تازه خبرونه
امریکا په افغانستان کې د خپلو ګټو لپاره وضعیت بې ثباته کوي – چین

د چین سفیر وانګ يو نن په کابل کې يوې خبري غونډې ته څرګنده کړې، چې امريکا له تروريزم سره په مبارزه کې دوه ګونی چلند لري او له دغو ډلو سره د مبارزې پر پلمه د هېوادونو ملي حاکميت تر پښو لاندې کوي.
د چین سفیر د دغه هېواد په سفارت کې رابلل شوې خبري غونډې ته ویلي، چې امریکا له ترهګرۍ سره د مبارزې په برخه کې دوه مخی سیاست پرمخ بیايي او پدې پلمه د هېوادونو په ملي حاکميت او شخصي حريم تېری کوي.
وانګ يو له اسلامي امارت سره د چين د ديپلوماتيکو اړيکو د پراختيا په اړه خوښي وښوده او څرګنده یې کړه، چې له افغانستان سره يې اقتصادي همکاري ډېره کړې ده.
په کابل کې د چین سفیروانګ یو وایي: امریکا له ترهګرو ډلو سره د مبارزې په برخه کې دوه مخی چلند لري. اوسمهال له شل ډېرې ترهګرې ډلې په افغانستان کې شته او امریکا د افغانستان خپلواکي او د دغه هېواد ملي حاکمیت له پامه غورځوي او د افغانستان پر فضايي حریم د بې پیلوته الوتکو الوتنې کوي.
د چین سفیر د امریکا لخوا د افغانستان د مرکزي بانک د شتمنیو کنګل کول د افغانانو له ملي شتمنۍ څخه ښکاره غلا ګڼي او ټینګار کوي، چې اقتصادي فشارونو او بندیزونو افغان ولس له ډېرو ستونزو سره مخ کړی دی.
نوموړي زیاته کړې؛ امریکا د افغانستان خلکو ته ډېرې ستونزې جوړې کړي، له افغانستان څخه د خپلو ځواکونو له ایستلو وروسته یې د دغه هېواد خلکو ته هیڅ پام ندی کړی. امریکا اقتصادي بندیزونه زیات کړي او د افغانانو شتمني یې کنګل او غصب کړې ده.
دغه چینايي دیپلومات د افغانستان او چین ترمنځ د دیپلوماتیکو اړیکو د پراخیدو هرکلی کوي او وايي، چې د کابل او بیجینګ اړیکې به په راتلونکې کې لاپسې ژورې او پراخې شي.
وانګ يو له افغانستان سره د اقتصادي همکاريو پر پياوړتيا هم ټينګار وکړ.
وانګ یو څرګنده کړه، چې په تېر کال کې مونږ د دوستۍ او ګاونډيتوب اړيکې ټينګې کړې او د دواړو هېوادونو د بهرنيو چارو وزيرانو څلور ځلې سره ليدلي دي. د چين د بهرنيو چارو وزير په مارچ میاشت کې دلته راغی او د افغانستان د بهرنيو چارو وزير په مارچ کې چين ته ولاړ له افغانانو سره زمونږ تعامل عادي دی او افغان کارکوونکي هم په چين کې د دوی په سفارت کې دي. مونږ په نورو برخو کې د همکارۍ پلانونه هم لرو. لکه د کانونو سکتور او د انرژۍ په سکتور کې، د چين او افغانستان اړيکې به په راتلونکي کې ژورې شي.
د چین سفیر همداراز د سیمې د هېوادونو ترمنځ د سوداګرۍ او ترانزیت په برخه کې د افغانستان جغرافیایي موقعیت مهم وباله او ټینګار یې وکړ، چې هڅه کوي د منځنۍ آسیا هېوادونو په همکارۍ د افغانستان له دغه جغرافیوي موقعیت څخه اغېزمنه ګټه پورته کړي.
په کابل کې د امریکا له هوايي برید وروسته دا لومړی ځل دی، چې د چین سفیر په یوه خبري کنفرانس کې د امریکا د مداخلو په اړه د خپل هېواد دریځ په ډاګه کوي.
تازه خبرونه
د یوناما دفتر مشر په کابل کې د تخنیکي او مسلکي زدهکړو له رییس سره وکتل

