برخه ده، چې غواړي ډیپلوماتیک جوړښت اصلاح او حکومتي لګښتونه دوه ټریلیون ډالرو ته راټیټ کړي.

د افغانستان د بیا میشتېدنې د همغږۍ دفتر د ۲۰۲۱ کال په اګست کې د هغو افغانانو د لېږدولو لپاره رامنځته شو، چې د امریکا له حکومت سره د همکارۍ له کبله له خطر سره مخ ول.

دې دفتر د خپلو فعالیتونو ساحه هغو افغانانو ته پراخه کړه، چې د ۲۰۲۲ کال په اوکټوبر کې یې د کډوالۍ حیثیت ترلاسه کړ او تر اوسه یې شاوخوا ۱۱۸ زره کسان امریکا ته لېږدولي دي.

یو امریکایی چارواکی وانډایور او دوه نورو باخبرو سرچینو ویلي؛ دوی نه پوهیږي، چې د دفتر د تړلو امر چا ورکړی دی.

دا پلان په قطر او البانیا کې افغان پناه غوښتونکو ته د لاسرسي مرکزونو د تړلو لپاره جوړ شوی دی.

د اړوند معلوماتو له مخې؛ نږدې ۳ زره افغانان، چې غواړي په امریکا کې د کډوالو یا د ځانګړي مهاجرت ویزې (SIVs) لرونکو په توګه میشت شي، په دې دوه هېوادونو کې د لېږد پر تمه دي.

په دې مرکزونو کې له ۲۰ څخه ډېر بې سرپرسته ماشومان هم شته، چې له پلار، مور او خپلوانو سره د  د یوځای کېدو پر تمه دي او اوس په لنډمهاله واحدونو کې ژوند کوي.

دوی خواړه او نورې بنسټیزې اړتیاوې ترلاسه کوي؛ خو یوې سرچینې ویلي، چې د ټرمپ لخوا د بهرنیو مرستو د بندولو سپارښتنې د رواني روغتیا او د ماشومانو د ملاتړ پروګرامونه درولي دي.

دوه سرچینو ویلي، چې د امریکا بهرنیو چارو وزیر مارکو روبیو ته د افغانانو د لېږد دفتر د تړلو پلان چمتو شوی دی.

پر روبیو سربېره، د دفاع وزیر پیټ هیګسټ، د کورني امنیت وزیر کریسټي نوم او د ټرمپ د ملي امنیت سلاکار مایکل والټز د هغو کسانو په ډله کې دي، چې تمه ده وروستۍ پرېکړه وکړي.

یوې سرچینې ویلي: “د دفتر د تړلو په اړه ټول غوراوي په پام کې نیول شوي دي.”

د کډوالو د ایستلو او بیا میشتېدنې عملیات د ټرمپ د کډوالو د بېرته ستنولو د پلان له پیل راپدېخوا بند شوي دي. د ټرمپ د اجرائیوي فرمان پر بنسټ له پاکستان او نورو هېوادونو څخه د افغان کډوالو د لېږدولو پروګرام د نورو بیاکتنو لپاره ۹۰ ورځې ځنډول شوی دی.

تازه خبرونه

د اسلامي همکاریو ټولنه له اسلامي امارت سره د پړاوایز تعامل د لارې نقشه جوړوي

په دې غونډه کې ګډونوالو د افغانستان د سیاسي بدلونونو او بشري وضعیت په اړه د اسلامي همکاریو ټولنې اړوند مهم موضوعات وڅېړل او له واکمنو چارواکو سره یې د منظم او پړاوایز تعامل لپاره د یوه چوکاټ د رامنځته کولو لارې چارې وڅېړلې.

Published

on

 

د اسلامي همکاریو ټولنې د افغانستان په اړه د وزیرانو د تماس ډلې د جدې ښار په مقدماتي تخنیکي غونډه کې له اسلامي امارت سره د پړاوایز تعامل او اړیکو د تنظیم لپاره د لارې نقشې پر جوړولو بحث او خبرې کړې دي.

