تازه خبرونه
اسلامي امارت د بې سرحده خبریالانو هغه راپور رد کړ، چې ګواکې افغانستان د خبریالانو لپاره خطرناک دی
د بې سرحده خبریالانو ټولنې په یوه راپور کې ویتنام، روسیه او افغانستان د خبریالانو لپاره تر ټولو خطرناک هېوادونه یاد کړي دي.
دې ټولنې په افغانستان کې د خبریالانو پر روان وضعیت اندېښنه ښودلې او څرګندوي، چې په ۲۰۲۳ کال کې ۲۱ خبریالان زنداني شوي او درې خبریالان اوس هم په بند کې دي.
بې سرحده خبريالانو په خپل تازه راپور کې ويلي: افغانستان، ويتنام او روسيه د خبريالانو لپاره په نړۍ کې تر ټولو خطرناک هېوادونه دي.
دې ټولنې زیاته کړې، چې د افغانستان چارسمبالي حکومت ( اسلامي امارت ) په ۲۰۲۳ ز. کال کې ۲۱ خبریالان زنداني کړي، چې درې خبریالان اوس هم په بند کې دي.
د بې سرحده خبریالانو د راپور په یوه برخه کې راغلي: طالبانو د افغانستان د بیا واک تر لاسه کولو راپدیخوا خپلواکې رسنۍ ځپلي او خبریالان یې پر بېلابېلو تورونو نیولي دي. طالبانو په ۲۰۲۳ کال کې ۲۱ خبریالان بندیان کړل او درې خبریالان اوس هم په بند کې دي.
د افغان خبریالانو د خوندیتوب کمیټې رییس عبدالقدیم وزیر وايي، وضعیت ښه شوی او یوازې یو خبریال په بند کې دی.
د دغې کمیټې چارواکو معلوماتو ته نه لاسرسی اوس هم د خبریالانو پر وړاندې یوه له جدي ستونزو څخه ده.
اسلامي امارت د دغه راپور پر ردولو ويلي، چې په افغانستان کې خبریالانو ته کوم ګواښ نهشته.
د اسلامي امارت ویاند ذبیح الله مجاهد وايي: له بده مرغه هغه بنسټونه، چې د ژورنالیستانو د دفاع په نوم او په غرب کې له بېلابېلو لقبونو سره رامنځته شوي؛ هغو د هېوادونو پر ضد د پروپاګند له کبله د ځان لپاره پلانونه لري او په اړه یې څېړنې کوي. په افغانستان کې یو خبریال هم له ګواښ سره مخ نهدی. په افغانستان کې هیڅ خبریال نه ګواښل کیږي. په تېر کال کې هیڅ خبریال ته زیان نهدی رسېدلی. له شک پرته، نیونې او قانوني کړنې شوي، چې هغه هم محدودې وې او حل شوې دي او ډېري یې د رسنیو له کار سره تړاو نهلري؛ خو قانوني یا جزایي بڼه یې درلوده.
هغه زیاته کړې: له بده مرغه دغه بنسټونه د اسرائیلو په برخه کې چوپه خوله دي او په یوه میاشت کې له ۲۰ څخه تر ۳۰ خبریالانو خپل ژوند له لاسه ورکړی او په مستقیم ډول پر نښه شوي دي.
په همدې حال کې د افغان خبریالانو مرکز هم په خپل کلني راپور کې ویلي، چې په ۲۰۲۳ کال کې د افغان خبریالانو له حقونو څخه د سرغړونې ۱۶۸ پېښې رامنځ ته شوې دي.
تازه خبرونه
شهاب الدین دلاور او ورسره مل پلاوي د مس عینک کان له اړوند سیمو لیدنه وکړه
د کانونو او پټرولیم وزارت چارسمبالي او ور سره مل پلاوي د چارشنبې پر ورځ د غویی نولسمه د مس عینک کان له بېلابېلو سیمو او د عینک سیمې له لرغونو آثارو لیدنه وکړه.
لوګر ولایت ته په دې سفر کې د کانونو او پټرولیم وزارت له چارسمبالي شهاب الدین دلاور سره د اطلاعاتو او کلتور وزارت چارسمبالي ملا خیرالله خیرخواه، په کابل کې د چین هېواد سفیر ژاو شینک، د MCC شرکت چارواکو، والي ضیاءالرحمن مدنی او د انرژۍ او اوبو وزارت مرستیال ملتیا کوله.
د کانونو او پټرولیم وزارت د څرګندونو له مخې؛ په دې اړه یوه ناسته هم تر سره شوه، چې په کې د MCC شرکت چارواکو د مس عینک کان د سړک جوړولو، د لرغونو آثارو ساتنې د پلان د وروستي کېدو او د عملي کار د پیل په اړه هر اړخیز معلومات وړاندې کړل.
د یاد شرکت چارواکو ویلي، چې د مس عینک کان د پروژې له عملي پیل سره به په سیمه کې لرغونو آثارو ته زیان ونه رسیږي.
دغه راز د اطلاعاتو او کلتور وزارت چارسمبالي هم د دغې سيمې د لرغونو آثارو او د هغو د ساتنې په اړه خبرې وکړې او د پروژې د کار د ګړندي کولو لپاره يې د همکارۍ ژمنه وکړه.
د انرژۍ او اوبو وزارت مرستیال هم د مس عینک کان د برښنا او اوبو رسولو په برخه کې د دې وزارت له همکاریو ډاډ څرګند کړ.
ویل کیږي، چې د لوګر مس عینک کان تړون له یوې چینايي کمپنۍ سره ۱۶ کاله پخوا لاسلیګ شوی دی؛ خو د دغه کان استخراج اوس هم ندی پیل شوی.
