Connect with us

تازه خبرونه

د اسلامي امارت چارواکو په افغان ټولنه کې د ژورنالیزم اړتیاوې پر ګوته کړې

د دوشنبې پر ورځ(د تلې لومړۍ) د «رښتینی ژورنالېزم، باخبره ولس او سالمه ټولنه» په تر سرلیک لاندې غونډه کې د چارو ادارې رییس نورالحق انور ویلي، چې اسلامي امارت پر رښتینې ژورنالیزم باور لري او د خبریالانو د ارزښت او حیثیت پر ساتلو ټینګار کوي.

خپور شوی

د

د افغانستان اسلامي امارت لوړ پوړو چارواکو په هېواد کې د عامه پوهاوي، یووالي او اخلاقي ودې لپاره د ژورنالیزم په اړین رول ټینګار کړی دی.

د دوشنبې پر ورځ(د تلې لومړۍ) د «رښتینی ژورنالېزم، باخبره ولس او سالمه ټولنه» په تر سرلیک لاندې غونډه کې د چارو ادارې رییس نورالحق انور ویلي، چې اسلامي امارت پر رښتینې ژورنالیزم باور لري او د خبریالانو د ارزښت او حیثیت پر ساتلو ټینګار کوي.

هغه زیاته کړې: “دښمن د ناسمو اوازو او ناسمو تبلیغاتو خپرولو لپاره له ټولو لارو چارو کار اخلي؛ خو اسلامي امارت پر بشپړ ډاډ د خبریالانو حیثیت ساتلی او تعاملات د اصولو پر بنسټ ترسره کیږي.”

نوموړي زیاته کړې؛ د تېرو حکومتونو پر پرتله، چې د خبریالانو حیثیت ته یې پاملرنه نه‌کوله؛ اسلامي امارت هڅه کوي، چې د ژورنالیزم ارزښت وساتي.

نوموړي زیاته کړې؛ که ژورنالیزم او رسنۍ پیاوړې شي؛ نو نه یوازې د ظلم په مخنیوي، یووالي ساتلو او مینې خپرولو کې به مثبت اغېز ولري، بلکې حقایق به هم سم خپاره شي.

هغه وایي، چې اسلامي امارت پر زغرده د خبریال حیثیت ساتلی او د تعامل پر بنسټ روان دی.

دغه راز د اطلاعاتو او کلتور وزارت د رسنیو د څار او نشراتو ریيس صفی‌الله زائد ويلي، چې ژورنالیزم یوازې د خبر خپرولو نوم ندی، بلکې د «حقایقو وړاندې کولو، ملي یووالي او سالمې ټولنې» د جوړښت یوه اړینه وسیله هم ده.

صفی الله زائد وایي: « ژورنالیزم د ملي یووالي نوم دی؛ هغه رسنۍ، چې رښتیني، کره او بې‌طرفه معلومات وړاندې کوي ځانګړی ارزښت لري او ټولنه یې درناوی کوي.»

نوموړي زیاته کړې؛ ژورنالیزم د حقایقو خپرولو رسالت لري او ملي ګټو ته ژمنتیا او ټولنیز ثبات له ژورنالیستانو څخه د صداقت غوښتنه کوي.

د رسنیو د څار او نشراتو ریيس د رښتیني ژورنالیزم پالنه د ټولو ګډ مسوولیت بولي او زیاتوي؛ رسنۍ هغه وخت د خلکو باور ترلاسه کولی شي، چې د ورورولۍ فضا رامنځته، سرچینې روښانه او د پرمختګ اړوند خبرونو ته لومړیتوب ورکړ شي.

همدارنګه دې غونډې ته د افغانستان بانک د څارنې آمر لطف الله خیرخواه ویلي: په افغان ټولنه کې ژورنالیزم د عامه پوهاوي بنسټ دی او د اسلام په پېنځه مقاصدو کې ژورنالیزم خورا اړین رول لري.