په دې غونډه کې ګډونوالو د افغانستان د سیاسي بدلونونو او بشري وضعیت په اړه د اسلامي همکاریو ټولنې اړوند مهم موضوعات وڅېړل او له واکمنو چارواکو سره یې د منظم او پړاوایز تعامل لپاره د یوه چوکاټ د رامنځته کولو لارې چارې وڅېړلې.

د اسلامي همکاریو ټولنې د څرګندونو له مخې؛ دغه چوکاټ د افغانانو د ګټو د خوندي کولو او په افغانستان کې د ثبات او پرمختګ لپاره د مرستې لپاره په پام کې نیول شوی دی.

دغه راز په دې غونډه کې هغه لومړیتوبونه وڅېړل شول، چې د تماس ډله به پرې د اسلامي همکاریو ټولنې د بهرنیو چارو د وزیرانو شورا د اړوند پرېکړه‌لیکونو د عملي کولو لپاره تمرکز کوي.

ګډونوالو له اسلامي امارت چارواکو سره د ګډو لومړیتوبونو په اړه مستقیمې او رغنده خبرو اترو پر ترسره کولو هم نظرونه وړاندې کړل.

Continue Reading

تازه خبرونه

د کورنیو چارو وزارت د کوکنارو د کښت د زیاتوالي په اړه د ملګرو ملتونو راپور رد کړ

یاد وزارت ویلي، چې په ۲۰۲۶ز.کال کې یې له ۲۳ زره هکټارو څخه زیاته ځمکه د نشه‌یي توکو له کښت څخه پاکه کړې او د ارزونو له مخې یې په هېواد کې د کوکنارو کښت نږدې صفر ته رسېدلی دی.

Published

on

 

د اسلامي امارت د کورنیو چارو وزارت په افغانستان کې د کوکنارو د کښت د زیاتوالي په اړه د ملګرو ملتونو د نشه‌یي توکو او جرمونو پر وړاندې د مبارزې دفتر تازه راپور رد کړی او د دغه راپور د ارزونې پر کړنلارې یې نیوکه کړې ده.

یاد وزارت ویلي، چې په ۲۰۲۶ز.کال کې یې له ۲۳ زره هکټارو څخه زیاته ځمکه د نشه‌یي توکو له کښت څخه پاکه کړې او د ارزونو له مخې یې په هېواد کې د کوکنارو کښت نږدې صفر ته رسېدلی دی.

د ملګرو ملتونو د نشه‌یي توکو او جرمونو پر وړاندې د مبارزې دفتر په خپل تازه راپور کې ویلي، چې په افغانستان کې د کوکنارو کښت په ۲۰۲۶ز.کال کې تر ۳۰۰ سلنې ډېر زیات شوی او څه باندې ۴۳ زره هکټاره ځمکې ته رسېدلی دی. په داسې حال کې، چې دغه کچه تېر کال شاوخوا ۱۰ زره هکټاره وه.

د یاد دفتر د«۲۰۲۶ز. کال لپاره د افغانستان د تریاکو د وضعیت ارزونې» د راپور له مخې؛ د تریاکو تولید هم نږدې ۴۰۰ سلنه زیات شوی او په ۲۰۲۵ز.کال کې له نږدې ۳۰۰ ټنو څخه په روان کال کې شاوخوا یو زر او ۵۰۰ ټنو ته رسېدلی دی.

راپور ښيي، چې په افغانستان کې د کوکنارو د کښت مرکز شمال‌ختیځو ولایتونو ته لېږدول شوی او د کښت شاوخوا ۷۶ سلنه ځمکه په همدې سیمه کې ده.

بدخشان او تخار د کوکنارو د کښت له مهمو مرکزونو څخه بلل شوي دي.

د دغه بنسټ د څرګندونو له مخې؛ په ۲۰۲۶ز. کال کې د ۱۶ ولایتونو د کوکنارو کښت ثبت شوی، چې د تېر کال پر پرتله پنځه ولایتونه زیاتوالی ښيي.

د ملګرو ملتونو دغه دفتر د بزګرانو اقتصادي ستونزې او د بدیل عاید د فرصتونو محدودیت د کوکنارو د کښت د بیا زیاتېدا اصلي لاملونه بللي او خبرداری یې ورکړی، چې له بزګرانو څخه له دوامدار ملاتړ پرته به د دغه بوټي د کښت مخنیوی ستونزمن وي.

