د افغانستان او تاجکستان د سوداګرۍ او صنایعو خونو رییسانو د دواړو هېوادونو ترمنځ د سوداګرۍ، پانګونې او اقتصادي همکاریو د پراختیا لپاره پر ګډو هڅو ټینګار کړی دی.

د افغانستان د سوداګرۍ او پانګونې خونې د خپرې شوې خبرپاڼې له مخې؛ د دې خونې عمومي رییس سید کریم هاشمي او د تاجکستان د سوداګرۍ او صنایعو خونې رییس فرهاد شاه رحمان علیزاده په انلاین لیدنه کې د سوداګریزو اړیکو د پراختیا، د پانګونې د فرصتونو او د دواړو هېوادونو د خصوصي سکټورونو ترمنځ د همکاریو پر پیاوړتیا خبرې وکړې.

دواړو لوریو د سوداګریزو راکړو ورکړو پر زیاتوالي، د سوداګرو او پانګوالو ترمنځ د مستقیمو اړیکو پر پراختیا او د ګډو اقتصادي پروګرامونو پر ترسره کولو ټینګار وکړ.

په دې خبرو کې سید کریم هاشمي د تاجکستان سوداګرو او پانګوالو ته د امام ابوحنیفه(رح) په پېنځم ملي او نړیوال نندارتون کې د ګډون بلنه ورکړه.

ټاکل شوې دغه نندارتون د تلې پر پېنځلسمه په کابل کې پیل شي.

د تاجکستان د سوداګرۍ او صنایعو خونې رییس د افغانستان د سوداګرۍ او پانګونې خونې پلاوي ته بلنه ورکړه، چې د دوشنبه ښار په جوړېدونکي ستر سوداګریز او صنعتي نندارتون کې ګډون وکړي.

دواړو لوریو د خصوصي سکټورونو ترمنځ د همکاریو پر پیاوړتیا ټینګار وکړ.

د روسیې بهرنیو چارو وزارت ویانده ماریا زاخارووا ويلي؛ لویدیځو هېوادونو له افغانستان څخه د هغو افغانانو د وتلو په تړاو خپله تګلاره بدله کړې، چې د ۱۴۰۰لمریز لېږدیز کال له زمري وروسته یې دا هېواد پرېښی او اوس یې د جبري ایستلو بهیر چټک شوی دی.

زاخارووا د امریکا، بریټانیا او جرمني د تګلارې په اړه د رسنیو د پوښتنې په ځواب کې ویلي؛ لویدیځ هېوادونه له ستونزو سره له مخ‌کېدا وروسته د اسنادو د ورکړې او پناه ورکولو قوانین سخت کړي او هممهاله یې د افغانانو د ایستلو بهیر چټک کړی دی.

د نوموړې د څرګندونو له مخې؛ د افغانستان د پخوانیو چارواکو او پوځيانو لپاره د دې تګلارې معنا له دغو هېوادو څخه پر زوره ستنول دي. ښايي له ستنېدا وروسته په افغانستان کې پر موجه بڼه خاینان وبلل شي.

زاخارووا ویلي، له هغو افغان پناه‌غوښتونکو څخه د خلاصون بهیر چټک شوی، چې نور ورته اړتیا نه‌لیدل کېږي.

هغې همداراز د اروپايي ټولنې د ځینو هېوادونو هغو راپورونو ته نغوته کړې، چې د اسلامي امارت ډیپلوماټانو ته یې د اسنادو د ورکړې پر موخه د اعتبار اجازه ورکړې ده.

د روسیې بهرنیو چارو وزارت ویاندې د قطر د السیلیه کمپ د نږدې کېدا بندېدو ته پر نغوته ویلي، په دې هېواد کې د امریکا د پخوانۍ پوځي اډې په یوه کمپ کې د مېشتو څه باندې زر افغان همکارانو برخلیک اوس هم ناڅرګند دی.

هغې زیاته کړې، واشنګټن د خپلو پخوانیو افغان متحدانو خدمتونه هېر کړي او نه غواړي هغوی په امریکا کې ومني؛ بلکې د هغوی د بیا مېشتولو لپاره له افریقايي هېوادونو سره خبرې کوي.

زاخارووا په پای کې ویلي، د اروپايي او امریکايي هېوادونو هغه تګلاره، چې له یوې خوا د بشري حقونو د سرغړونو له کبله د اسلامي امارت چارواکي نیسي او له بلې خوا افغان همکاران افغانستان ته ستنوي. د هغې پر څرګندونه، په لویدیځ کې د مصلحت‌پالنې او بې‌اصولۍ یوه بېلګه ده.

د مالیې وزارت ويلي، د تعرفو کمیټې د ۱۴۰۵ز.کال په درېیمه غونډه کې د کورنیو تولیداتو د ملاتړ او صنعت د ودې لپاره د یو شمېر وارداتي توکو ګمرکي تعرفې لوړې کړې دي.

د دغه وزارت د څرګندونو له مخې: د بوتلونو ګمرکي تعرفه له ۱۲ څخه ۱۶ سلنې، د ودانیز رنګ له ۱۶ څخه ۳۰ سلنې، د چرمي بوټان له ۵۰ څخه ۸۰ سلنې، ګچ له ۵۰ څخه ۸۰ سلنې او روغتیايي پمپرونه له ۲۰ څخه ۲۵ سلنې ته؛ لوړه شوې ده.

دغه راز د زړه د سپرینګ ګمرکي تعرفه له ۸ څخه ۳،۵ سلنې ته راکمه شوې ده.

د مالیې وزارت زیاتوي، چې د سمنټو، اوسپنیزو نلونو، یخچالونو او د غالۍ اوبدلو لپاره د کارېدونکو اومه توکو ګمرکي تعرفې هم تر څېړنې لاندې دي.

دغه وزارت ويلي، د تعرفو د بدلون موخه د کورنیو تولیداتو ملاتړ، د صنعت پیاوړتیا او د سوداګرۍ د ودې لپاره د زمینې برابرول دي.