نوموړي زیاته کړې؛ ځمکه او ملکیت زمونږ خپل حق دی؛ پر ځمکه د اوسیدونکو‌ خلکو ذهنیت هم چاته نه‌پریږدو.

د اطلاعاتو او کلتور وزارت د فرهنګ او هنر مرستیال، عتیق الله عزیزي ويلې، چې خبریالانو د هېواد په تېرو طبیعي ناورینونو او د کډوالو د راستنېدو په پروسو کې د پام وړ ونډه اخيستې او اغېز ناک رول يې لوبولی دی.

نوموړي زیاته کړې؛ افغانستان د بېلابېلو قومونو ګډ کور دی؛ باید د هغوی عنعناتو، کلتورونو او حساسیتونو ته متوجه شئ. ژورنالېزم یوه سپېڅلې برخه ده؛ خو که د معنویاتو توهین په کې وشي، بیا په ټولنه کې خپل اعتبار له لاسه ورکوي.

ویل کیږي، چې دې کنفرانس حکومتي چارواکي او د رسنیو استازي سره راټول کړل، چې د اصولي راپور ورکولو ارزښت او په افغان ټولنه کې د مطبوعاتو د آزادۍ لپاره د روانو ننګونو په وخت کې د هغې د ځای په اړه بحث وکړي.

تازه خبرونه

د افغانستان بیارغونه باید پر کورنیو پانګونو ولاړه وي – ذبیح‌الله مجاهد

مجاهد ویلي؛ په تېرو لسیزو کې یو شمېر هېوادونو لکه: شوروي اتحاد او امریکا په افغانستان کې د خپلو موخو او ګټو د پلي کولو لپاره د بیارغونې او پراختیا پروژې پلې کړې دي.

Published

on

د اسلامي امارت ویاند ذبیح‌الله مجاهد وايي، د افغانستان بیارغونه باید له کورنیو امکاناتو، کورنیو پانګونو او د افغان سوداګرو له پانګې پر ګټنې ترسره شي او هېواد باید پر بهرنیو مرستو او پروژو ولاړ نه‌وي.

مجاهد ویلي؛ په تېرو لسیزو کې یو شمېر هېوادونو لکه: شوروي اتحاد او امریکا په افغانستان کې د خپلو موخو او ګټو د پلي کولو لپاره د بیارغونې او پراختیا پروژې پلې کړې دي.

د نوموړي د څرګندونو له مخې، که څه هم په افغانستان کې ځینې پروژې پلې شوي؛ خو د هېواد د اړتیاوو پر پرتله کافي نه‌وې او د بهرنیو ځواکونو د حضور پر مهال افغانستان ته د پام وړ زیانونه هم اوښتي دي.

مجاهد ټینګار کړی، چې افغان سوداګر او پانګه‌وال باید د هېواد په بیارغونه او اقتصادي ودې کې بنسټیز رول ولري.

هغه زیاتوي؛ اسلامي امارت هڅه کوي افغان سوداګر او پانګه‌وال په هېواد کې پانګونې ته وهڅوي، چې د بیارغونې او پراختیا بهیر د کورنیو پانګونو له لارې پر مخ یووړل شي.

د مجاهد د څرګندونو له مخې، کورنۍ پانګونه د افغانستان د اقتصاد د پیاوړتیا او ځان‌بسیاینې ته اړینه ده.

هغه ویلي، چې د افغانستان اوږدمهاله پراختیا باید په پای کې د افغانانو پر خپلو هڅو، پانګې او امکاناتو ولاړه وي.

Continue Reading

تازه خبرونه

متقي د اسلامي امارت له تګلارو د دفاع او له نړۍ سره د اړیکو د پیاوړتیا غوښتنه وکړه  

امیرخان متقي په روانه اوونۍ کې له بي‌بي‌سي سره د مرکې پر مهال د ښځو او نجونو پر زده‌کړو، کار، ژوندانه او د هغوی د حضوري محدودیتونو په اړه د یوې پوښتنې په ځواب کې د بشري حقونو د وضعیت په اړه نیوکې رد کړې او څرګندوي، چې پر افغانستان لګېدلي بندیزونه سیاسي انګېزه لري.