په راپور کې راغلي، چې د وچو تریاکو د هر کیلوګرام منځنۍ بیه په ۲۰۲۵ز.کال کې له شاوخوا ۵۷۰ ډالرو څخه په روان کال کې ۵۰۰ ډالرو ته راټیټه شوې؛ خو اوس هم د نشه‌یي توکو پر سراسري بندیز د لګېدو له مخکینۍ کچې څخه د پام وړ لوړه ده.

ملګرو ملتونو زیاته کړې؛ په افغانستان کې د کوکنارو کښت او د تریاکو تولید، سره له دې زیاتوالي، اوس هم د بندیز له لګېدا مخکې کچې ته نه‌دي رسېدلي. هغه مهال څه باندې ۲۰۰ زره هکټاره ځمکه د کوکنارو تر کښت لاندې وه.

دا په داسې حال کې ده، چې له دې مخکې اسلامي امارت ویلي وه؛ د کوکنارو کښت، پلور او قاچاق د افغانستان له پولو بهر ته لېږدېدلی دی.

Continue Reading

تازه خبرونه

افغانستان د اسلام‌آباد د ایکو غونډې له حذفېدا وروسته د تهران سرمشریزې ته ځي

ټاکل شوې، چې د ایکو اته‌لسمه سرمشریزه د روان میلادي کال د ډسمبر پر درېیمه او څلورمه د ایران په پلازمېنه تهران کې د غړو هېوادونو د مشرانو او لوړپوړو چارواکو پر ګډون جوړه شي او د سیمه‌ییزو همکاریو په اړه خبرې اترې وکړي.

Published

on

د بهرنیو چارو وزارت د اطلاعاتو او عامه اړیکو رییس ضیاء احمد تکل ويلي، چې د افغانستان اسلامي امارت پلاوی به د اقتصادي همکاریو ټولنې( ایکو) په اته‌لسمه سرمشریزه کې ګډون وکړي.

د نوموړي د څرګندونو له مخې، د دې پلاوي مشري به د بهرنیو چارو وزیر امیرخان متقي پر غاړه ولري.

ټاکل شوې، چې د ایکو اته‌لسمه سرمشریزه د روان میلادي کال د ډسمبر پر درېیمه او څلورمه د ایران په پلازمېنه تهران کې د غړو هېوادونو د مشرانو او لوړپوړو چارواکو پر ګډون جوړه شي او د سیمه‌ییزو همکاریو په اړه خبرې اترې وکړي.

دا اعلان په داسې حال کې کیږي، چې د نومبر پر پنځلسمه او شپاړلسمه په اسلام‌آباد کې د پاکستان پر کوربه‌توب د اقتصادي همکاریو ټولنې د بهرنیو چارو وزیرانو په دېرشمه غونډه کې له ګډون څخه پاتې شو. په داسې حال کې، چې افغانستان د دې سیمه‌ییزې ټولنې غړی هېواد دی.

د پاکستان بهرنیو چارو وزارت ویلي وه، چې کابل ته بلنه ورکړ شوې نه‌وه؛ ځکه اسلام‌آباد د افغانستان اوسنۍ اداره پر رسمیت نه‌پیژني.

پاکستانيو چارواکو دا ادعا هم کړې، چې د افغانستان غړیتوب د اقتصادي همکاریو ټولنې د دارالانشا لخوا ځنډول شوی دی.

دا پرېکړه د افغان چارواکو له نیوکو سره مخ شوه.

اسلامي امارت استدلال کوي، چې سیاسي اختلافات باید د سیمه ییزو اقتصادي نوښتونو او همکاریو په برخه کې د افغانستان د ګډون مخه ونه نیسي.

د تهران په سرمشریزه کې د افغانستان ګډون به کابل ته دا فرصت برابر کړي، چې له سیمه ییزو شریکانو سره د سوداګرۍ، اقتصادي پراختیا، ټرانسپورټي نښلون او سیمه‌ییزو همکاریو ته ورته مسایلو په اړه بیا اړیکې ټینګې او خبرې اترې وکړي.

Continue Reading
Advertisement

Trending

Copyright © 2026 Ariana News. All rights reserved!