Connect with us

تازه خبرونه

په کابل کې د استوګنې پر سیمه زمونږ هوایي حمله یوه تېروتنه وه – امریکا

Published

 on

(Last Updated On: وږی ۲۷, ۱۴۰۰)

د امریکا پوځي چارواکي په کابل کې د استوګنې پر سیمه د امریکا د بې پیلوټه الوتکې هوایي حمله یوه دردوونکې تېروتنه نومولې، چې پرې د یوې کورنۍ لس ملکي غړي ووژل شول.

د اګست پر ۲۹ د امریکا هوایي ځواک د کابل ښار په ۱۵ ناحیه کې د استوګنې پر یوه کور هوایي برید ترسره کړ، چې هغه مهال یې ویلي وه؛ د داعش غړي یې وژلي دي.

هغه وخت هم د دې کورنۍ د غړیو خپلوانو ویلي وه، چې وژل شوي کسان له داعش جنګیالیو سره هیڅ تړاو نلري.

د امریکا د مرکزي قومندانۍ د ځواکونو قومندان جنرال کینټ مکنزي پرون خبریالانو ته ویلي، چې ټول قربانیان ملکي وګړي دي.

مکنزي وایي: زمونږ څېړنې ښیي، چې دا هوایي حمله یوه دردوونکې تېروتنه وه.

دغه راز د امریکا دفاع وزیر لویډ آسټین هم منلې، چې د امریکا په هوایي برید کې ملکي خلک وژل شوي دي.

آسټین زیاته کړې: مونږ اوس پوه شو، چې د احمدي او د داعش ډلې ترمنځ هیڅ اړیکه نه وه. د هغه ورځې هڅې یې پوره بې زیانه وې او له هغه ګواښ سره تړاو نلري، چې مونږ پرې باور درلود.

هغه وايي: مونږ بخښنه غواړو او هڅه کوو، چې له دې بدې تېروتنې پند واخلو.

د یادونې ده، چې په دې پېښه کې د ماشومانو په ګډون د یوې کورنې لس کسان وژل شوي؛ څو کوره زیانمن او څو نور کسان ټپیان شوي هم دي.

تازه خبرونه

د قطر سفیر په کابل کې د اسلامي امارت له چارواکو سره وکتل

Published

on

(Last Updated On: سلواغه ۱۷, ۱۴۰۱)

د یکشنبې پر ورځ د اسلامي امارت یو شمېر استازیو په کابل کې د قطر د بهرنیو چارو د وزیر له ځانګړي استازي مطلق بن ماجد القحطاني او مل پلاوي سره وکتل.

د قطر استازي د اسلامي امارت د بهرنیو چارو له وزیر امیر خان متقي، کورنیو چارو وزیر سراج الدین حقاني؛ د پوهنې وزیر حبیب الله اغا او د استخباراتو عمومي رییس عبدالحق وثیق سره د افغانستان په اړه خبرې وکړې.

د اسلامي امارت د چارواکو د څرګندونو له مخې؛ دواړو لوریو د قطر خيريه بنسټ پر هڅو، سياسي همکاريو، د اړيکو پر پياوړتياوو او بشري مرستو هر اړخیزې خبرې کړې دي.

د قطر د بهرنیو چارو وزارت لخوا په خپره شوې خبرپاڼه کې راغلي؛ القحطاني د افغانستان پر مهمو پرمختګونو په ځانګړي توګه د سیاست، اقتصاد، پراختیا او پوهنې په برخو کې خبرې وکړې.

نوموړي د قطر پر دریځ ټینګار څرګند کړ او د افغانانو له ټولو حقونو په ځانګړي توګه د زده‌کړو او د نجونو د حقونو د ترلاسه کولو او د ښځو د کار کولو له حق او درناوي خپل ملاتړ بیا وړاندې کړ.

په خبرپاڼه کې راغلي، چې هغه په افغانستان کې د امنیت او ثبات د ټینګښت پر هراړخیزې ملاتړ او د سیاسي اجماع د رامنځته کولو لپاره د اسانتیاوو پر رامنځته کولو هم ټینګار څرګند کړ.

