د امریکا ولسمشر ډونالډ ټرمپ د حماس لخوا د یرغمل شویو کسانو د خوشې کولو بهیر د ځنډولو ګواښ "وحشتناک" وباله او وایي، چې که ټول یرغمل شوي کسان له غزې څخه خوشې نشي؛ نو د 'دوزخ دروازې' به خلاصې شي.

حماس د دوشنبې پر ورځ مخکې له دې، چې اسرائیل له اوربند څخه پر سرغړونه تورن کړي وویل؛ د یرغمل شویو کسانو د خوشې کولو بهیر به تر بلې خبرتیا وځنډوي.

د اوربند د تړون په چوکاټ کې حماس ژمن دی، چې یو شمېر اسرائیلي یرغمل خوشې کړي. لکه څنګه، چې یې د تېرو درې اوونیو راپدېخوا هره شنبه اسرائیلي یرغمل د یو شمېر فلسطیني بندیانو په بدل کې.خوشې شوي دي.

ټرمپ په سپینه ماڼۍ کې خبریالانو ته ویلي، چې که د شنبې تر غرمې پورې هر اسرائیلی یرغمل خوشې نشي؛ نو د دوزخ به جوړ شي.

دغه راز هغه د اسرائیلو او حماس ترمنځ د اوربند د پای ته رسولو غوښتنه هم وکړه.

هغه ویلي: "شنبه ۱۲ بجې مونږ ټول یثرغمل غواړو. زه خپله خبرې کوم؛ اسرائیل کولی شي هغه لغوه کړي. "خو زما لپاره، د شنبې پر ورځ د غرمې پر ۱۲ بجو که هلته نه‌وي؛ نو ټول د دوزخ دروازې به خلاص شي."

ټرمپ د یوه خبریال د پوښتنې په ځواب کې، چې آیا "دوزخ" د اسرائیلو د غچ اخیستنې معنا لري؛وویل:" تاسې به وګورئ، دوی ټول به یې وویني. حماس به هم پوه شي، چې زما مطلب څه دی."

د امریکا ولسمشر د یکشنبې پر ورځ د حماس له بند څخه د خوشې شویو درې یرغملو د انځورونو له لیدلو وروسته اعلان وکړ، چې د اسرائیل او حماس ترمنځ د اوربند تړون په اړه یې صبر پای ته رسیدلی دی.

هغه وویل، چې خوشې شوي یرغمل د هولوکاسټ له قربانیانو سره ورته ول؛ ځکه، چې په ناوړه شرایطو کې ساتل شوي وه.

د اسرائیلو لومړي وزیر بنیامین نتنیاهو دفتر ویلي، چې دوی د حماس د خبرپانې په اړه د یرغمل شویو ټولو کورنیو ته خبر ورکړی دی. په داسې حال کې، چې د اوربند تړون ته یې پخپله ژمنتیا هم ټینګار کړی دی.

ټرمپ دا خبرداری هم ورکړ، چې که مصر او اردن د هغه پلان( د غزې اوسیدونکي دې په خپله خاوره کې قبول کړي) ونه‌مني؛ نو هغه به ورسره د امریکا مرستې بندې کړي.

له هغې وروسته، چې حماس د یرغملو کسانو خوشې کول ودرول؛ د اوربند خبرې اترې له یوې نوې ننګونې سره مخ شوې دي. په داسې حال کې، چې اسرائیل او حماس یو بل له تړون څخه پر سرغړونې تورنوي. د غزې د راتلونکي په اړه د ټرمپ څرګندونو او د دې دریځ لپاره د نتنیاهو ملاتړ تاوتریخوالی زیات کړی او د خبرو اترو دوام یې پر ټپه درولی دی.

د ډونالډ ټرمپ هغه څرګندونې، چې فلسطینیان باید له غزې ووځي او د امریکا تر کنټرول لاندې ساحلي سیمه باید د املاکو پروژې په توګه پراخه شي؛ له جګړې وروسته د راتلونکي په اړه تمې بدلې کړې دي.