په افغانستان کې د ملګرو ملتونو د دفتر (یوناما) مشرې د تخنیکي او مسلکي زدهکړو له رییس غلام حیدر شهامت سره په کتنه کې د ښځو او نجونو پر حرفوي زدهکړو ټینګار څرګند کړ.
په افغانستان کې د ملګرو ملتونو د مرستندویه دفتر یا یوناما مشرې روزا اتونبایوا د اسلامي امارت له مسوولینو سره له لیدنو وروسته دا ځل د تخنیکي او مسلکي زدهکړو د څانګې له مشر سره وکتل.
روزا اتونبایوا ويلي، حرفوي زدهکړې د افغانستان د اقتصادي ودې لپاره اړینې دي او باید ښځې او نجونې له اړوند روزنې برخمنې شي.
دغه راز د تخنيکي او مسلکي زدهکړو رييس ويلي، چې تخنيکي او مسلکي زدهکړې د بېوزلۍ د له منځه وړلو او د هېواد د اقتصاد د ودې لپاره اغېزمنې دي.
هغه وایي: د تخنيکي او مسلکي زدهکړو رياست په ټول افغانستان کې ٣٨٣ انستيتيوتونه او عالي لیسې لري، چې په ٢٥٠ ولسواليو کې فعاليت کوي او ٦٨٥٠ کسان لري.
په همدې حال کې یو شمېر کارپوهانو هم ويلي، چې افغانستان د ټولو په ځانګړي توګه ښځو او نجونو ته د کار زمینه برابرولو او پراختیا ته اړتیا لري او ټول نړیوال بنسټونه د افغانستان د پرمختګ لپاره رغنده رول لوبوي.
په دې کتنه کې د ملګرو ملتونو د فرهنګي او علمي سازمان (يونسکو) مشر هم حضور درلود او د هوکړه ليک پر لاسليکولو او د دواړو بنسټونو ترمنځ د ګډې کاري ډلې پر رامنځته کولو يې ټينګار څرګند کړ.
تازه خبرونه
روسیه په افغانستان کې د خپل سفارت د تړلو کوم پلان نلري – کابلوف

د افغانستان لپاره د روسیې استازي د دوشنبې پر ورځ ( د سلواغې ۱۷ ) تاس نیوز ته په ډاګه کړې، چې روسیه په کابل کې د خپل دیپلوماتیک ماموریت د تړلو کوم پلان نلري.
ضمیر کابلوف، چې د ولسمشر پوتین ځانګړی استازی او د روسیې د بهرنیو چارو وزارت د آسیا د دوهیمې څانګې مشر دی؛ د یادې سرچینې د دې پوښتنې په ځواب کې، چې آیا روسیه داسې پلانونه لري که نه، ویلي: داسې فکر هم ندی شوی.
له دې مخکې العربیه تلویزیون راپور ورکړی و، چې د یو شمېر عربي او غربي هېوادونو چارواکو پرېکړه کړې، چې د امنیتي دلایلو له مخې په کابل کې خپل سفارتونه وتړي.
تازه خبرونه
د قطر سفیر په کابل کې د اسلامي امارت له چارواکو سره وکتل

د یکشنبې پر ورځ د اسلامي امارت یو شمېر استازیو په کابل کې د قطر د بهرنیو چارو د وزیر له ځانګړي استازي مطلق بن ماجد القحطاني او مل پلاوي سره وکتل.
د قطر استازي د اسلامي امارت د بهرنیو چارو له وزیر امیر خان متقي، کورنیو چارو وزیر سراج الدین حقاني؛ د پوهنې وزیر حبیب الله اغا او د استخباراتو عمومي رییس عبدالحق وثیق سره د افغانستان په اړه خبرې وکړې.
د اسلامي امارت د چارواکو د څرګندونو له مخې؛ دواړو لوریو د قطر خيريه بنسټ پر هڅو، سياسي همکاريو، د اړيکو پر پياوړتياوو او بشري مرستو هر اړخیزې خبرې کړې دي.
د قطر د بهرنیو چارو وزارت لخوا په خپره شوې خبرپاڼه کې راغلي؛ القحطاني د افغانستان پر مهمو پرمختګونو په ځانګړي توګه د سیاست، اقتصاد، پراختیا او پوهنې په برخو کې خبرې وکړې.
نوموړي د قطر پر دریځ ټینګار څرګند کړ او د افغانانو له ټولو حقونو په ځانګړي توګه د زدهکړو او د نجونو د حقونو د ترلاسه کولو او د ښځو د کار کولو له حق او درناوي خپل ملاتړ بیا وړاندې کړ.
په خبرپاڼه کې راغلي، چې هغه په افغانستان کې د امنیت او ثبات د ټینګښت پر هراړخیزې ملاتړ او د سیاسي اجماع د رامنځته کولو لپاره د اسانتیاوو پر رامنځته کولو هم ټینګار څرګند کړ.
-
تازه خبرونه5 days ago
امریکا د اسلامي امارت ځینو چارواکو ته د ویزو پر ورکولو بندیز ولګاوه
-
سوداگري5 days ago
د حیرتان – مزارشریف د اوسپنې پټلۍ له لارې ترانسپورتي لېږد رالېږد وځنډول شو
-
تازه خبرونه3 days ago
هالندي ځواکونه په افغانستان کې له یوه بریده ژوندي پاتې کسانو ته تاوان ورکوي
-
نړۍ3 days ago
په لاتينه امريکا کې د چين د څارنې یو بل شکمن بالون ولیدل شو- امريکا
-
تازه خبرونه3 days ago
اسلامي امارت دې د رسمیت پېژندلو لپاره خپلې ژمنې پوره کړي
-
سوداگري3 days ago
افغانستان او پاکستان د دوه ګونه مالیاتو د مخنیوي د کنوانسیون مسوده لاسلیک کړه
-
تازه خبرونه20 hours ago
روسیه په افغانستان کې د خپل سفارت د تړلو کوم پلان نلري – کابلوف
-
لوبی1 day ago
د ۲۰ آووریز کرکت نړیوال لیګ ډالۍ اعلان شوې