تازه خبرونه
ناڅرګندو وسلوالو په تخار کې یوه لیسه سوځولې

نن سهار د تخار ولایت په مرکز تالقان ښار کې د پولیسو قومندانې ته نږدې د ابو عثمان تالقاني لیسه سوځول شوې ده.
سیمه ییزو خبریالانو څرګنده کړې، چې په دې وروستیو کې دا د دې ولایت درېیم ښوونځی دی، چې سوځول کیږي.
ویل کیږي، چې په ابوعثمان تالقاني لیسه کې درې زره زدکوونکيو زدکړه کول، چې اوس د لیسې ټول درسي او نور توکي د اور خوراک شوي دي.
پېښه سهار وختي شوې او عاملین یې تښتېدلي دي.
په ټولینیزو رسنیو کې خپاره شوي انځورونه ښيي، چې د دې ښوونځي لیکي او نور لوازم د اور لمبه شوي دي.
طالبانو په دې پېښه کې لاس لرل رد کړي او وایي، چې تېره شپه د تخار مرکز په تالقانو ښار کې امنیه قومندانۍ او استخباراتو ودانیو ته نږدې د ابوعثمان تالقاني لیسې ته اور اچول شوی دی.
تازه خبرونه
په ایران کې یوه افغان لس کسان پر چړې وژلي

د ایران دولتي خبري آژانس ایرنا د کرمان ښار د چارسمبالي والي حسین رضايي د څرګندونو له مخې په ډاګه کړې؛ یوه افغان د یکشنبې پر ورځ د ایران په جنوبي ښار کرمان ولایت کې د شخصي دښمنۍ له کبله لس کسان پر چړې وژلي دي.
رضايي زياته کړې، شکمن د پوليسو لخوا هغه وخت ونيول شو، چې غوښتل يې ماښام مهال له دې ولايته ووځي.
نوموړي د دغه افغان د ورور د څرګندونو له مخې ویلي؛ تورن ذهني بې ثباتي لرله او پر مخدره توکو روږدی و.
د رسنیو د راپور له مخې؛ په دې برید کې شپږ افغانان او څلور ایرانیان وژل شوي دي.
د دې سيمې چارواکي وايي، چې په دې پېښه کې يو بل تن ټپي شوى او تر درملنې لاندې دى.
تازه خبرونه
په افغانستان کې مذهبي ډلې د خپلو مراسمو د ترسره کولو پوره آزادي لري

د بهرنیو چارو وزارت سیاسي مرستیال نن په کابل کې د عاشورا نمانځغونډې ته وویل، د نامسلمانو په ګډون ټولې مذهبي ډلې کولی شي خپل مراسم په آزاده توګه ترسره کړي.
د اسلامي امارت د بهرنیو چارو وزارت سیاسي مرستیال شېر محمد عباس ستانکزی وايي؛ د افغانستان ټول مذهبونه او حتا غیر مسلم اقلیتونه د خپلو مذهبي مراسمو په ترسره کولو کې آزاد دي او په دې برخه کې کومه ستونزه نشته.
شېرمحمد عباس ستانکزي، چې د محرم پر لسمه يې په کابل کې خبرې کولې له خلکو وغوښتل، چې د اوسني نظام ملاتړ وکړي
نوموړي همداراز ټینګار کړی، چې ځینې هېوادونه د افغانستان د وضعیت په ګډوډولو کې خپلې ګټې ویني؛ خو مونږ په هېواد کې د ستونزو او جګړو د پای ته رسولو لپاره اړتیا لرو او خلک باید د دغو دسیسو پر وړاندې د اوسني نظام ملاتړ وکړي.
د بهرنيو چارو وزارت سياسي مرستيال په هېواد کې تېرو کورنيو جګړو ته په نغږته کې وايي، چې د پخواني شوروي اتحاد پر وړاندې د جهاد له بريا وروسته ډېرو کسانو د واک او شخصي انګېزو له کبله هېواد بې ثباته کړ.
شېر محمد عباس ستانکزي د خپلو خبرو په بهیر کې د داخلي مخالفتونو پر ختمېدو هم ټینګار څرګند کړ.
که څه هم د عاشورا د ماتم کوونکیو پر وړاندې د امنیتي ګواښونو په اړه اندېښنې موجودې وې؛ خو د عاشورا مراسم په بشپړ خوندي چاپېریال کې ترسره شول.
د یادونې ده، چې د محرم لسمه ورځ د امام حسین (ع) د شهادت د ویر او د هغه د غوښتنو او پوښتنو یادولو ته ځانګړې شوې ده.
تازه خبرونه
په کابل کې د امریکا لخوا د القاعده د مشر وژل کېدل یوه ادعا ده – حکمتیار

د حزب اسلامي مشر ګلبدین حکمتیار ويلي، د امریکا له لوري د القاعده د مشر ایمن الظواهري وژل یوازې یو تور دی او د دغه هېواد له لوري هیڅ ثبوت وړاندې شوی ندی.
حکمتیار د جمعې پر ورځ د خپلو خبرو په یوه برخه کې دغه عمل یو تروریستي عمل نومولی او وایي، چې امریکا د افغانستان له فضايي حریم او ملي حاکمیت څخه پوره سرغړونه کړې ده.
د حزب اسلامي امیر ګلبدین حکمتیار ادعا کوي، چې امریکا په افغانستان کې خپل فعال پوځي، استخباراتي او جاسوسي حضور روان ساتلی، چې ښايي د اسلامي امارت د ځینو مشرانو د وژلو پلان ولري. امارت باید د دا ډول بریدونو مخه ونیسي.
د حزب اسلامي مشر ګلبدین حکمتیار ويلي، امریکا له افغانستان څخه د جګړې د دوام په اراده وتلې او د غچ اخیستنې احساس د دغه هېواد د سیاسي او پوځي چارواکو له څرګندونو هم څرګندېږي.
نوموړی خبرداری ورکوي، چې د افغانستان هوايي حریم هم خوندي ندی او امریکا کولی شي خپل مخالفان په افغانستان او نورو ځایونو کې پر نښه کړي.
د امریکا حکومت ادعا کوي، چې ایمن الظواهري د تېرې شنبې پر ورځ په کابل کې د امریکا د بې پیلوته الوتکې په برید کې وژل شوی؛ خو د دې ادعا د ثابتولو لپاره یې اسناد وړاندې کړي ندي. اسلامي امارت د دغه برید پخلی کوي؛ خو تر اوسه یې په کابل کې د الظواهري د میشتېدو او د هغه د وژل کېدو په اړه څه ندي ویلي.
-
تازه خبرونه4 days ago
له ۲۵ کلونو وروسته د بلخ ولایت سیلو بیا کار پیل کړ
-
تازه خبرونه4 days ago
مونږ د خپلو اوبو له یوه څاڅکي هم تېرېدونکي نه یوو
-
تازه خبرونه3 days ago
د کمال خان د بند اوبه د ایران سیستان ته ورسېدې
-
تازه خبرونه4 days ago
په کندهار کې د اوبو د دوه بندونو د جوړېدو چارې پیل شوې
-
تازه خبرونه23 hours ago
په ایران کې یوه افغان لس کسان پر چړې وژلي
-
تازه خبرونه3 days ago
د وزير محمد اکبر خان او شيرپور تر منځ د سړک جوړولو چارې پيل شوې
-
تازه خبرونه4 days ago
چینایي او هندي چارواکو د افغانستان په اړه وکتل
-
تازه خبرونه3 days ago
د بلخ ولایت په شولګره ولسوالۍ کې د ګرځندوی صنعت مخ پر وده روان دی