تازه خبرونه
مونږ په هلمند او فراه کې د دوحې له تړونه سرغړونه نه، له افغان ځواکونو ساتنه کړې – امریکا
امریکایي ځواکونو د طالبانو هغه څرګندونې رد کړي، چې ګنې امریکا په هلمند او فراه کې د هوایي بریدونو له کبله د دوحې تړون نقض کړی او وایي؛ پر اړوند سیمو هوایي بریدونه یوازې له افغان ځواکونو څخه د دفاع په موخه تر سره شوي، چې طالبانو پرې بریدونه کړي وه.
په افغانستان کې د امریکایي ځواکونو ویاند سني لګیت آریانا نیوز ته په یوه تویت کې څرګنده کړې: مونږ د طالبانو دا ادعا، چې ګڼې امریکا د دوحې له تړونه سرغړونه کړې؛ ردوو. په هلمند او فراه کې د امریکا هوایي بریدونه یوازې د افغانستان د ملي، دفاعي او امنیتي ځواکونو په دفاع کې تر سره شوي دي، چې پرې طالبانو بریدونه کړي وه.
لګیت زیاته کړې؛ دا هوایي بریدونه د امریکا او طالبانو د هوکړې او د افغانستان د حکومت او امریکا د حکومت له ګډې اعلامیې سره سم تر سره شوي دي.
1/3 We categorically reject the Taliban’s claim the United States has violated the U.S.-Taliban Agreement. U.S. airstrikes in Helmand and Farah have been and continue to be solely in defense of the ANDSF as they are being attacked by the Taliban.
— USFOR-A Spokesman Col Sonny Leggett (@USFOR_A) October 18, 2020
په افغانستان کې د امریکایي ځواکونو ویاند ویلي: ټوله نړۍ په هلمند کې د طالبانو د بریدونو شاهد ده، چې زرګونه بې ګناه ملکي وګړي یې ټپیان او بې ځایه کړي دي. مونږ پر ټولو خواوو غږ کوو، چې د سولې لپاره سیاسي بهیر ومني او تاوتریخوالي کم کړي.
نوموړي دا څرګندونې څو ساعته وروسته له هغې کړي، چې د طالبانو د امریکا پر ځواکونو د دوحې له تړون څخه د سرغړونې تورولګاوه او ورسره یې د نورو بریدونو ګواښ په ډاګه کړ.
طالبانو د یکشنبې پر ورځ د تلې پر ۲۷ په خپل یوه تویت کې څرګندده کړې؛ په هلمند ولایت کې له وروستيو پرمختګونو وروسته، امریکایی سرتېرو په وار وار په بې رحمانه بمبارد دوحې له تړونه سرغړونه کړې، چې د روان کال د فبرورۍ پر ۲۹ د قطر په پلازمېنه دوحه کې لاسلیک شوی، چې له مخې یې طالبانو منلې، چې د افغانستان پر لویو ښارونو به برید نکوي او امریکایان به له افغان ځواکونو څخه په لویو ښارونو کې دفاع کوي.
اوس طالبانو ویلي: د دوحې د تړون له مخې؛ امریکايي عسکر نشي کوی، چې ماسوا له جنګي سیمو او د جنګ له وخته په نورو ځایونو کې بمبارد وکړي او څوک په نښه کړي.
طالبانو ټینګار کړی دی: په تېرو څو ورځو کې د ورځې او شپې له مخې د ډرون او نورو الوتکو پر مټ د هلمند ولایت په نهرسراج، خوشکاوه، باباجي، د ګرشک ولسوالۍ په مالګیراو بند برق، د سنګین، مرجې، ناوې او نادعلي ولسوالیو په مختلفو سیمو کې يې ګڼې سیمې بمبارد کړي. همدا ډول يې په فراه او ځينو نورو ولایتونو کې هم بمبارد کړي، چې دا کار یې د دوحې له تړون څخه ښکاره او څرګنده سرغړونه ده.
د دوی د اعلامیې له مخې: د اسلامي امارت او متحده ایالاتو تر منځ د دوحې تړون ټوله مینځپانګه روښانه ده؛ خو دا دوه یم ځل دی، چې امریکا له دغه تړون څخه سرغړونه کوي؛ اشتباه کوونکي عملونه تر سره کوي او پر هغو سیمو بمبارد کوي چې جګړه په کې نه وي.
دوی دا ټینګار هم کړی، چې د داسې کړنو په تکرار د پایلو مسوولیت به امریکایي لوري ته واړول شي.
