د ملي پخلاینې عالی شورا مشر عبدالله عبدالله ویلي؛ ده او ولسمشر غني پرېکړه کړې، چې له شرط پرته له طالبانو سره د سولې خبرې پیل کړي.

د ملي پخلاینې عالي شورا مشر عبدالله عبدالله ویلي، چې د امریکا د سولې انستیتیوت ته د ویډیو کنفرانس له لارې پر افغان سوله غږیدلی دی.

My appreciation to @USIP for hosting a comprehensive discussion today on issues & questions relating to Afghanistan peace “opportunities and challenges”. Here is the video link of my remarks & discussion.https://t.co/iQa2dlqewc

— Dr. Abdullah Abdullah (@DrabdullahCE) June 24, 2020

عبدالله زیاته کړې؛ په دې ویدیو کنفرانس کې یې د سولې د هر اړخیزې تګلارې د جوړولو یادونه کړې او له طالبانو یې غوښتي، چې د خپلې راتلونکې د ټاکلو لپاره باید د خلکو ارادې ته درناوی وکړي.

نوموړی وایي: مونږ د ( اسلامي جمهوریت ) په توګه پرېکړه کړې، چې د سولې خبرو لپاره هیڅ ډول شرط نلرو؛ زمونږ مرکچي پلاوی حاضر دی، چې خپلمنځی خبرې پیل کړي.

عبدالله ویلي اوس یې ټول تمرکز د زندانیانو پرخوشې کولو او د تاوتریخوالي پر کمولو کړی دی.

هغه دا هم په ډاګه کړې؛ که تاوتریخوالی همداسې روان وي، نو د سولې خبرو لپاره به مناسبه زمینه برابره نشي. دا، چې مونږ د خبرو لپاره هیڅ شرط نلرو؛ مقابل لوری هم باید دا موضوع په پام کې ونیسي. که د سوله ییز حل په لټه کې یو؛ نو په کار ده، چې ټول په ګډه کار وکړو.

له بلې خوا یو شمېر هېوادوال او د نظر خاوندان نیوکې کوي، چې د عبدالله عبدالله په مشرۍ د ملي پخلاینې عالي شورا چارې ځنډنۍ شوې دي.

د افغانانو د خپلمنځي خبرو د پیلیدو لپاره د زندانیانو خوشې کول مهم بلل کیږي.

تر اوسه افغان حکومت له درې زره ډېر طالب زندانیان خوشې کړي او طالبانو هم له پېنځه سوه ډېر افغان سرتېري له خپلو زندانونو خوشې کړي؛ خو طالبان ټينګار کوي، چې د خبرو له پیلیدو مخکې باید د دوی ټول پېنځه زره زندانیان د افغان حکومت له زندانونو را خوشې شي.

پخوانی طالب چارواکی سید اکبر آغا وایي: هر کله، چې د طالبانو ټول پېنځه زره بتدیان خوشې شي؛ یوه اوونۍ وروسته به خپلمنځی خبرې پیل شي.

په قطر کې د طالبانو او امریکا ترمنځ د سولې هوکړې له لاسلیک وروسته تمه وه، چې د افغانانو خپلمنځي خبرې به په جون میاشت کې پيل شي؛ خو دا، چې د بندیانو ټاکل شوی شمېر د دواړو اړخونو لخوا ندي خوشې شوي؛ خپلمنځي خبرې هم ځنډنۍ شوې دي.