تازه خبرونه
سعودي عربستان ته د افغان حاجیانو د لېږد بهیر پیل شو
د ارشاد، حج او اوقافو وزارت چارسمبالي نور محمد ثاقب ويلي، چې له افغانستان څخه سعودي عربستان ته د حاجیانو د لېږد بهیر پیل شوی دی.
د نورمحمد ثاقب د څرګندونو له مخې؛ تېره شپه (چارشنبه د غویي نولسمه) شاوخوا ۲۳۰ حاجیان په لومړۍ الوتنه کې مدینې منورې ته ولېږدول شول.
نوموړي د افغان حاجيانو د لومړي کاروان د لېږد په مراسمو کې ويلي، چې سږ کال يې حج کوونکیو ته د غوره خدمتونو د وړاندې کولو لپاره د نورو کلونو په پرتله د کاري کمیټې کارکوونکي سعودي عربستان ته مخکې لېږلي دي.
دغه راز د ریاست الوزراء اداري مرستیال عبدالسلام حنفي په دې مراسمو کې حاجیانو ته په خطاب کې ویلي: ګرانو حاجیانو! تاسې په سعودي عربستان کې د افغانانو استازي یاست؛ نو دغه استازیتوب په ښه توګه ترسره کړئ.
عبدالسلام حنفي زیاته کړې؛ د ارشاد، حج او اوقافو وزارت په هلو ځلو تېرو کلونو ته ورته سږ کال هم د حج ټول فعالیتونه په منظم ډول ترسره شوي دي.
له دې مخکې د حج او اوقافو وزارت اعلان کړی و، چې سږ کال سعودي عربستان افغان حاجیانو ته ۳۰ زره سهمیه ورکړې ده.
ویل کیږي، چې آریانا افغان او کام ایر شرکتونو ته سږکال هم د افغان حاجیانو د لېږد او راستنولو مسوولیت سپارل شوی دی.
تازه خبرونه
تېر کال پر زړه د سوريو ۷۰۰ ماشومانو درملنه وشو – سره میاشت
د افغانستان په سویل لویديځ کې سره میاشت ادارې ويلي؛ تېر کال يې پر زړه سوريو ٧٠٠ ماشومانو درملنه کړې او په پام کې ده، چې سږ کال د ١٥ زره اړوند ماشومانو درملنه وکړي.
سره صلیب او سرې میاشتې ټولنې نړیواله ورځ د بشریت ژوندي ساتلو تر سرلیک لاندې ولمانځل شوه. په دې مراسمو کې د رییس الوزار سیاسي مرستیال له نړیوالې ټولنې وغوښتل، چې افغانستان هېر نه کړي، ځکه دا هېواد له اقتصادي ستونزو، زلزلو، طبیعي پېښو او کډوالو جبري شړلو سره مخ دی او اسلامي امارت نشي کولی دا ستونزې په یوازې سر حل کړي.
د رییس الوزرا سیاسي مرستیال مولوي عبدالکبیر ويلي؛ نړیواله ټولنه باید افغانستان له بشري اړخه هېر نکړي؛ ځکه، چې بشري همکارۍ ته اړتیا لري.
هغه وایي؛ بانکي بنديزونو او د مرستو کمېدو د افغانستان اقتصادي وضعيت پېچلى کړى او د اسلامي امارت فعاليتونه يې محدود کړي دي، نو باید د افغانستان شتمنۍ ازادې شي.
د مولوي عبدالکبیر د څرګندونو له مخې؛ د مرستو کمښت او د بانکي بندیزونو دوام د اسلامي امارت پر فعالیتونو منفي اغېز کړی دی.
د اسلامي امارت دغه چارواکي زیاته کړې، چې اسلامي امارت له نړۍ سره د متقابل احترام له مخې دوه اړخیزې اړیکې غواړي.
په افغانستان کې د سره صليب کمیټه هم د افغانستان له خلکو سره د دې بنسټ د فعاليتونو او همکاريو پر دوام ټينګار کوي.
په افغانستان کې د سره صلیب نړیوالې کمیټې رییسه کترینا ریتز ویلي: د سره صليب نړيواله کمیټه او افغاني سرې مياشتې ټولنه په ګډه کار کوي او غواړي، چې له زيانمنو شويو ټولنو سره مرستې وکړي، د دوی اساسي اړتياوې پوره او هغوی ته بنسټیز خدمتونه وړاندې کړي.
افغانني سرې میاشتې ټولنې ویلي، چې د مرستندویه بنسټونو پر وړاندې کومه ستونزه نشته او دوی کولی شي مرستې د هېواد لرې پرتو سیمو ته ورسوي.
-
تازه خبرونه3 days ago
د پاکستان خاوره د افغانستان پر ضد کارول کیږي
-
نړۍ4 days ago
حماس او اسرائیل کولی شي په غزه کې د اوربند په اړه واټن راکم کړي – امریکا
-
تازه خبرونه3 days ago
د سې شنبې پر ورځ خراسان او سرخ پوشان لوبډلو لوبه وګټله
-
تازه خبرونه4 days ago
دولتي بنسټونه د برښنا له شرکت څخه یو نیم میلیارډ افغانۍ پوروړي دي
-
سوداگري2 days ago
ازبکستان او پاکستان د افغان ټرانس اوسپنېپټلۍ پروژې پر پیلېدا ټینګار څرګند کړ
-
نړۍ5 days ago
د غزې په جګړه کې مو د مصر او قطر د اوربند وړاندیز منلی – حماس
-
لوبی2 days ago
ابو مسلم او عدالت فراه مساوي شول او میوند لوبډلې جوانان واحدي ته ۲ ګولونه ورکړل
-
تازه خبرونه3 days ago
په بدخشان ولایت کې ماین چاودنې ۸ کسانو ته مرګ او ژوبله اړولې