Connect with us

لوبی

د آسیا کرکت جام به د سریلانکا پر ځای په عربي متحده اماراتو کې ترسره شي

Published

 on

(Last Updated On: چنګاښ ۲۷, ۱۴۰۱)

د راپورونو له مخې؛ ټاکل شوې راتلونکې میاشت د آسیا کرکت کپ سیالۍ به د سریلانکا د سیاسي کړکېچ له کبله په عزبي متحده اماراتو کې پیل او تر سره شي.

ای اس پی ان کریک انفو راپور ورکړی؛ دا پرېکړه روانه اوونۍ د آسیایي کرکت شورا په غونډه کې رامنځته شوې ده.

دا شورا په سریلانکا کې د تېلو د لږوالي په اړه اندېښنه لري، چې په هېواد کې د پراخو لاریونونو لامل شوی.

دغه راز خوراکي توکي هم کم شوي، شخصي موترو ته د تېلو رسول محدود دي او د برښنا سخت کمښت شتون لري؛ همدغو ستونزو قهرجن لاریونکوونکي اړ کړل، چې د سریلانکا د ولسمشر او د لومړي وزیر د استوګنې کورونه وسوځول او د مشرتابه د بدلون غوښتنه یې وکړه.

د سریلانکا د کرکت اجرائیوي مشر اشلي دی سلوا ویلي: له دوه لوبډلو کوربتوب د لس لوبډلو د کوربتوب سره ورته ندی. تاسې باید دوی ته کافي خواړه او تېل چمتو کړئ. هر ټیم ته باید یو موټر او تېل ورکړشي او د دوی مدیرانو ته هم باید ترانسپورت چمتو شي.

هغه زياته کړې، هغه جنراتورونه، چې څراغونه فعالوي هم تېلو ته اړتيا لري.

د کرکت آسیايي شورا راتلونکې جمعه د آسیا جام سیالیو مهالوېش اعلانوي.

دا په پېنځه کلونو کې دوه یم ځل دی، چې عربي متحده امارات د آسیا د کرکت د جام کوربتوب کوي.

لوبی

افغانستان د هند د شطرنج په نړیوال جام کې ګډون کوي

Published

on

(Last Updated On: زمری ۴, ۱۴۰۱)

د افغانستان د بدني روزنې او سپورت عمومي ریاست ويلي، سبا (چارشنبه د زمري ۵ ) به په هند کې د شطرنج لوبډلو ۴۴ نړیوال تورنمنت په رسمي بڼه پیل شي.

دا سیالۍ هر دوه کاله وروسته ترسره کیږي، چې سږ کال په کې د نرینه وو ۱۸۸ هېوادونه برخه اخلي.

د افغانستان د بدني روزنې ریاست وايي، له خوښۍ ځای دی، چې افغانستان به هم د دغو هېوادونو ترمنځ سیالي وکړي.

له افغانستان څخه په دې لوبو کې لاندې اووه کسان ګډون کوي:

۱. لوبغاړو مشرعبیدالله قریشي

۲. لوبډلمشر خیبر فرازي

۳. لوبغاړی وهاب الدین میرزاد

۴. لوبغاړی حبیب الله امیني

۵. لوبغاړی محمد سپهر سخاوتي

۶. لوبغاړی محمد یوسف مرادي

۷. لوبغاړی سلیمان احمد اشرفي

د افغانستان د بدني روزنې عمومي مشر زياته کړې؛ دغه نړيوالې سيالۍ به د سويس د سيستم له مخې په يوولس پړاوونو کې تر سره شي، چې د سرو زرو، سپينو زرو او برونزو مډالونو له سياليو وروسته به د نړۍ د شطرنج لوبډلې اتل، دوه يم مقام او درېيم مقام خپل کړي. دغه راز په پېنځه کټګوریو کې، یاد شوي مډالونه به هم ورکړ شي.

غوره لوبغاړیو ته ځانګړي مډالونه هم ورکول کیږي.

دا سیالۍ به د اګست پر ۱۰ پای ته ورسیږي.

Continue Reading

لوبی

آریانا تلویزیون په افغانستان کې د ۲۰۲۲ کال د فوتبال نړیوال جام د خپراوي ځانګړی حق خپل کړ

Published

on

(Last Updated On: زمری ۳, ۱۴۰۱)

آریانا نړیوالې تلویزیوني شبکې په پوره لیوالتیا په ډاګه کړې، چې په افغانستان کې یې د ۲۰۲۲ زېږدیز کال د فوتبال نړیوال جام د خپراوي ځانګړی حق ترلاسه کړی دی.

د آریانا نړیواله شبکه له فوتبال سره د خلکو د مینې زیاتولو او د ۳۶ میلیون افغانانو پر شونډ د مسکا رامنځته کولو لپاره له فیفا سره په نږدې همکارۍ دغه نړیواله زړه راکښونکې پېښه نندارې ته وړاندې کوي.

د ۲۰۲۲ زېږدیز کال د قطر فوتبال نړیوال جام به د لړم پر ۳۰ / د نومبر پر ۲۱ پیل او د لیندۍ تر ۲۷ /  د دسمبر تر ۱۸به روانې وي، چې د پرانیستې او پای مراسمو په ګډون به ټولې لوبې په ژوندۍ بڼه له آریانا نړیوالې شبکې څخه خپرې شي.

