د فلسطین روغتیايي چارواکو ويلي، د اسرائیلو په نویو بریدونو کې د مهاجرینو کمپونه پر نښه شوي، چې له کبله یې ښځې او ماشومان وژل شوي دي.

د رویټرز خبري سرچینې د اسرائیلي پوځیانو د څرګندونو له مخې راپور ورکوي، چې په دغو بریدونو کې د حماس اړوند مرکزونه پر نښه شوي دي.

اسرائیل پر حماس تور لګوي، چې له ملکي خلکو او ملکي تاسیساتو څخه د پوځي موخو لپاره کار اخلي، خو حماس یې ردوي.

روغتیایي سرچینو ویلي، چې د سې شنبې له ورځې وروسته د غزې د سویل پر رفح او زیتون ښارګوټو د اسرائیلو په دوه بېلابېلو بریدونو کې پېنځه فلسطینیان ووژل شول.

د روغتیايي چارواکو د څرګندونو له مخې؛ په خان یونس کې د بې ځایه شویو پر یوه خیمه د اسرائیلو د برید له کبله شپږ فلسطینیان وژل شوي دي.

په غزه کې د تاوتریخوالی تازه زیاتوالی په داسې حال کې رامنځته کیږي، چې اسرائیلو په لبنان کې ځمکني عملیات پیل کړي او څرګندوي، چې ځواکونو یې د ایران له ملاتړه برخمن حزب الله سره پر سختو جګړو بوخت دي. دغه شخړه د حزب الله د مشرتابه پر ضد د اسرائیلو له ویجاړوونکیو هوایي بریدونو وروسته پیل شوې ده.

د یادونې ده، چې اسلامي امارت پر لبنان، فلسطین، عراق او سوریې باندې د اسرائیلو بریدونه په کلکه وغندل او له نړیوالې ټولنې یې وغوښتل چې د دې ستونزې د اساسي حل لپاره قاطع تصمیم ونیسي.

د رویټرز د راپور له مخې؛ د سې شنبې پر سهار اسرائیلي ځواکونو د لبنان په سرحدي سیمه کې د حزب الله پر اهدافو "محدود" بریدونه پیل کړي دي.

د اسراېیلي ځواکونو په د خبرپاڼې له مخې؛ دوی د لبنان په جنوبي کلیو کې د حزب الله پرضد "د دقیقو استخباراتو پر بنسټ محدود، ځایي او هدفي ځمکني بریدونه" پیل کړي، چې "په شمالي اسرائیلو کې د اسرائیلي ټولنو لپاره سمدستي ګواښ" دی.

په خبرپاڼه کې راغلي؛ هوايي ځواک او توپچي له ځمکنیو ځواکونو ملاتړ کوي او په دقیقو بریدونو کې یې لاس درلود.

د لبنان په سرحدي ښار آيتا الشعب کې خلکو د درندو مرمیو له لګېدو او پر سر یې د چورلکو او بې پيلوټه الوتکو له غږونو خبر ورکړی.

د دوشنبې پر ورځ د اسرائیلو د دفاع وزیر یوآو ګالانټ په شمالي اسرائیلو کې د سیمه‌ییزو شوراګانو مشرانو ته ویلي وه، چې د لبنان پر سویلي پولو به د جګړې بل پړاو ډېر ژر پیل شي او د هغو اسرائیلو د بېرته ستنېدو ملاتړ به وکړي، چې د شاوخوا یو کال راپدېخوا د حزب الله له توغندیو تښتیدلي دي.

دا ځمکنی برید په منځني ختیځ کې د اسرائیلو او ایران پلوه اورپکو ترمنځ د مخ پر زیاتېدونکې شخړې ښکارندویي کوي، چې د ۲۰۲۳ کال د اوکتوبر پراوومه د فلسطین د حماس لخوا پر اسرائیلو د برید له کبله رامنځته شوی، چې اوس امریکا او ایران ګواښي.

رویټرز راپور ورکړی، چې په لبنان کې د اسرائیلو ځمکنی برید د حزب الله د پیجرونو له چاودنې، هوایي بریدونو او د جمعې پر ورځ د حزب الله د مشر حسن نصرالله له وژلو وروسته پیل شول.