فاکس نیوز د دوشنبې پر ورځ له ټرمپ سره د مرکې یوه برخه خپره کړې؛ له هغه څخه د پلان په اړه پوښتنه وشوه، چې آیا فلسطینیان به د بېرته راستنېدو حق ولري؛ په ​​ځواب کې ویلي: "نه! وبه یې نلري."

ټرمپ ویلي: "زه د دوی لپاره د دایمي ځای د جوړولو په اړه خبرې کوم؛ ځکه، چې که دوی اوس بېرته راشي، نو کلونه وخت به ونیسي، چې هلته ژوند کول ممکن شي."

هغه زیاته کړې، چې هغه کولی شي د فلسطینانو د میشتولو لپاره له مصر او اردن سره یوې هوکړې ته ورسیږي.

دا په داسې حال کې ده، چې د ترکیې د ولسمشر په ګډون د سیمې هېوادونو د ټرمپ او نتنیاهو ګډ پلان رد کړی او عملي یې نه بولي.

رویټرز راپور ورکړی، چې ډونالډ ټرمپ د ولسمشرۍ په ځانګړې الوتکه کې خبریالانو ته وویل، چې له ولادیمیر پوتین سره په اړیکه کې دی.

د رویټرز د څرګندونو له مخې؛ دا د روان کال له پیل راپدېخوا د دواړو ولسمشرانو ترمنځ لومړۍ رسمي خبرې اترې دي.

د دې پوښتنې په ځواب کې، چې آیا د ولسمشر په توګه د خپلې دوه‌یمې دورې له پیل راپدېخوا یا مخکې یې  له پوتین سره خبرې کړې دي وویل: " خبرې شوي او وړاندویېنه کوم، چې نورې خبرې به هم وکړم. مونږ باید دا جګړه پای ته ورسوو. "

ټرمپ د دې خبرو له جزئیاتو ډډه کړه او وایي: "زه باور لرم، چې د پرمختګ په حال کې یوو. غواړو، چې د اوکراین او روسیې ترمنځ جګړه ودروو."

هغه زیاته کړې، چې امریکا په ورته وخت کې له روسیې او اوکراین سره په اړیکه کې ده.

د امریکا ولسمشر له دې مخکې له نیویارک پوسټ سره په یوه مرکه کې ویلي وه، چې د روسیې له ولسمشر ولادیمیر پوتین سره یې د اوکراین د جګړې د پای ته رسولو په اړه ټیلیفوني خبر کړې دي.

له ټرمپ څخه وپوښتل شول، چې څو ځله یې له پوتین سره خبرې کړې؛ له حه ویلو ډډه وکړه او وایي: "غوره ده، چې دا ونه‌وایو."

ټرمپ په دې باور دی، چې پوتین د جګړې په ډګر کې مرګونو ته اهمیت ورکوي.

د امریکا ولسمشر په دې اړه ویلي: "هغه (پوتین) غواړي، چې وژنه ودرول شي. دا ټول وژل شوي کسان ستاسې د ماشومانو په څیر ځوانان او ښکلي خلک دي."

د امریکا ولسمشر دا هم ویلي، چې د پخواني امریکايي ولسمشر پر پرتله؛ له پوتین سره ښې اړیکې لري.

دغه راز د کریملین ویاند دیمیتري پیسکوف د پوتین او ټرمپ ترمنځ د ټیلیفوني خبرو اترو له تائید یا ردولو څخه ډډه کړې او  دولتي TASS خبري  سرچینې ته یې ویلي، چې ډېری ټیلیفونونه کیږي.

د سپینې ماڼۍ د ملي امنیت سلاکار مایک والټز هم د مسکو او واشنګټن ترمنځ د اړیکو په اړه د پوښتنې په وخت کې د جزئیاتو له ورکولو ډډه وکړه.

هغه این بي سي نیوز ته ویلي: "یقینا ډېرې حساسې خبرې اترې روانې دي."

