Connect with us

لوبی

د ۲۰۲۳ اسیا جام په اړه د پوهېدا لپاره اړین ټکي

خپور شوی

د

Last Updated on: وږی ۸, ۱۴۰۲

د ۲۰۲۳ اسیا جام سیالۍ به چارشنبه (د وږي ۸ / د اګست ۳۰ ) د ورځې بر ۱:۳۰ پیل شي او شپږ لوبډلې د دې سیالیو د اتلولۍ لپاره سیالۍ ته چمتو دي او د سږنیو سیالیو ګډ کوربه‌توب سریلانکا او پاکستان کوي.

افغانستان هم له بنګله دېش او سریلانکا سره ځای په ب ګروپ کې راغلی او هند، پاکستان او نیپال په الف ګروپ کې دي.

دا به په دې سیالیو کې د نیپال لومړۍ لوبه وي.

د نیپال لوبډلې د اسیا کرکت شورا د غوره لیګ د لومړي پړاو له ګټلو سره د اسیا جام سیالیو ته لار وموندله او په پای لوبه کې یې عربي متحده اماراتو ته پر اووه ویکتو ماتې ورکړه.

اسیا جام په ۱۹۸۴ ز.کال کې د یو ورځنیو نړیوالو بڼو له لارې پیل شو. که څه هم وروستي پړاوونه یې د یو ورځنیو نړیوالو او شل اوریزو بڼو ترمنځ بدل شوي دي.

د ۲۰۲۳ پړاو به د یو ورځنیو نړیوالو سیالیو په توګه ترسره شي.

هند په دې تورنمنت کې له اووه اتلولیو سره تر ټولو بریالۍ لوبډله ده. سریلانکا د شپږ اتلولیو له لرلو سره دوه‌یم ځای لري او پاکستان دوه ځله د اسیا جام اتلولي ګټلې ده.

د ۲۰۲۳ ز.کال اسیا جام په سیالیو کې د درې – درې لوبډلې په دوه ګروپونو کې لوبیږي او هره لوبډله به په خپل ګروپ کې لوبې کوي. بیا به د هر ګروپ دوه غوره لوبډلې څلورم پړاو ته لار مومي.

غوره څلور لوبډلې به یو بل ګټي او دوه غوره لوبډلې به فاینل ته ځي، چې د وږي پر ۲۶ / د سپتمبر پر ۱۷ به په کولمبو کې ترسره شي.

ټولټال ۱۳ لوبې به د وږي له ۸ / د اګست له ۳۰ څخه د وږي تر ۲۶ / د سپتمبر تر ۱۷ پورې ترسره شي. د دې تورنمنت یا سیالیو ګروپي پړاو به وږي له ۸ / د اګست له 30 څخه د وږي ۱۴ / د سپتمبر تر ۵ پورې ترسره شي، چې درې لوبې به یې په پاکستان او پاتې په سریلانکا کې ترسره کیږي.

د غوره څلورو لوبډلو پړاو به د وږي له ۱۵ څخه د وږي تر ۲۴ / د سپټمبر له 6 څخه تر 15 پورې، چې پېنځه لوبې به په سریلانکا او یوه په پاکستان کې ترسره شي. فاینل به د وږي پر ۲۶ / د سپتمبر پر ۱۷ د سریلانکا د کولمبو د آر پریماداسا لوبغالي کې ترسره شي.

د اسیا جام سیالۍ به د پاکستان او سریلانکا په څلورو ځایونو کې ترسره شي؛ ملتان او لاهور به په پاکستان کې او کینیدي او کولمبو به په سریلانکا کې د لوبو کوربه وي.

افغانستان دغه تورنمنت ته په داسې حال کې ځي، چې دې لوبډلې ته په دې وروستیو کې پاکستان ۳-۰ ماتې ورکړه؛ خو د افغانستان لوبډله کولی شي په یو ورځنیو نړیوالو لوبو کې خپلې زړه راکښونکې هڅې وکاروي.

افغانستان د جون په میاشت کې د سریلانکا پر وړاندې ۲-۱ مات شو؛ خو زړورتیا یې وښوده او د جولای په میاشت کې یې د بنګله دیش پر وړاندې د یو ورځنیو لوبو لړۍ ۲-۱ وګټله. دا لوبډله به په اسیا جام سیالیو کې د خپلو برلاسو لوبغاړیو پر مټ ښه وځلیږي.

د افغانستان د لوبغاړو نوملړ:

حشمت الله شهیدي (لوبډلمشر) رحمان الله ګربز(ویکت ساتونکی) اکرام علي خېل (ویکت ساتونکی) ابراهیم ځدراڼ، ریاض حسن، رحمت شاه، نجیب الله ځدراڼ، محمد نبي، کریم جنت، ګلبدین نایب، راشد خان، عبدالرحمن، شرف الدین اشرف، مجیب الرحمن، نوراحمد، محمد سلیم ساپی او فضل الحق فاروقي.

آریانا تلویزیون به هره ورځ په ټول هېواد کې د کرکت مینه‌والو لپاره د وږي پر ۸ / د اګست پر ۳۰ د چارشنبې پر ورځ ۱:۳۰ پر ژوندۍ بڼه خپروي. فاینل لوبه به د وږي پر ۲۶ / د سپتمبر پر ۱۷ په کولمبو کې ترسره شي.

په دې سیالیو کې شپږ لوبډلې برخه اخلي، چې پر دوه ګروپونو وېشل شوې دي؛ هند، نیپال او پاکستان په الف ګروپ کې او افغانستان، سریلانکا او بنګله دېش په ب ګروپ کې دي.

