د امیر حاجي زاده کابل غوره لیګ د درېیم پړاو په پایلوبه کې کابل زلمي لوبډلې کابل نایټ رایډرز ته د څلور ویکټو پر توپیر ماتې ورکړه او د لیګ درېیم پړاو اتلولي یې خپله کړه.

په کابل کې ایوبي لوبغالي، د امیر حاجي زاده کابل غوره لیګ د درېیم پړاو کوربتوب وکړ.

په پایلوبه کې کابل نایټ رایډرز پچه وګاټه او لومړی یې د توپ‌وهنې پرېکړه وکړه.

کابل نایټ رایډرز په ۲۰ اورونو کې د ۸ لوبغاړو پر له لاسه ورکولو د کابل زلمي لپاره د ۲۱۵ منډو هدف وټاکه.

کابل زلمي دا هدف په ۱۸.۴ اورونو کې د ۶ لوبغاړو پر له لاسه ورکولو ترلاسه او د دغه پړاو اتلولي یې وګټله.

د کابل غوره لیګ د درېیم پړاو په جوړښت کې شپږ پیاوړې لوبډلې ولوبېدې، چې د درېیم پړاو اتلولي لپاره يې سیالي تر سره کړه.

آریانا راډیو ټلویزیون په ټول افغانستان کې د دې لوبو د خپرولو لپاره خپلو کرکټ مینه‌والو ته د کابل له ایوبي لوبغالي سره تړون لاسلیک کړی و.

د دې تړون له مخې؛ د آریانا راډیو ټلویزیون د دې لیګ درې فصلونه تولید او په خپلو ټلویزیوني سکرینونو او ډیجیټل پاڼو کې یې خپاره کړل.

د کابل کرکټ غوره لیګ په درېیم پړاو کې هغه لوبډلې، چې سږ کال یې لوبې وکړې لاندې لوبډلې دي:

آباسین ډیفندرز

کابل زلمي

د بند امیر سټارز

کابل نایټ رایډرز

سپین غر واریرز

پامیر سټارز

د یادونې ده، چې د کابل کرکټ غوره لیګ په لومړي پړاو کې شاهین هنټرز لوبډلې وکولی شول، چې د اتلولۍ نوم وګټي او د سیالۍ په دوه‌یم پړاو کې د کابل زلمي لوبډلې پخپلو هڅو اتلولي خپله کړه.