دغه زړه راکښونکی نړیوال جام د لومړي ځل لپاره په منځني ختیځ کې ترسره کیږي.

د ۲۰۲۲ کال د قطر فوتبال نړیوال جام به د دې سیالیو دوه ویشتم پړاو وي، چې ۶۴ سیالۍ لري او د قطر په اته بېلابېلو لوبغالو( البیت لوبغالی، خلیفه نړیوال لوبغالی، الثومه لوبغالی، احمد بن علي لوبغالی، لوسیل لوبغالی، ۹۷۴ لوبغالی، د پوهنې ښار لوبغالی او الجنوب لوبغالی) کې ترسره کیږي.

که څه هم د دغې نړیوالو مراسمو د پرانیستلو په اړه څه خپاره شوي ندي؛ خو داسې ښکاري، چې دغه مراسم به د قطر د هڅوب له اړخه په بل ډول ترسره شي.

د فوتبال نړیوال جام له پیل راپدیخوا کوربه هېوادونو د پرانستې لوبې پیل کړې؛ خو قطر به دغه دود مات کړي.

ویل کیږي، چې د قطر امیر تمیم بن حمد ال ثاني به د پرانیستې د مراسمو لپاره ځانګړي پروګرامونه ولري؛ خو سنیګال فوتبال ملي لوبډله به د هالند پر وړاندې نړیوال جام سیالۍ پیل کړي او بیا به دا هېواد له اکوادور سره لوبه وکړي.

د قطر امیر غواړي، چې د اکوادور له لوبډلې سره د نړیوال جام له لوبو مخکې اورلوبه نندارې ته وړاندې کړي.

د نړیوال جام د پرانستې مراسم به د البیت په ۶۰ زره کسیز لوبغالي کې ترسره شي او سنیګال او هالند به د الثومه په لوبغالي کې له یو بل سره مخ شي.

د راپورونو له مخې، د کوربه هېواد په ګډون ۳۲ لوبډلو په رسمي توګه د سږني نړیوال جام سیالیو ته لار موندلې ده.

په دې سیالیو کې پر قطر سربېره له اروپا څخه ۱۳ هېوادونو، څلور هېوادونه د سویلي امریکا، څلور نور د آسیا، پېنځه له آفریقا، څلور لوبډلې د شمالي امریکا او آسترالیا څخه لار موندلې ده.

هغو هېوادونو، چې ۲۰۲۲ نړیوال جام ته لار موندلې دا دي: قطر، آلمان، دنمارک، برازیل، فرانسه، بلجیم، کروشیا، هسپانیه، سربیا، انګلستان، سویس، هالند، ارجنتاین، ایران، سویلي کوریا، جاپان، سعودي عربستان، اکوادور، یوراګوای، کانادا، ګانا، سنیګال، پرتګال، پولند، تونس، مراکش، کامرون، د امریکا متحده ایالات، مکسیکو، ویلز، آسترالیا او کوستاریکا.

Continue Reading

لوبی

قطر د فوټبال نړیوال جام د ساتنې لپاره بې پیلوته الوتکې کاروي

Published

on

(Last Updated On: زمری ۱, ۱۴۰۱)

د بي بي سي د راپور له مخې؛ قطر به د ۲۰۲۲ نړیوال جام د خوندي څارنې لپاره د بشري ځواک ترڅنګ بې پیلوته الوتکې وکاروي، چې په دې اړه یې له امریکایي شرکت فورت تکنالوژۍ سره یو تړون هم لاسلیک کړی دی.

دغه امریکايي شرکت د قطر له حکومت سره په یوه تړون کې د احتمالي برید کوونکیو بې پیلوته الوتکو د مقابلې لپاره لوبغالو ته خپلې بې پیلوته الوتکې لیږي.

یاد شرکت څرګنده کړې؛ د دوی سیستم د بې پیلوته الوتکو د راغورځولو لپاره خوندي لار ده او د پوځي وسلو کارولو برعکس شوني زیانونه کموي.

د شرکت بې پیلوته الوتکې، چې د DroneHunters په نوم یادیږي؛ پر کوچني برید کوونکي ډرون جال غورځوي او کولی شي یو بل چاپېریال ته یې ولیږدوي. پر لویو هغو یو جال اچول کیږي، چې پاراشوت لري او کولی شي ورو ورو یې ځمکې ته راکاږي.

ډېر نور هېوادونه او ټولنې به د ۲۰۲۲ نړیوال جام سیالیو په خوندي کولو کې له قطر سره مرسته وکړي. د برمنګهم پوهنتون پروفیسور دیوید دون وايي، چې په ترهګریزو عملیاتو کې د بې پیلوته الوتکو کارول؛ ځکه ډېر شوي، چې تکنالوژي ته لاسرسی ډېر شوی دی.

د پایلې په توګه، د دغو دفاعي سیستمونو کارولو ته اړتیا تر بل هر وخت ډېره شوې او د امنیت په ساتلو کې به ګټورې وي.

Continue Reading

Trending

Copyright © 2022 Ariana News. All rights reserved!