Continue Reading

تازه خبرونه

د احمدشاه بابا له نړیوال هوايي ډګره نړیوالې الوتنې پیل شوې

Published

on

(Last Updated On: سلواغه ۱۷, ۱۴۰۱)

د احمدشاه بابا نړیوال هوایي ډګر  رییس حافظ عصمت الله څرګنده کړې؛ له کام ایر هوایي شرکت سره مو په ګډه د الوتنو د ترسره کولو هڅي کړي او نن رسماً د کندهار او دوبۍ ترمنځ دوه اړخیز پرازونه پيل شول.

د کندهار زون د کام ایر هوايي شرکت مسوول مولوي نورعلي حیدري ویلي: د کندهار سوداګريزو اړتیاوو اړ کړو، چي د کندهار او دوبۍ ترمنځ کام ایر هوايي شرکت دوه اړخیز پروازونه پيل کړي.

د نوموړي د څرګندونو له مخې؛ له دې وروسته به له کندهار څخه د شنبې پر ماښام دوبۍ ته او د یکشنبې پر سهار له دوبۍ څخه کندهار ته پروازونه ولرو.  

د يادونې ده، چې په نږدې راتلونکي کې به د کندهار- ډيلي او کندهار- چين ترمنځ دوه اړخيزې الوتنې هم پيل شي.

Continue Reading

تازه خبرونه

اسلامي امارت په افغانستان کې د مرستو رسول له خطر سره مخ کوي – د امریکا استازی

Published

on

(Last Updated On: سلواغه ۱۶, ۱۴۰۱)

د افغانستان لپاره د امریکا ځانګړی استازي ويلي؛ په سویس کې د مرستندویه ټولنو استازیو منلې، چې په بهرنیو ادارو کې د ښځو پر کار بندیز میلیونونه خلکو ته د بشري مرستو رسول ستونزمن کړي دي.

نن یکشنبه د افغانستان لپاره د امریکا ځانګړي استازي تام ویست څرګنده کړې، چې په ژنیو کې یې د ملګرو ملتونو له لوړپوړیو چارواکو، د روغتیا نړیوالې ټولنې (WHO) له چارواکو، د مهاجرت نړیوالې ټولنې او نورو مرستندویه موسسو سره، چې له افغانستان سره د مرستې لپاره کار کوي، وکتل او د دغه هېواد د وضعیت په اړه یې تفصیلي خبرې وکړې.

 تام ویست ټینګار کوي، چې د بشري حقونو وضعیت مخ پر خرابېدو دی؛ کار او زد کړو ته د ښځو او نجونو له لاسرسي باید ملاتړ وشي.

ټام ویست وايي؛ په دې غونډه کې ټولو ومنله چې په نړیوالو ادارو کې د ښځو پر کار بندیز میلیونونو خلکو ته د بشري مرستو رسول ستونزمن کړي دي.

تام ویست وایي: له نېکه مرغه مونږ د روغتیا نړیوالې ټولنې او نورو مرستندویه موسسو له مشرتابه سره، چې ټول په افغانستان کې د خلکو د ژوند پر ژغورلو بوخت دي وکتل. دوی ټول پدې باور دي، چې د طالبانو تګلارې په افغانستان کې میلیونونو اړمنو خلکو ته د بشري مرستو رسول له ګواښ سره مخ کړي دي.

له بلې خوا اسلامي امارت د ویاند مرستیال بلال کریمي ويلي، چې د اسلامي اصولو په رڼا کې کوښښ کوو، چې د هېواد ټولې ستونزې حل شي.هېوادونه د فشار د وسیلې په توګه غیر عادلانه او غیر معقولې پلمې لټوي. د اقتصاد کمزورتیا تازه ستونزه نده، بلکې د تېرو کلونو راپدیخوا دې وضعیت دوام موندلی دی.

دغه را زیاته شوې، چې د افغانستان د اقتصاد د ښه والي لپاره یې بېلا بېلې سرچینې په کار اچولي دي.

د اسلامي امارت لخوا د ښځو پر زده‌کړې او کار له بندیزونو وروسته یو شمېر مرستندویه موسسو په هېواد کې خپل فعالیتونه ودرول، چې له کبله یې میلیونونه خلکو ته د بشري مرستو رسول او وېشل ستونزمن شوي دي.

د یادونې ده، چې له دې مخکې تام ویست پاکستان او جرمني ته تللی و او د افغانستان پر حالاتو یې د دې هېوادونو له چارواکو سره خبرې کړې وې.

Continue Reading

Trending

Copyright © 2022 Ariana News. All rights reserved!