د لبنان حکومت ویلي؛ سختو هوایي بریدونو نه یوازې د حزب الله څو قومندانان وژلي، بلکې شاوخوا ۱۰۰۰ ملکي وګړي یې هم ووژل او یو میلیون نور یې د خپلو کورونو پرېښودلو ته اړ کړل.

یوې امنیتي سرچینې ویلي، د شپې لخوا د بیروت پر جنوبي سیمو بریدونه وشول.

د رویټرز خبریال شاوخوا یو وروسته ویلي؛ د اسرائیلو اردو ځایي اوسیدونکیو ته خبرداری ورکړ، چې د لبنان پلازمېنې په سویل کې د حزب الله بېخبنایي ودانیو ته نږدې سیمې پریږدي.

د لبنان د روغتیا وزارت د سې شنبې پر سهار ویلي، په تېرو ۲۴ ساعتونو کې د لبنان په جنوبي سیمو، ختیځ بیکا وادی او بیروت کې د اسرائیلو پر بریدونو لږ تر لږه ۹۵ کسان وژل شوي او ۱۷۲ نور ټپیان دي.

د دوشنبې پر ورځ د حزب الله مرستیال نعیم قاسم د نصرالله له مړینې وروسته په لومړۍ عامه وینا کې وویل، چې د مقاومت ځواکونه ځمکني جګړې ته چمتو دي.

هغه ویلي، چې حزب الله د اسرائیلو په خاوره کې له ۱۵۰ کیلومټره پورې د توغندیو ویشتل روان ساتلي.

هغه ویلي: مونږ پوهېږو، چې جګړه ښايي اوږده شي. مونږ به جګړه ګټو لکه څنګه مو، چې په ۲۰۰۶ کال کې ګټلې وه.

دا په داسې حال کې ده، چې سپینې ماڼۍ او د امریکا بهرنیو چارو وزارت سمدستي په لبنان کې د اسرائیلو د ځمکنیو عملیاتو په اړه د تبصرې غوښتنې ته ځواب ندی ویلی؛ خو د دوشنبې پر ورځ د امریکا ولسمشر جو بایډن د اوربند غوښتنه کړې وه.

د رویټرز خبري سرچینې د راپورونو له مخې؛ په نیپال کې د سختو بارانونو، سېلابونو او ځمکې ښویېدو له کبله لږ تر لږه ۱۰۲ کسان مړه شوي دي.

د نیپال ختیځې او مرکزي سیمې د جمعې له ورځې راپدېخوا بارانونو او سیلابونو اغېزمنې کړې دي.

د نیپال د امنیتي ځواکونو په څرګندونو کې راغلي؛ په دې پېښه کې ۶۴ کسان ورک دي او ۴۵ نور ټپیان شوي دي.

د کټمانډو دره له ۴۸ قربانیانو سره د ځاني زیان ترټولو لوړه کچه لري. دغه راز لږ تر لږه ۱۹۵ کورونه او ۸ پلونه هم ویجاړ شوي دي. د مرستې او ژغورنې ډلو شاوخوا ۳۱۰۰ کسان ژغورلي دي.

عيني شاهدانو ويلي، چې له تېرو ۴۰ څخه تر ٤٥ کلونو راپدېخوا د کټمانډو دره په سیندونو کې د دومره ويجاړونکيو سيلابونو او اوبو پورته کېدو لیدونکې نه‌وه.

د نیپال د هوا پېژندنې ادارې ویلي، چې د شنبې تر سهاره په ۲۴ ساعتونو کې لږ تر لږه ۲۴۰ ملي مټره باران شوی، چې د کټمانډو پوسټ ورځپاڼې پر وینا له ۱۹۷۰ راپدېخوا په دې ښار کې دومره باران نه‌دی لیدل شوی.

له ۳ زره ډېر امنیتي ځواکونه له چورلکو او کښتیو سره د قربانیانو د ژغورنې لپاره ګمارل شوي، چې ژوندي پاتې شوي خوندي ځای ته ولېږدوي.

د جمعې پر ورځ د کټمانډو شاوخوا ۱۵۰ الوتنې د خرابې هوا او شرایطو له کبله لغو شوې؛ خو د راپورونو له مخې، د یکشنبې پر ورځ له کټمانډو څخه بهر او دننه الوتنې بیا پیل شوې دي.