Connect with us

سیمه ییز خبرونه

د ایران مهم اټومي سایټونه د امریکا د هوايي بریدونو له کبله له منځه تللي دي – ټرمپ

له څو ورځو بحثونو وروسته او د هغه د دوه اوونیز ضرب الاجل څخه وروسته د ټرمپ پرېکړه وکړه، چې د اسرائیلو د خپل لوی سیال ایران پر وړاندې له پوځي کمپاین سره یوځای شي.

خپور شوی

د

رویټرز راپور ورکړ، چې د امریکا ولسمشر ډونالډ ټرمپ د شنبې پر ورځ ناوخته ویلي، چې امریکایي ځواکونو د ایران درې بنسټیز اټومي سایټونه پر نښه کړل او تهران ته یې خبرداری ورکړ، چې که سوله ونه مني؛ نو له نورو بریدونو سره به مخ شي.

له څو ورځو بحثونو وروسته او د هغه د دوه اوونیز ضرب الاجل څخه وروسته د ټرمپ پرېکړه وکړه، چې د اسرائیلو د خپل لوی سیال ایران پر وړاندې له پوځي کمپاین سره یوځای شي.

ټرمپ په یوه ټلویزیوني وینا کې ویلي: “بریدونه یوه په زړه پورې پوځي بریا وه. د ایران مهم اټومي بډایه کولو تاسیسات په بشپړ ډول له منځه تللي دي.”

په دې وینا کې، چې یوازې درې دقیقې یې دوام وکړ ټرمپ وویل، چې د ایران راتلونکې “یا سوله یا تراژیدي” ده او داسې نورې موخې شته، چې امریکایي پوځ یې پر نښه کړي.

نوموړي زیاته کړې؛”که سوله ژر نه رامنځته نشي، مونږ به نورې موخې پر دقت، سرعت او مهارت تعقیب کړو.”

سي‌بي‌ایس نیوز راپور ورکړ، چې امریکا د شنبې پر ورځ له ایران سره په ډیپلوماټیک ډول اړیکه ونیوله او ویې ویل، چې بریدونه ټول د امریکا پلانونه دي او موخه یې د رژیم بدلون ندی.

په دې راپور کې راغلي ټرمپ ویلي، چې امریکایي ځواکونو د ایران پر درې بنسټیزو اټومي سایټونو: نطنز، اصفهان او فردو برید وکړ. هغه فاکس نیوز ته ویلي، چې پر فردو شپږ سنګر ماتوونکي بمونه غورځول شوي. په داسې حال کې، چې د نورو اټومي ځایونو پر وړاندې 30 تاماهاک توغندي توغول شوي دي

د امریکا یوه چارواکي، د نوم نه ښودلو پر شرط رویټرز ته ویلي، چې په بریدونو کې د امریکا بي-۵۲ الوتکې ښکېل وې.

ټرمپ لیکلي: “په لومړني سایټ فردو کې د بمونو بشپړ بار غورځول شوی. فورډو له منځه تللی دی.”

هغه زیاته کړې: “ایران باید اوس د دې جګړې پر پای ته رسولو هوکړه وکړي.”

رویټرز د شنبې پر ورځ د بي-۵۲ الوتکو د حرکت په اړه راپور ورکړی و، چې کولی شي د سترو بمونو لېږدولو لپاره وکارول شي. د کارپوهان پر اند د فردو د برید لپاره،  چې د تهران سویل ته د غره لاندې ښخ شوی دی. احتمال لري، چې د بریدونو اغېزې به څو ورځې وخت ونیسي. که ډېر نه وي.

د تسنیم خبري سرچینې د ایران یوه چارواکي له قوله، تائید کړې، چې د فردو سایټ یوه برخه د “دښمن تر هوایي بریدونو” لاندې راغلي دي.

د ایران دولتي نشراتي شبکې صدا او سیما مرستیال سیاسي مشر حسن عابدیني ویلي، چې ایران څه وخت مخکې دا درې سایټونه خالي کړي دي.

هغه دې چینل ته وویل: ” غني شوي یورانیم زیرمې له اټومي مرکزونو څخه لېږدول شوي او هلته هیڅ داسې مواد ندي پاتې شوي، چې که پر نښه شي؛ د وړانګې به یې زمونږ د هېوادوالو لپاره زیانمنې نشي.”

د اسرائیلو لومړي وزیر بنیامین نتانیاهو ټرمپ ته د هغه د “زړورې پرېکړې” مبارکي ورکړه.

