تازه خبرونه
سږ کال افغانستان ته لږه بودجه برابره شوې – ملګري ملتونه
د ملګرو ملتونو د بشري چارو د همغږۍ دفتر (اوچا) اندېښنه څرګندوي، چې نړیوالې ټولنې په روان کال کې له افغانستان سره د مرستو د پروګرامونو په لړ کې لږه بودجه برابره کړې او د بودجې کمښت د مرستو پروګرامونه د ځنډېدا له ګواښ مخ کړي دي.
اوچا د یکشنبې پر ورځ ( د کب دیارلسمه) په ایکس پاڼه کې لیکلي، چې سږکال یې د بشري مرستو د پروګرامونو لپاره له نړیوالې ټولنې څخه ډېره لږ بودجه ترلاسه کړې ده.
د اوچا د څرګندونو له مخې: په ۲۰۲۳ کال کې بشرپاله همکارانو ۲۳ دعشاریه یو میلیون وګړو ته لږ تر لږه یو ډول مرسته برابره کړې؛ خو په ۲۰۲۴ کال کې د اړتیاوو د پوره کولو لپاره له درې اعشاریه صفر ۶ میلیارډ بودجې څخه یوازې ۸۷ میلیون ډالر د بشري اړتیاوو د پوره کولو لپاره ترلاسه شوي، چې د ډېرو پروګرامونو بهیر یې له ګواښ سره مخ کړی دی.
د اوچا په راپور کې راغلي، چې د تېر ۲۰۲۳ کال له جنورۍ څخه تر ډسمبر پورې د بشري مرستو چمتو کوونکیو ۲۶ اعشاریه ۳ میلیون افغانانو ته خواړه، د بدیل معیشت په برخه کې ۱۶ اعشاریه ۵ میلیون کسانو ته روغتیايي خدمتونه، ۹ اعشاریه ۹ میلیون ته د اوبو او حفظ الصحې، ۵ اعشاریه ۷ میلیون ماشومانو او امیدواره او شیدې ورکوونکیو میندو ته تغذیه، ۳ اعشاریه ۵ میلیون ته د ژغورنې ملاتړ، ۲ میلیون ماشومانو ته د ښوونې او روزنې په برخه کې او یو میلیون نورو کسانو ته د سرپناه او غیر خوراکي توکو مرستې برابرې کړې دي.
د ملګرو ملتونو دغې ادارې ویلي، چې په ټوله کې یې تېر کال ۳۲ اعشاریه یومیلیون کسانو ته مرستې رسولي، چې ۲۷ اعشاریه ۶ میلیون کسانو نیغ پر نیغه ورڅخه ګټه اخیستې ده. د دغو پروګرامو لپاره ۸۵۰ میلیون بودجه د ۲۰۲۲ کال څخه د پاتې پیسو څخه د ۲۰۲۳ کال په یو اعشاریه ۴۷ میلیارډ ډالرو بودجه کې استفاده شوې ده.
اوچا ویلي، چې تېرکال هم ملګري ملتونه د بودجې د کمښت له کبله ۱۸ میلیون افغانانو ته د خوړو مرستو بندیدو او ۳ اعشاریه ۴ میلیون نورو سره د مرستو نیمايي کمیدلو ته اړ شوي وه.
د خوړو نړیوال پروګرام د بودجې د کمښت له کبله د تېر ۲۰۲۳ کال په اګست کې دې ته اړ شو، چې په افغانستان کې لس میلیون مرستو ته پر اړو افغانانو خپلې مرستې بندې کړي.
د ملګرو ملتونو د بشري مرستو د همغږۍ ادارې (اوچا) د روان ۲۰۲۴ کال په سر کې د افغانانو د بشري ضرورتونو د پوره کېدو لپاره له نړیوالې ټولنې څخه د ۳ اعشاریه ۶ میلیارډ ډالرو د بودجې د چمتو کولو غوښتنه کړې وه.
اوچا د تېرو لسیزو له جګړو څخه زیږیدلې لوږې، د اقلیمي بدلون اغېزو، پر ښځو محدودیتونو او له پاکستان او ایران څخه د راستنېدوکو کډوالو وضعیت ته پر کتو اټکل کړی، چې په ۲۰۲۴ ز. کال کې به هم افغانان د تېر کال پر پرتله ډېرو بشري مرستو ته اړتیا ولري.