دغه راز د روسیې د بهرنیو چارو وزارت مرستیال میخایل ګالوزین د روسیې دولتي خبري سرچینې RIA ته ویلي: "روسیې د اوکراین پر مسله د خبرو اترو د پیل لپاره کوم قناعت بښونکی وړاندیز ندی ترلاسه کړی."

ګالوزین وایي: "اړینه ده دا څرګندونې له عملي ګامونو سره یوځای وي، چې د روسیې مشروع ګټې په پام کې ونیسي او د بحران د ریښو د له منځه وړلو او نويو واقعیتونو د پېژندلو لپاره چمتووالی وښيي."

د سپینې ماڼۍ چارواکو د شنبې پر ورځ ویلي، چې د امریکا ولسمشر ډونالډ ټرمپ د بهرنیو چارو وزارت د پخواني وزیر انټوني بلینکن او د ملي امنیت د پخواني سلاکار جیک سالیوان امنیتي باور لیکونه لغوه کړي دي.

رویټرز راپور ورکړی؛ دا اقدام یوه ورځ له هغې وروسته تر سره کیږي، چې ټرمپ وویل: هغه د مخکیني ولسمشر جو بایډن امنیتي باور لیک لغوه کړ او ورځني استخباراتي معلوماتو ته لاسرسی یې هم ترې پرې کړی دی.

چارواکو د شنبې پر ورځ ویلي، چې ټرمپ د بایډن د مرستیالې لویې څارنوالې لیزا موناکو لپاره امنیتي باور لیکونه هم لغوه کړل؛ چا، چې د ۲۰۲۱ کال د جنورۍ پر شپږمه د ټرمپ د ملاتړو لخوا د امریکا د کانګرس پر ودانۍ د بریدونو په اړه د عدلیې وزارت د غبرګون په همغږۍ کې مرسته کړې وه.

دوی ویلي، چې ټرمپ د نیویارک د لویې څارنوالۍ د څارنوالې لټیتیا جیمز او د مانهاټن د سیمې د څارنوال آلون براګ اعتبار لیکونه هم لغوه کړل، چې دواړه د ټرمپ پر وړاندې د قضیو مشري کوله.

که څه هم د باور لغوه کول ممکن سمدستي اغېزې ونلري؛ دا په واشنګټن کې د مخ پر زیاتېدونکي اختلاف یوه بله نښه ده. د امریکا پخوانیو ولسمشرانو په دودیز ډول امنیتي ناستې تر سره کولې، چې وکولی شي اوسنیو ولسمشرانو ته د ملي امنیت او بهرنۍ پالیسۍ په اړه مشوره ورکړي.

په ۲۰۲۱ کال کې بایډن ، چې هغه مهال ولسمشر و د ټرمپ امنیتي باورلیک لغوه کړ.

د امریکا دفاع وزیر پیټ هیکزټ تېره میاشت د متقاعد ستر درستیز او د ګډو ځواکونو د پخواني مشر مارک میلي شخصي امنیتي باور لیکونه هم لغوه کړي.

د رویټرز د څرګندونو له مخې؛ میلي، چې د ټرمپ د لومړي پېر په ځینو برخو کې یې د امریکا د لوړ پوړي پوځي افسر دنده ترسره کړې، د بایډن په حکومت کې یې د هغه یو له مخکښو منتقدینو څخه و. کله، چې هغه په ​​۲۰۲۳ کال کې د ۴ ستورو د لرونکي جنرال په توګه متقاعد شو.

د بایډن ډېری ډیپلوماټانو د ټرمپ له نويو چارواکو سره د جنورۍ له شلمې (د ټرمپ له واک اخیستلو) په مخکینیو اوونیو کې د اوکراین او روسیې د جګړې په ګډون پر مسایلو ګډ کار کړی و.

ویل کیږي، چې انټونیو بلینکن سمدستي په دې اړه تبصره نده کړې.