د لښکرګاه په ګډون د هلمند ولایت پر ځینو برخو د طالبانو د برید په پایله کې امریکایي ځواکونو د دوشنبې پر ورځ د طالبانو مرکزونه په نښه کړل.
امریکایي ځواکونو ویلي، چې بریدونه د دوحې له هوکړې سره سم دي؛ ځکه، چې د دوحې تړون له مخې به امریکایي ځواکونه د افغان ځواکونو ملاتړ کوي او د طالبانو لخوا به په ځانګړي توګه پر لویو ښارونو بریدونه نه کیږي.
په هلمند کې د طالبانو د بریدونو په پایله کې په لسګونه زره خلک بې کوره شوي، چې اوس مرستې ته اړتیا لري.
دا په داسې حال کې ده، چې په افغانستان کې د تاوتاریخوالي له کبله د دوحې و سولې خبرې ځنډیدلي او پرمختګ یې ندی کړی.
تازه خبرونه
افغانستان به د پاکستان ناروا غوښتنې هیڅکله ونهمني
نوموړي زیاته کړې، چې اسلامي امارت د ستونزو د حل لپاره د تفاهم، خبرو اترو او متقابل احترام پر بنسټ اړیکو ته ژمن دی؛ خو د هر ډول تېري په صورت کې له خپلې خاورې دفاع د افغانستان مشروع حق ګڼي.
د افغانستان بهرنیو چارو وزیر د یکشنبې پر ورځ د بهرنیو چارو وزارت په ستوري ماڼۍ کې کابل مېشتو سفیرانو ، ډیپلوماټانو، د ملګرو ملتونو، اروپايي ټولنې او د ځینو نړیوالو بنسټونو له استازو سره د ګډ روژه ماتي پر مهال له ځمکني بشپړتیا د دفاع او د ستونزو پر ډیپلوماتیک حل د وینا پر مهال ویلي: درنو سفیرانو او ډیپلوماټانو! ټولو اسلامي هېوادونو ته د جګړې غځېدا خواشیني کړي یوو او غواړو، چې ستونزې د خبرو له لارې حل شي.
نوموړي ټینګار کړی، چې د پاکستان پوځي رژیم “پر ډېره بې رحمۍ” افغان کډوال ایستلي، سوداګریزې لارې یې بندې کړي، د افغانستان ملي حاکمیت یې نقض کړی او په نړیوالو غونډو کې یې د افغانستان پر ضد پروپاګند پیل کړی دی.
امیر خان متقي وایي، چې د پاکستان پوځیانو پر افغانستان جګړه تپلې، چې قربانیان یې ملکي وګړي دي. زمونږ دفاعي برید د تېري ځواب دی، چې په کې یوازې پوځیان پرنښه شوي دي.
بهرنیو چارو وزیر د سیمې پر عمومي وضعیت هم اندېښنه څرګنده کړې او څرګندوي؛ د وروستیو تحولاتو، په ځانګړي ډول پر ایران د بریدونو او همدارنګه د ایران او ځینو خلیجي هېوادونو تر منځ د زیاتېدونکي کړکېچ، سیمه له امنیتي خطرونو سره مخ کړې، چې د ستونزو د حل یوازنۍ لار خبرې او ډیپلوماټیکې هڅې دي.
امیرخان متقي ټینګار کړی، چې افغانستان به د پاکستان ناروا غوښتنې هیڅکله ونهمني.
نوموړي ویلي: هیله ده، چې د تحمیلي جګړو پرځای د ولسونو غوښتنو ته غاړه کېښودل شي.
تازه خبرونه
نن د ملګرو ملتونو امنیت شورا د افغانستان په اړه غونډه کوي
په دې غونډه کې به د شورا نوي غړي( بحرین، کولمبیا، د کانګو ډیموکراټیک جمهوریت، لټوانیا او لیبریا) په دې شورا کې د غړیتوب له ترلاسه کولو وروسته د افغانستان په اړه خپل لومړني نظرونه وړاندې کړي.
ټاکل شوې، چې نن( دوشنبه د کب اتهلسمه ) د ملګرو ملتونوامنیت شورا د افغانستان په اړه یوه غونډه ترسره کړي.
له دې غونډې مخکې به پاناما د ښځو، سولې او امنیت د ملاتړو هېوادونو پر استازیتوب یوه خبرپاڼه خپره کړي.