نتانیاهو ویلي: “تاریخ به ثبت کړي، چې ولسمشر ټرمپ د نړۍ پر ترټولو خطرناک رژیم او د نړۍ پر ترټولو خطرناک وسلو برید وکړ.”

رویټرز راپور ورکړی؛ دا بریدونه په داسې حال کې ترسره شوي، چې اسرائیل او ایران له یوې اوونۍ څخه ډېره هوایي جګړه کړي په د دواړو هېوادونو خلک له مرګ او ژوبلې سره مخ شوي دي.

اسرائیلو پر ایران بریدونه پیل کړل او څرګنده کړې يې ده، چې دوی غواړي د تهران د اټومي وسلو د پراختیا هر چانس له منځه یوسي.

ایران ويلي، چې د دوی اټومي پروګرام یوازې د سوله‌ییزو موخو لپاره دی.

د لویدیځو هېوادونو لخوا د دښمنیو د بندولو لپاره ډیپلوماټیکې هڅې ناکامې شوې دي.

د ملګرو ملتونو عمومي منشي انټونیو ګوټرش ویلي؛ د شنبې د ورځې بریدونه “په سیمه کې د جګړې خطر له مخکې زیات کړی او دا بریدونه د نړیوالې سولې او امنیت لپاره مستقیم ګواښ” دی.

د امریکا ډیموکراټانو او ځینو جمهوري غوښتونکو قانون جوړووونکو استدلال کړی و، چې ټرمپ باید د ایران پر وړاندې د هر ډول جګړې لپاره د ځواکونو له لېږلو مخکې د له کانګرس څخه اجازه ترلاسه کړي.

د جمهوري غوښتونکو د سنا د وسلوالې کمیټې رییس راجر ویکر د مسی‌سی‌پي استازي له دې عملیاتو ستاینه وکړه؛ مګر خبرداری یې ورکړ، چې امریکا اوس “له جدي غوراویو سره مخ شوې ده.

د جمهوري غوښتونکو یو قانون جوړونکي، له توماس ماسي څخه د کنټاکي استازي ویلي، “دا د اساسي قانون له مخې عمل ندی.”

د ډیموکراټانو استازي الکساندریا اوکاسیو-کورټیز ویلي، چې دا “په بشپړ ډول د استیضاح لپاره زمینه برابروي.”

د ټرمپ د MAGA غورځنګ ډېرو غړو په بهرنیو نظامي عملیاتو کې د امریکا د ښکېلتیا مخالفت کړی دی.

د ټرمپ متحد سټیو بینن په خپل وار په پوډکاسټ خونه کې وویل؛ د ولسمشر وینا شاید هغه څه نه‌وي، چې د MAGA ډېری ملاتړي یې اوریدل غواړي او له ټرمپ یې وغوښتل، چې د دې لپاره “ژور وضاحت” وړاندې کړي، چې ولې د امریکا ښکېلتیا اړینه وه.

له ټرمپ سره تړلي مبصر چارلي کرک په ایکس پاڼه کې ولیکل: “امریکا له ولسمشر ټرمپ سره ولاړه ده.”

اسرائیل د جون پر دیارلسمه بریدونه پیل کړل او ویې ویل، چې ایران د اټومي وسلو د پراختیا په درشل کې دی.

اسرائیل په پراخه کچه داسې انګیرل کیږي، چې اټومي وسلې لري، چې دا نه تائیدوي او نه یې ردوي.

د ایران دولتي ورځپاڼې نور نیوز د روغتیا وزارت د څرګندونو له مخې ویلي، چې د اسرائیلو د بریدونو له پیل راپدېخوا په ایران کې لږترلږه ۴۳۰ کسان وژل شوي او ۳۵۰۰ نور ټپیان دي.

په اسرائیلو کې د سیمه‌ییزو چارواکو د څرګندونو له مخې؛ د اوږدې مودې دښمنانو ترمنځ په بدترین شخړه کې د ایران پر توغندیزو بریدونو ۲۴ ملکي وګړي وژل شوي دي. د اسرائیلو د لومړي وزیر د دفتر پر وینا، له ۴۵۰ څخه ډېر ایراني توغندي د اسرائیلو پر لور توغول شوي دي.

اسراییلي چارواکو ویلي، چې د جګړې له پیل راپدېخوا ۱۲۷۲ کسان ټپیان شوي دي.