Published

on

د افغانستان بهرنیو چارو وزیر امیرخان متقي د ښځو او نجونو، بندیزونو او امنیت په اړه د اسلامي امارت له تګلارو دفاع کړې او له امریکا او نورو هېوادونو سره یې د اړیکو پر پیاوړتیا ټینګار کړی دی.

امیرخان متقي په روانه اوونۍ کې له بي‌بي‌سي سره د مرکې پر مهال د ښځو او نجونو پر زده‌کړو، کار، ژوندانه او د هغوی د حضوري محدودیتونو په اړه د یوې پوښتنې په ځواب کې د بشري حقونو د وضعیت په اړه نیوکې رد کړې او څرګندوي، چې پر افغانستان لګېدلي بندیزونه سیاسي انګېزه لري.

هغه ویلي:« دا د افغانانو په حق کې بې‌عدالتي ده. دا یوه پلمه ده. پر افغانستان د بندیزونو لګولو لپاره هیڅ منطقي دلیل نشته.»

متقي استدلال کړی، چې د تېرو څو لسیزو د جګړو؛ د امریکا او ناټو په مشرۍ د شل کلنې جګړې پر پرتله د افغانستان اوسنی وضعیت ښه شوی دی.

نوموړي زیاته کړې؛ افغانستان شاوخوا ۴۰ کاله جګړه تېره کړې او اوس اسلامي امارت هڅه کوي، چې له ختیځو او لویدیځو هېوادونو سره خپلې اړیکې پراخې کړي.

متقي وایي:« له سیمه‌ییزو او ختیځو هېوادونو سره زمونږ اقتصادي او سیاسي اړیکې او د پانګونې په برخه کې همکاري ډېره پراخه شوې ده».

هغه زیاته کړې، چې له اروپايي هېوادونو سره په اړیکو کې هم پرمختګ رامنځته شوی دی.

هغه په بلجیم کې د افغان کډوالو په اړه وروستیو« تخنیکي خبرو» ته په نغوته کې ویلي؛ دا یو مثبت پرمختګ دی او اسلامي امارت هیله لري، چې راتلونکی به ښه‌وي.

متقي ومنله، چې رسمیت پېژندنه مهمه ده؛ خو د روسیې له‌خوا د اسلامي امارت رسمیت پېژندل یې یو مثبت پرمختګ وباله.

د ښځو په اړه د افغانستان تګلارو ته باید د هېواد د ارزښتونو له مخې وکتل شي

د ښځو پر محدودیتونو د یوې پوښتنې په ځواب کې امیرخان متقي ویلي، چې د افغانستان تګلارې باید د لویدیځو ارزښتونو او معیارونو پر ځای د افغانستان د کلتوري او ټولنیزو ارزښتونو له مخې وکتل شي.

هغه وایي:« له ښځو سره چلند باید د لویدیځ د کلتور او دودونو له عینکو و نهارزول شي؛ د افغانستان ارزښتونه باید په پام کې ونیول شي.»

متقي ویلي، چې اوس‌مهال له درې میلیون ډېرې نجونې په ښوونځیو او دیني مدرسو کې زده‌کړې کوي او څرګندوي، چې په دیني مدرسو کې نجونې عصري مضامین هم زده‌کوي.

نوموړي زیاته کړې، له درې میلیون ډېرې نجونې تر شپږم ټولګي پورې په ښوونځیو کې زده‌کړې کوي او ښځینه ښوونکې هم د هغوی په زده‌کړه کې ونډه لري.

متقي د ښځینه‌وو د منځنیو زده‌کړو د محرومیت په اړه د ډیپلوماټانو او بهرنیو بنسټونو اندېښنې ومنلې او وایي، چې دا وضعیت ښايي په راتلونکې کې د ښځینه ښوونکو او ښځینه ډاکټرانو د کمښت لامل شي.