په دې غونډه کې به د شورا نوي غړي( بحرین، کولمبیا، د کانګو ډیموکراټیک جمهوریت، لټوانیا او لیبریا) په دې شورا کې د غړیتوب له ترلاسه کولو وروسته د افغانستان په اړه خپل لومړني نظرونه وړاندې کړي.
ټاکل شوې، چې د یوناما چارسمبالې(سرپرسته) ګاګنون د ملګرو ملتونو د عمومي منشي د وروستي راپور پر بنسټ د افغانستان د سیاسي، بشري او بشري حقونو د وضعیت په اړه معلومات وړاندې کړي.
دا غونډه داسې مهال ترسره کېږي، چې د ډیورنډ کرښې په اوږدو کې پر افغانستان د وروستیو تپل شویو نښتو( د فبروري له شپږویشتمې څخه د مارچ تر پېنځمې پورې ۱۸۵ ملکي وګړي وژل شوي او ټپیان شوي دي) له کبله د ملکي وګړو مرګ او ژوبله، بېځایه کېدا او زیربناوو ته زیانونه اوښتي دي.
بشري وضعیت اوس هم اندېښمنوونکی دی او د افغانستان له شاوخوا ۴۴ میلیون وګړو څخه نږدې نیمایي یې مرستو ته اړتیا لري.
تمه ده، چې د شورا غړي به د ملکي وګړو د خوندیتوب، د ملکي زیربناوو د ساتنې او د نړیوالو بشردوستانه قوانینو د رعایت پر اړتیا ټینګار وکړي.
همداراز به بحثونه د یوناما د ماموریت د غځولو پر موضوع هم راوڅرخیږي؛ ځکه، چې د دې ماموریت وخت د مارچ پر اووهلسمه پای ته رسېږي.
تازه خبرونه
په ایران کې مو د دښمن پر ګونډو کول موخه ده – د امریکا د جنګ وزیر
پیټ هګسټ له سيبياس نیوز سره په مرکه کې ویلي، چې د افغانستان او عراق د جګړو پر مهال «ډېرې احمقانه لارې کارول شوې وې».
د امریکا د جنګ وزیر پیټ هګسټ ویلي، له ایران سره روانه جګړه به د دښمن تر کمزوري کولو پورې روانه وي؛ امریکا نه غواړي هغه تېروتنې تکرار کړي، چې د عراق او افغانستان د اوږدو جګړو پر مهال رامنځته شوې وې.
پیټ هګسټ له سيبياس نیوز سره په مرکه کې ویلي، چې د افغانستان او عراق د جګړو پر مهال «ډېرې احمقانه لارې کارول شوې وې».
نوموړي زیاته کړې، چې د ایران پر وړاندې په روانه جګړه کې مو«د دښمن پر ګوندو کول» موخه ده.
د امریکا د جنګ وزیر زیاته کړې: دا، چې ایران به رسماً تسلیم شي که نه؛ معلومه نده.
هګسټ په دې اړه ویلي: «دا، چې آیا هغوی به د تهران په ډګر کې مراسم ونیسي او لاس پرسر کیږي که نه؛ دا له هغو سره تړاو لري.»
دا څرګندونې په داسې حال کې راپورته کیږي، چې په سیمه کې د منځني ختیځ په ګډون د امریکا، اسرائیل او ایران ترمنځ پوځي عملیاتو او تاوتریخوالی مخ پر زیاتېدا دی.
-
نړۍ5 days agoیوه پاکستاني د ایران پر لمسون د ټرمپ د وژلو هڅه کړې – رسنۍ
-
تازه خبرونه1 day agoسږ کال د ښځو د حقونو ۳۴۰۰ شکایتونه وارزول شول – امر بالمعروف
-
تازه خبرونه5 days agoیو ټولګډونه پلاوی دې افغانستان ته سفر وکړي – سهیل افریدی
-
تازه خبرونه5 days agoله افغانستان سره ستونزه دې د خبرو له لارې حل شي – فضلالرحمن
-
سوداگري5 days agoد اوسپنېپټلۍ له لارې د توکو لېږد له خڼډ پرته روان دی
-
تازه خبرونه5 days agoپه آلمان کې د افغانستان قونسلګرۍ د پاسپورټونو د وېش بهیر بیا پیل کړ
-
سیمه ییز خبرونه2 days agoد ایران هر نوي برید ته به متقابل ځواب ورکړ شي- عربستان
-
تازه خبرونه15 hours agoپه ایران کې مو د دښمن پر ګونډو کول موخه ده – د امریکا د جنګ وزیر