سیمه ییز خبرونه

له برید درولو وروسته ایران له امریکا سره پر لنډمهالي اوربند هوکړه وکړه

دا هوکړه له هغې وروسته رامنځته شوې، چې د امریکا ولسمشر ډونالډ ټرمپ په ټروټ‌پاڼه کې ولیکل؛ که تهران د هرمز تنګي بېرته پرانېستلو ته چمتو شي؛ واشنګټن به پر ایراني ودانیزو بنسټونو خپل له ګواښه ډک بریدونه وځنډوي.

Published

on

ایران له امریکا سره د دوه اوونیو لپاره پر اوربند هوکړه کړې، چې موخه یې د کړکېچ کمول او په سیمه کې د تاوتریخوالي د پراخېدا مخنیوی دی.

دا هوکړه له هغې وروسته رامنځته شوې، چې د امریکا ولسمشر ډونالډ ټرمپ په ټروټ‌پاڼه کې ولیکل؛ که تهران د هرمز تنګي بېرته پرانېستلو ته چمتو شي؛ واشنګټن به پر ایراني ودانیزو بنسټونو خپل له ګواښه ډک بریدونه وځنډوي.

ټرمپ څرګنده کړې: «ما منلې، چې د دوه اوونیو لپاره بریدونه وځنډوم؛ په‌دې شرط، چې ایران هرمز تنګی بېرته پرانیزي.»

هغه له دې مخکې خبرداری ورکړی و، چې « نن شپه به یو تمدن له منځه ولاړ شي.»

دا لنډمهالی د دوه اوونیو اوربند د پاکستان پر منځګړیتوب رامنځته شوی دی.

د پاکستان لومړي وزیر شهباز شریف تائید کړې، چې اوربند به سمدستي نافذ شي او دا چاره به پراخو ډیپلوماټیکو پرمختګونو ته هیلې راوپاروي.

د ایران ملي امنیت عالي شورا هم تائید کړې؛ تهران د اوربند وړاندیز منلی، چې له څو اوونیو کړکېچ وروسته د تاوتریخوالي د کمولو پر لوري د تګ یوه نښه ده.

دغه راز د ایران بهرنیو چارو وزیر سید عباس عراقچي ویلي، چې د هېواد وسله‌وال ځواکونه به په دوه اوونیو کې د هرمز له تنګي د خوندي تګ راتګ زمینه برابره کړي؛ خو په‌دې شرط، چې پر ایران بریدونه ودرول شي.

نوموړی وایي: « که تېری ودرېږي؛ زمونږ ځواکونه به د خوندي تګ راتګ ډاډ ورکړي.»

هغه د هرمز تنګي ته په نغوته( اشاره) کې ویلي؛ د نړۍ شاوخوا پېنځمه برخه تېل ترې لېږدول کېږي.

ایران یاد تنګی له امریکا سره د کړکېچ په غبرګون کې تړلی و، چې ورسره پر نړۍ‌واله کچه د انرژۍ د وړاندې کولو او سمندري امنیت اندېښنې هم راوپارېدلې. د دې لارې بیا پرانېستل؛ که څه هم لنډمهاله تمه ده، خو پر نړۍ‌والو بازارونو به فشار راکم او د پراخې اقتصادي ګډوډۍ مخه ونیسي.

یاد کړکېچ، چې د فبرورۍ میاشتې په وروستیو کې مخ پر پراخېدو شو؛ په منځني ختیځ کې یې پرله‌پسې بریدونه او زیاتېدونکی تاوتریخوالی رامنځته کړ. که څه هم اوربند د جګړې د درېدا اړین پړاو ګڼل کېږي؛ خو مهمې ستونزې( بندیزونه، سیمه‌ییز امنیتي ترتیبات او په سیمه کې د امریکايي ځواکونو شتون) اوس هم حل شوې نه‌ دي.

ټاکل شوې، چې په راتلونکو ورځو کې د ایران او امریکا ترمنځ خبرې پیل شي او پاکستان به د آسانتیاوو برابرونکي رول ولوبوي.

شنونکي څرګندوي؛ دا خبرې به پرېکړه کوونکې وي او دا پوښتنه راپورته کوي، چې آیا دا لنډمهالی اوربند به پر اوږدمهاله هوکړه بدل شي که نه؟!

سره له دې پرمختګه څارونکي خبرداری ورکوي، چې وضعیت اوس هم نازک دی او هر ډول نوی تاوتریخوالی کولی شي ترلاسه شوې لاسته راوړنې چټکې له منځه یوسي.

له دې مخکې امریکایي خبري رسنۍ آکسیوس راپور ورکړی و، چې ایران، امریکا او یو شمېر سیمه‌ییز منځګړي(پاکستان، مصر او سعودي عربستان ) د ۴۵ ورځني اوربند لپاره پر یوې داسې طرحې بحث کوي، چې که اوربند ومنل شي؛ نو د جګړې پای به ورسره ډاډمن شي.