هغه څرګندوي:« دا رښتیا هم یوه ستونزه ده او ورته به پاملرنه وشي.»

متقي زیاته کړې، افغانستان اوس له دغه کمښت سره مخ نه‌دی او چارواکي هڅه کوي، چې په راتلونکې کې د دغه کمښت د رامنځته کېدا مخه ونیسي.

متقي په افغانستان کې د القاعده او بهرنیو وسله‌والو ډلو فعالیت رد کړ

د افغانستان بهرنیو چارو وزیر په افغانستان کې د القاعده او نورو بهرنیو وسله‌والو ډلو د فعالیت په اړه ادعاوې هم رد کړې.

هغه ویلي؛ اسلامي امارت به هیڅ ډلې ته اجازه ور نه‌کړي، چې د افغانستان له خاورې د نورو هېوادونو پر وړاندې د بریدونو د پلانولو لپاره کار واخلي او په افغانستان کې د بهرنیو وسله‌والو د شتون ادعاوې یې تبلیغات وبلل.

متقي وایي:« تر اوسه هیچا هیڅ ډول ثبوت نه‌دی وړاندې کړی».

نوموړي د کوکنارو د کښت له منځه وړل او د امنیتي وضعیت ښه کېدل هم له هغو بدلونونو وبلل، چې د ده په وینا باید ورته پام وشي او پر رسمیت وپېژندل شي.

له واشنګټن سره د عادي اړیکو هڅې

متقي له امریکا سره د افغانستان د اړیکو په اړه ویلي، چې اسلامي امارت له واشنګټن سره د مثبتو او عادي اړیکو غوښتونکی دی؛ خو په افغانستان کې د بهرنیو پوځي ځواکونو شتون نه‌مني.

هغه ویلي، افغانستان د پراختیا په حال کې هېواد دی او په بېلابېلو برخو کې د پانګونې فرصتونه شته؛ خو اسلامي امارت نه‌پوهیږي، چې اوس‌مهال په افغانستان کې د امریکايي پانګه‌والو لېوالتیا څومره ده.

متقي ویلي: د شاوخوا شپږ میلیون افغانانو بېرته ستنېدو پر هېواد فشارونه زیات کړي؛ خو وایي، چې بېرته ستانه شوي کسان خپلو اصلي سیمو ته لېږدول شوي دي.

هغه زیاته کړې، ډېری بېرته ستانه شوي کسان مسلکي کارکوونکي دي او اوس د افغانستان د پراختیا په بهیر کې ونډه اخلي.

سره له دې، چې د ښځو د حقونو، بشري اړتیاوو او د افغانستان د اقتصادي وضعیت په اړه نړیوالې اندېښنې اوس هم دوام لري؛ متقي ویلي، اسلامي امارت له نړیوالې ټولنې سره د ډیپلوماټیکو او اقتصادي اړیکو د پراختیا غوښتونکی دی.

دا مرکه د بي‌بي‌سي د «د انټرویو» نومې خپرونې په چوکاټ کې ترسره شوې ده؛ دغه خپرونه د نړۍ له اغېزناکو څېرو سره د مهمو نړیوالو موضوعاتو په اړه خبرې کوي.

Continue Reading

تازه خبرونه

د یوناما مرستیال او د هلمند والي د اقتصادي او پراختیايي پروژو پر پیاوړتیا ټینګار وکړ

په دې ناسته کې، چې د هلمند ولایت مقام د غونډو په تالار کې جوړه شوې وه، د دغه ولایت د عمومي وضعیت، امنیت او ثبات ترڅنګ د اقتصادي فعالیتونو، پراختیايي چارو، روغتیا، کرنې، د پروژو لپاره د بودجې جلب او د کرنیزو او تولیدي توکو د بازار موندنې په اړه خبرې شوې دي.

