د افغانستان عامې روغتیا وزارت ویلي، چې د دې وزارت یوې تخنیکي دلې هند ته د رسمي سفر پر مهال د نوي ډیلي ښار له علمي او تعلیمي بنسټ همدرد ټولنې څخه لیدنه کړې ده.

د عامې روغتیا وزارت د څرګندونو له مخې؛ په دې لیدنه کې د همدرد ټولنې مسوولانو او استادانو د افغانستان له تخنیکي پلاوي هرکلی وکړ او د دې بنسټ د علمي، څېړنیزو فعالیتونو او طبي خدمتونو په اړه یې هر اړخیز معلومات وړاندې کړل. دواړو لورو همدارنګه د ګډو همکاریو د پراختیا، په ځانګړي توګه د دودیز طب (سنتي طب ) په برخه کې خبرې او د نظر تبادله وکړه.

د عامې روغتیا وزارت زیاته کړې؛ د همدرد ټولنې مشرتابه د دودیز طب په برخه کې د ګډو څېړنو ترسره کولو، د درملیزو محصولاتو د معیاري ارزونې لپاره د همدرد لابراتوارونو له لارې همکارۍ، د علمي تجربو تبادلې او د معلوماتو شریکولو ته خپله چمتووالی څرګند کړی دی.

د دغې خبرپاڼې له مخې؛ یاد بنسټ ژمنه کړې، چې د افغانستان د ډاکټرانو او روغتیايي کارکوونکو لپاره به بورسونه او مسلکي روزنیز پروګرامونه برابر کړي.

د عامې روغتیا وزارت د څرګندونو له مخې؛ دواړو خواوو دا ډول علمي او تعلیمي همکارۍ د عامې روغتیا وزارت د نظام د پیاوړتیا، د دودیز طب د معیاري کولو او د علمي او څېړنیزو بنسټونو د پراختیا لپاره یو مهم ګام بللی او په راتلونکې کې یې د دغو اړیکو پر دوام او اغېزمن پراخوالي ټینګار کړی دی.

 د روغتیا نړیوالې ټولنې د راپور له مخې؛ له پاکستان څخه د افغان کډوالو راستنېدا کولی شي د ګوزڼ یا پولیو ویروس د لېږد خطر زیات او د دې ناروغۍ د کنټرول بهیر ستونزمن کړي.

 د دې راپور پر بنسټ، د روان کال له پیل څخه تر اوسه په افغانستان کې د پولیو ویروس څلور نوي پېښې ثبت شوې دي.

د روغتیا نړیوالې ټولنې د راپور له مخې؛ که څه هم په افغانستان کې د ماشومانو د ګوزڼ(فلج ) ناروغۍ پېښې کمې شوې دي؛ خو د کډوالو له راستنېدا سره د ذدې ویروس د لېږد خطر شته او د دې ناروغۍ د خپرېدا مخنیوی یې ستونزمن کړی دی.

د روغتیا نړیوالې ټولنې په راپور کې راغلي: ” په ۲۰۲۵ کال کې ۳۹ مثبتې پېښې د دې ویروس تائید شوي، چې ۹ یې په افغانستان او ۳۰ یې په پاکستان کې دي.

روانه اوونۍ په پاکستان کې د دې ویروس د وحشي بڼې دوه نوې مثبتې چاپېریالي بېلګې ثبت شوي دي.

تر دې دمه ۵۷۹ مثبتې چاپېریالي بېلګې د دې ویروس ثبت شوي، چې ۶۴ یې په افغانستان او ۵۱۵ یې په پاکستان کې دي.”

 دې ټولنې ویلي، چې د واکسین د پلي‌کېدا پروګرامونه محدود دي او له همدې کبله د افغانستان په جنوبي او ختیځو سیمو کې ځینې ماشومان واکسین نشي ترلاسه کولی.  .

عامې روغتیا وزارت د روغتیا نړیوالې ټولنې د دې راپور په اړه څه ندي ویلي.

دا راپور په داسې حال کې خپور شوی، چې یوازې په افغانستان او پاکستان کې دا ناروغي مخ پر خپرېدا ده.