Continue Reading

سیمه ییز خبرونه

د سپاه پاسدارانو د استخباراتو رییس ووژل شو

دغه راز ایران د اسرائیلو پر وړاندې د توغندیو او څارګرو الوتکو بریدونو نوې څپه پیل کړې ده.

Published

on

په منځني ختیځ کې د تاوتریخوالي له زیاتېدا سره هم‌مهاله راپورونه ښیي، چې د امریکا او اسرائیلو په ګډ هوايي برید کې د ایران د سپاه پاسدارانو د استخباراتو مشر سید مجید خادمي وژل شوی او ایراني سرچینو هم دا خبر تائید کړی دی.

دغه راز ایران د اسرائیلو پر وړاندې د توغندیو او څارګرو الوتکو بریدونو نوې څپه پیل کړې ده.

راپورونه ښيي، چې دې هېواد د بریدونو اووه‌پنځوسمه څپه پیل کړې ده.

تل ابیب هغه سیمه شمېرل شوې، چې څانګیزو بمونو له ټولو ډېره ځپلې او په اوسیدونکو کې یې وېره رامنځته شوې ده. د حیفا، پتح تیکوا ښارونه او د لویدیځې غاړې ځینې برخې هم پر نښه شوې دي.

راپورونه ښیي، چې د ایران پر تهران، بوشهر او اهواز ښارونو بریدونه شوي. په داسې حال کې، چې ایران د بغداد او سلیمانیې امریکایي اډې پر نښه کړې دي.

دغه راز اسرائیلو په لبنان کې د بیروت او نبطیه پر اړوند سیمو بریدونه کړي دي.

ویل کیږي، چې د متقابلو بریدونو په سیمه کې د پراخو شخړو اندېښنې زیاتې کړې دي.

Continue Reading

سیمه ییز خبرونه

په اصفهان کې مو د امریکا C-130 ملاتړې الوتکه رانسکوره کړه – ایران

تسنیم نیمه رسمي خبري سرچینې راپور ورکړی، چې یاده الوتکه «د پولیسو د یوې ځانګړې قطعې د درندو ډزو له کبله ویجاړه شوې ده.»

Published

on

ایران د یکشنبې پر ورځ ادعا وکړه، چې د اصفهان په جنوبي سیمه کې یې د امریکا C-130 ملاتړې الوتکه ویشتلې ده.

تسنیم نیمه رسمي خبري سرچینې راپور ورکړی، چې یاده الوتکه «د پولیسو د یوې ځانګړې قطعې د درندو ډزو له کبله ویجاړه شوې ده.»

د ایران سپاه پاسداران د دولتي سرچینې ایرنا له‌خوا په خپور شوي راپور کې ویلي، چې «د فضايي ځواک، ځمکنیو واحدونو، ولسي او بسیج ځواکونو، امنیتي ځواکونو او اردو ګډ عملیاتو د دښمن الوتکه له منځه یږړه.»

د دولتي پریس ټلویزیون خبري سرچینې په ټیلیګرام کې د غورځول شوې الوتکې د ټوټو انځورونه خپاره کړي دي.

د امریکا په ټولنیزو رسنیو کې ځینې لومړني راپورونه شيي؛ ممکن امریکایي ځواکونو خپله الوتکه د F-15 د عملې د دوه‌یم غړي د ژغورلو پرمهال ویجاړه کړې وي، چې مخکې د ایران په خاوره کې ویشتل شوې وه.

د ایران د ادعا په اړه د امریکا له‌خوا هیڅ رسمي ځواب ورکړ شوی ندی.

دا پېښه په داسې حال کې رامنځته کېږي، چې د فبروري پر اته‌ویشتمه پر ایران د امریکا او اسرائیلو له ګډ برید وروسته په سیمه کې تاوتریخوالی زیات شوی دی. په دې عملیاتو کې د پخواني مشر علي خامنه‌یي په ګډون له ۱۳۴۰ څخه ډېر کسان وژل شوي دي.

ایران هم امریکایي اډې په اسرائیلو، اردن، عراق او خلیجي هېوادونو کې له غچ‌اخیستونکو بریدونو سره مخ کړي او د هرمز د سټراتیژیک تنګي له لارې یې بار وړل محدود کړي دي.

Continue Reading
Advertisement

Trending

Copyright © 2025 Ariana News. All rights reserved!