اوچا د افغانستان وضعیت اوس هم خراب ارزولی او خښ شوي ماینونه او ناچاودې توکي، په ازاد تګ راتګ باندې محدودیتونه، د جنسیت پر بنسټ د تاوتریخوالي زیاتوالي، پر ماشومانو درانده کارونه او په کوچنیتوب کې ودونه د افغانانو د لویو ستونزو په توګه یادې کړې دي.
اوچا په افغانستان کې د اقلیم د اغېزو په اړه ویلي، چې د اقلیم بدلون په ټول هېواد کې د اوبو بحران نور هم پراخه کړی، چې ورسره د روان کال په اکتوبر کې د هرات ویجاړوونکیو زلزلو، خوړو، روغتیا او تغذیې د افغانانو اړتیاوې نورې هم زیاتې کړې دي.
اوچا په ۲۰۲۴ کال کې له ایران او پاکستان څخه افغانستان ته د یو اعشاریه ۴۶ میلیون افغان کډوالو د جبري ستنېدا اټکل کړی دی.
د ملګرو ملتونو د بشري مرستو د همغږۍ دفتر ویلي، چې اوس افغانستان په کوردننه د بې ځایه شویو کورنیو د شمېر له کبله په نړۍ کې دوهیم هېواد دی، چې افغانان په کې له خپلو مینوبې ځایه شوي دي.
د ملګرو ملتونو د بشردوستانه مرستو د پلان له مخې؛ په ۲۰۲۴ کال کې به د افغانستان له نیمايي ډېر وګړي په یو ډول نه یو ډول بشري مرستو ته اړتیا ولري.
ملګري ملتونه ټینګار کوي، چې له ټولو اړمنو کسانو څخه ۱۷ اعشاریه ۳ میلیون خورا زیان منونکيو په ګډون د معلولیت لرونکیو کسانو د مرستې ماموریت تر پوښښ لاندې دي.
تازه خبرونه
له اسلامي امارت سره د اړیکو ټینګول اړین دي- پوتین
د روسیې ولسمشر پرون (سې شنبه د غبرګولي اتمه) په تاشکند کې یوې خبري ناستې ته ویلي، چې د افغانستان له اوسني حکومت سره د اړیکو ټینګول اړین دي.
ولادیمیر پوتین زیاتوي، چې اسلامي امارت اوس د افغانستان پر وله خاوره واکمن دی؛ نو اړینه ده، چې اړیکې ورسره سمې او پراخې شي.
د روسیې ولسمشر زیاته کړې، اسلامي امارت په افغانستان کې واقعي ځواک دی او په افغانستان کې له شته ستونزو سره – سره روسیه باید واقعیت ته پر کتو مخ پر وړاندې ولاړه شي.
پوتین ټینګار کړی، چې له اسلامي امارت سره د اړیکو په اړه به د منځنۍ آسیا هېوادونو په ګډون له سیمه ییزو شریکانو سره مشوره او همغږي وکړي.
د روسیې ولسمشر ولادمیر پوتین وایي: له طالبانو سره اړیکي ټینګول اړین دي؛ ځکه هغوی افغانستان چلوي. مونږ باید د دې حقیقت له مخې عمل وکړو او له مخې یې خپلې اړیکې تنظیم کړو.
دا څرګندونې په داسې حال کې کېږي، چې تېره ورځ د روسیې بهرنیو چارو وزیر سرګي لاوروف ویلي وه، چې د روسیې د ممنوعه ډلو له نوملړه د اوسنیو واکمنو د نومونو د ایستلو پر وړاندیز د دغه هېواد له ولسمشر سره خبرې شوې دي.
د سپینې ماڼۍ د ملي امنیت شورا د مسکو له لوري د ترهګرو ډلو له نوملړه د افغانستان د اوسنیو واکمنو د نومونو د ایستلو په تړاو د روسیې بهرنیو چارو د وزیر څرګندونو په غبرګون کې ويلي، چې دا کار ناسم دی؛ ځکه، چي د افغانستان اوسني واکمن له تور نوملړه ایستل سم کار ندی.