Published

on

د هلمند والي امان‌الدین منصور او د افغانستان لپاره د ملګرو ملتونو د مرستندویه پلاوي(یوناما) د مرستیال برونو لیمارکي ترمنځ په ناسته کې د اقتصادي او پراختیايي پروژو پر پیاوړتیا، د روغتیايي چوپړتیاوو پراختیا، د کرنیزو محصولاتو د بازار موندنې او د کوکنارو د بدیل معیشت برابرولو ټینګار وشو.

په دې ناسته کې، چې د هلمند ولایت مقام د غونډو په تالار کې جوړه شوې وه، د دغه ولایت د عمومي وضعیت، امنیت او ثبات ترڅنګ د اقتصادي فعالیتونو، پراختیايي چارو، روغتیا، کرنې، د پروژو لپاره د بودجې جلب او د کرنیزو او تولیدي توکو د بازار موندنې په اړه خبرې شوې دي.

د یوناما مرستیال برونو لیمارکي ویلي، په هلمند کې رامنځته شوي امنیت او ثبات د اقتصادي او پراختیايي فعالیتونو لپاره ښه زمینه برابره کړې او یوناما په دې برخه کې له ترسره شویو هڅو ملاتړ کوي.

نوموړي د کوکنارو د کښت د مخنیوي ترڅنګ بزګرانو ته د حلال او دوامدار بدیل معیشت د برابرولو اړتیا مهمه وبلله او وایي، چې د قانوني او ګټورو کرنیزو بدیلونو پیاوړتیا کولی شي د بزګرانو اقتصادي ستونزې راکمې کړي.

دغه اراز هغه ویلي، په هلمند کې یو شمېر مهمې اقتصادي او پراختیايي پروژې روانې دي؛ خو د دغو پروژو د پراختیا او د خلکو د ملاتړ لپاره ډېرو ګډو هڅو ته اړتیا ده.

په دې ناسته کې د پروژو لپاره د بودیجې د جلب او د روغتیايي چوپړتیاوو د پراختیا په اړه هم خبرې شوې دي او د اړوند ادارو ترمنځ پر ډېرې همغږۍ او همکارۍ ټینګار وشو.

د هلمند والي امان‌الدین منصور د ولایت د عمومي وضعیت، امنیت، اقتصادي فعالیتونو، پراختیايي چارو، روغتیا، پوهنې او کرنې په اړه معلومات ورکړل او د هلمند د خلکو د اړتیاوو د پوره کولو لپاره یې د ډېرو همکاریو غوښتنه وکړه.

دغه اراز د هلمند د پنبې او نورو کرنیزو او تولیدي توکو د بازار موندنې په اړه تفصیلي خبرې وشوې او څرګندوي، چې ازبکستان د افغانستان د پنبې پېرلو ته ښه لېوالتیا ښودلې ده.

په دې ناسته کې د هلمند والي او د یوناما مرستیال ترڅنګ د ولایت مقام، پوهنې، کډوالو چارو، اقتصاد، عامې روغتیا، کرنې او معدن او صنایعو خونې مسوولانو هم ګډون کړی و.

د یوناما له مرستیال سره په افغانستان کې د ملګرو ملتونو د ښځو د برابرۍ او پیاوړتیا ادارې عمومي رییسې سوزن فرګوسن، په افغانستان کې د کډوالۍ نړیوالې ټولنې د دفتر عمومي رییسې میاه پارک، په افغانستان کې د نشه‌يي توکو او جرمونو په اړه د ملګرو ملتونو د دفتر عمومي رییس پولیا لوکي سیري، د یونیسف او د کډوالو عالي کمیشنرۍ استازو او یو شمېر نورو مسوولانو ملتیا کوله.

ویل کیږي، چې دواړو لوریو د هلمند د خلکو د اړتیاوو د پوره کولو، د اقتصادي او پراختیايي فعالیتونو د پیاوړتیا، د روغتیايي چوپړتیاوو د پراختیا، د کرنیزو محصولاتو د بازار موندنې او نورو ګډو برخو کې د همکاریو پر دوام او پیاوړتیا ټینګار وکړ.

Continue Reading
Advertisement

Trending

Copyright © 2026 Ariana News. All rights reserved!