افغانستان به په ګروپي پړاو کې لومړۍ لوبه د وږي پر ۱۲ / د سپتمبر پر ۳  د پاکستان په لاهور ښار کې له بنګله دېش سره کوي. له دې وروسته به لوبډله د وږي پر ۱۵ / د سپتمبر پر پېنځمه په لاهور کې هم له سریلانکا سره لوبه کوي.

د یادونې ده، چې ټولې لوبې به هره ورځ اریانا تلویزیون پر ژوندۍ بڼه خپروي.

د سیالیو پر مهالوېش د پوهیدو لپاره داځای  کېکاږئ!

لوبی

هندوستان د درېیم ځل لپاره د ۲۰ آوریز نړیوال جام اتلولي خپله کړه

وروستۍ لوبه، چې د احمد‌آباد په نریندرا مودي لوبغالي کې له ۸۶زره څخه د زیاتو ننداره‌کوونکو پر ګډون ترسره شوه، چې ډیری یې هندي مینه‌وال ول.

Published

on

د هندوستان کرکټ ملي لوبډلې د یکشنبې پر ورځ نیوزیلینډ  ته پر ماته ورکولو د درېیم ځل لپاره د ۲۰ آوریز نړیوال جام اتلولي خپله کړه.

وروستۍ لوبه، چې د احمد‌آباد په نریندرا مودي لوبغالي کې له ۸۶زره څخه د زیاتو ننداره‌کوونکو پر ګډون ترسره شوه، چې ډیری یې هندي مینه‌وال ول.

هند دا سیالي د ۹۶ منډو پر توپیر وګټله او بیا یې هم د ۲۰ آوریز نړیوال جام له اتلولي دفاع وکړه.

دې بري د هند لپاره ځانګړی ارزښت درلود؛ ځکه، چې په دې لوبغالي کې یې درې کاله مخکې ۵۰ آوریز نړیوال جام آسټرالیا ته بایللی و.

په دې لوبه کې د هند لوبډلې د ۵ ویکټو پر له لاسه ورکولو ۲۵۵ منډې جوړې کړې؛ سنجو سمسون له ۸۰ ډېرې منډې وکړې.

د توپ‌اچونې په برخه کې جسپریټ بومراه زړه‌راکښونکې هڅه لرله او د څلور ویکټو پر اخیستلو یې خپله لوبډله بریا ته ورسوله او د لوبې غوره لوبغاړی ونومول شو.

Continue Reading

لوبی

افغانستان متحده عربي امارات ته د ۵ ویکټو پر توپیر ماتې ورکړه

په دې لوبه کې، چې نن (دوشنبه د سلواغې اووه‌ویشتمه ) په ډیلي کې ترسره شوه؛ اماراتو لومړی توپ‌وهنه وکړه او د ۹ ویکټو په بدل کې یې ۱۶۰ منډې جوړې کړې. مجیب الرحمن او عظمت الله عمرزی هر یوه دوه ـ دوه ویکټې واخیستې.

Published

on

د افغانستان کرکټ ملي لوبډلې د متحده عربي اماراتو ملي لوبډلې ته پر ماتې ورکولو د ۲۰ آوریز نړیوال جام راتلونکې پړاو ته د لارموندلو هیلې ژوندۍ وساتلې.

په دې لوبه کې، چې نن (دوشنبه د سلواغې اووه‌ویشتمه ) په ډیلي کې ترسره شوه؛ اماراتو لومړی توپ‌وهنه وکړه او د ۹ ویکټو په بدل کې یې ۱۶۰ منډې جوړې کړې. مجیب الرحمن او عظمت الله عمرزی هر یوه دوه ـ دوه ویکټې واخیستې.

هدف ته د رسېدو لپاره افغانستان کمزوری پیل درلود؛ ځکه رحمن الله ګربز پرته له دې، چې کومه منډه وکړي وسوځېد. ابراهیم ځدراڼ د ۵۳ منډو، عظمت الله عمرزي د ۴۰ منډو او دروېش رسولی د ۳۳ منډو پر مټ لوبه وکړه او افغانستان په داسې حال کې بریا خپله کړه، چې څلور توپونه پاتې ول.

له دې بریا سره افغانستان دوه نمرې ترلاسه کړې او د جام د غوره اته لوبډلو پړاو ته د رسېدو خپلې هیلې یې ژوندۍ وساتلې.

ټاکل شوې، چې افغانستان په خپله راتلونکې لوبه کې د پنجشنبې پر ورځ له کاناډا سره مخامخ شي.

Continue Reading

لوبی

افغان ملي لوبډله د اماراتو پر وړاندې د ۲۰ آوریز جام برخلیک ټاکونکې لوبه کوي

دغه لوبه د نوي ډیلي په آرون جیټلي لوبغالي کې د  ترسره کېږي او سیالي د ځايي وخت له مخې د سهار پر ۱۰:۰۰ بجو پیل شوې ده.

Published

on

د افغانستان کرکټ ملي لوبډله نن (دوشنبه د سلواغې اووه‌ویشتمه) د ۲۰ آوریز نړیوال جام د ګروپي پړاو په درېیمه لوبه کې له متحده عربي اماراتو لوبډلې سره مخامخ کېږي.

دغه لوبه د نوي ډیلي په آرون جیټلي لوبغالي کې د  ترسره کېږي او سیالي د ځايي وخت له مخې د سهار پر ۱۰:۰۰ بجو پیل شوې ده.

د افغانستان لوبډلې په ګروپي پړاو کې خپلې مخکنۍ دوه لوبې د نیوزیلینډ او سویلي افریقا وړاندې بایللې دي او دا لوبه بل پړاو ته د رسېدو د هیلو د ژوندي ساتلو لپاره ځانګړی ارزښت لري.

Continue Reading
Advertisement

Trending

Copyright © 2025 Ariana News. All rights reserved!