د سپینې ماڼۍ ویاند جان کربي وایي: زه فکر کوم، چې دا یو وحشتناک پیغام دی؛ طالبانو خپلې ژمنې نه دي پوره کړي، مونږ په داسې دریځ کې نه یوو، چې طالبان د افغانستان د رسمي حکومت په توګه په رسمیت وپېژنو او روسیه هم باید دا کار وکړي. زه نه غواړم فرضیاتو ته داخلم شم؛ خو دا یو ناسم اقدام دی.
د اسلامي امارت ویاند ذبیح الله مجاهد ويلي، چې افغانستان یو واحد حکومت او نظام لري او د سیمې او نړۍ له ټولو هېوادونو سره د ښو اړیکو او تعامل غوښتونکی دی.
د افغانستان بهرنیو چارو وزارت د روسي چارواکو د دې خبرو هرکلی کړی دی.
د کابل او مسکو اړیکې په داسې حال کې د پراخېدو په حال کې دي، چې د افغانستان لپاره د روسیې ځانګړي استازي ضمیر کابلوف ویلي، چې د روسیې لهخوا د افغانستان اوسنی حکومت پر رسمیت پېژندلو امکان تر بل هر وخت ډېر دی.
تازه خبرونه
له نړۍ سره د اسلامي امارت تعامل وارزول شو
د بهرنیو چارو وزارت د چارشنبې پر ورځ ( د غبرګولي نهمه ) ویلي، چې په ستراتیژیکو مطالعاتو مرکز کې د « دوحه ۳: له نړیوالې ټولنې سره د اسلامي امارت د تعامل څرنګوالی» تر سرلیک لاندې علمي ناسته تر سره شوې ده .
د بهرنیو چارو وزارت د ویاند مرستیال حافظ ضیا احمد څرګنده کړې، چې د بهرنیو چارو وزارت د درېیم سیاسي ریاست د رییس ذاکر جلالي پر مشرۍ د دوحې د غونډو پر مخینه او د اسلامي امارت د دریځونو پر عواملو پراخ بحث تر سره شو.
د ذاکر جلالي د څرګندونو له مخې؛ د دوحې غونډې د افغانستان په اړه د ملګرو ملتونو له لوري د فریدون سینیرلي اوغلو د خپلواکې ارزونې پربنسټ راپیل شوې دي. د دې لړۍ لومړۍ غونډه د ۲۰۲۳ ز. کال په مې او دوهیمه هغه د ۲۰۲۴ ز. کال په فبروري کې جوړه شوه.
ذاکر جلالي ویلي، چې د دې لړۍ په دوهیمه غونډه کې هم د اسلامي امارت د شرایطو د نه پوره کېدو له کبله له ژور غور وروسته د مشرتابه لخوا د نه ګډون پرېکړه وشوه او سمبولیک ګډون په کې بېګټې وبلل شو.
جلالي څرګنده کړې: اسلامي امارت له نړیوالې ټولنې سره تعامل غواړي؛ خو دا تعامل د افغانستان د سیاسي خپلواکۍ، ديني او ملي ارزښتونو او د وطن او نظام د حیثیت په بیه نهغواړي.
دغه راز نوموړي زیاته کړې؛ اوس د لومړۍ او دوهیمې غونډې پر پرتله د غونډې د جوړوونکیو او کوربنو په تعامل کې مثبت بدلون لیدل کېږي.
هغه ویلي؛ په وروستیو ورځو کې د ملګرو ملتونو د مرستیالې په ګډون ګڼ پلاوي کابل ته راغلل، چې په راتلونکې ناسته کې د افغان حکومت د ګډون زمینه برابره کړي.
ذاکر جلالي وایي؛ ټاکل شوې، چې د اسلامي امارت استازي به د درېیمې غونډې په اصلي بحثونو کې ګډون وکړي.
هغه زیاته کړې: دا ځل د دوحې د درېیمې غونډې په اجنډا کې مثبت بدلون تر سترګو کېږي؛ د بحث اساسي محورونه به مالي او بانکي وضعیت، مخدره توکو پرخلاف مبارزه او کروندګرو ته بدیل معیشت، د خصوصي سکتور وده او اقلیمي بدلون اړوند مسایل وي.
جلالي دا هم ویلي: د بحث محورونو ته په پام داسې برېښي، چې د غونډې د اجنډا په اړه به اساسي ستونزه نه وي؛ خو اسلامي امارت د غونډې د وروستيو جزئیاتو د شریکولو په تمه دی، چې په رڼا کې یې پرېکړه وکړي.
ویل کیږي، چې په دې علمي بحث کې د بهرنیو چارو وزارت د بېلابېلو څانګو کارکوونکیو او ډیپلوماټانو ګډون کړی و او د موضوع په اړه یې خپل نظرونه وړاندې او پر بېلابېلو اړخونو یې بحثونه وکړل.
تازه خبرونه
د کانونو او پټرولیم وزارت د ۳۳ میلیون ډالرو پر ارزښت ۶۰ زره ټنه د قشقري اومه تېل وپلورل
د افغانستان د کانونو او پټرولیم وزارت څرکنده کړې، چې د څه باندې ۳۳ میلیون ډالرو پر ارزښت یې د قشقري ۶۰ زره ټنه اومه تېل پلورلي دي.
د دغې کچې تېلو د داوطلبۍ په مراسمو کې، چې نن (سې شنبه د غبرګولي اتمه) ترسره شوه؛ له ۱۸ ګډون کوونکیو شرکتونو څخه یو شرکت ګټونکی اعلان شو.
په دې مراسمو کې د کانونو او پټرولیم وزارت چارسمبالي ویلي، که قراردادي شرکت د قشقري د تېلو په استخراج کې ښه کار وکړي؛ د ورځې درې زره ټنه تېل به استخراج شي.
د کانونو او پټرولیم وزارت چارسمبالي شهاب الدین دلاور همداراز د ځینو بهرنیو شرکتونو لېوالتیا هم اعلان کړه، چې د هېواد د تېلو په برخو کې به پانګونه وکړي.
هغه وويل: راځئ، چې په خیر کار وکړو او تېل استخراج کړو. الله پاک امنیت، اسلامي نظام او شفافیت رامنځته کړی دی. له چا څخه یوه افغانۍ هم زیاته نه اخیستل کیږي.
د ګټونکي شرکت مسوولینو ويلي، چې دوی به د هېواد دننه پېرل شوي تېل چاڼ او تصفیه کړي.
د دوی د څرګندونو له مخې؛ د دې مقدار تېلو په چاڼ کې به یو شمېر کسانو ته د کار زمینه برابره شي.
د ګټونکي شرکت ویاند غفور احمد جاوید ويلي: دا بهیر ډېر روڼ و؛ هر چا ته استعلام ورکړ شو او یو خبریال کاغذونه له بکس څخه راوویستل او موږ د ۸ اعشاریه ۷۰ منفي نرخ سره ګټونکي شو.
اوسمهال په قشقري کې له ۲۴ څاګانو څخه څه باندې ۱۰۰۰ ټنه تېل استخراجېږي.
-
تازه خبرونه2 days ago
آریانا نړیوال ټلویزیون “د ویډیو په ثبتولو کې د مرستې غوښتنې” یو نوی پروګرام پیل کړ
-
لوبی3 days ago
د ۲۰۲۴ شل اوریز نړیوال جام سیالیو ټولې لوبډلې په ډاګه شوې
-
سیمه ییز خبرونه20 hours ago
نواز شریف یو ځل بیا د پاکستان د واکمن مسلم لیګ ګوند مشري پر غاړه واخیسته
-
تازه خبرونه4 days ago
له ناقانونه مهاجرینو سره به جګړې ته ورته چلند وشي- د تهران والي مرستیال
-
لوبی3 days ago
افغانستان د ۲۰۲۴ فوټسال نړیوال جام په C ګروپ کې راغی
-
تازه خبرونه4 days ago
د خواف – هرات د اوسپنېپټلۍ د وروستۍ برخې د جوړولو کار پیل شو
-
تازه خبرونه4 days ago
په افغانستان کې باید د ټولو قومونو د استازو په ګډون یو حکومت جوړ شي – حسن کاظمي قُمي
-
سیمه ییز خبرونه4 days ago
د هند د لویدیځ په یوه تفریحي مرکز کې اور لګېدنې لږ تر لږه ۲۴ کسان مړه شوي