د ریاست‌الوزراء اقتصادي مرستیال ملا عبدالغني برادر نن(چارشنبه) په کابل کې د افغانستان د نړیوال نندارتون په مرکز کې د امام ابوحنیفه(رح) پېنځم نړیوال نندارتون پرانیست.

ملا برادر د دغه نندارتون د پرانیستې په مراسمو کې ویلي، اسلامي امارت هڅه کوي د سوداګرۍ او پانګونې په برخه کې اړینې آسانتیاوې برابرې کړي، د سوداګرو پر وړاندې خنډونه کم کړي او خصوصي سکټور ته د مناسب فعالیت زمینه برابره کړي.

نوموړي ویلي، دغه نندارتون د افغانستان د اقتصادي ظرفیتونو په پېژندنه، د کورنیو تولیداتو ملاتړ، د سوداګریزو اړیکو پراختیا او د افغانستان او سیمې ترمنځ د مستقیمو سوداګریزو اړیکو پیاوړتیا کې مهم ګام دی.

ملا برادر زیاته کړې، د افغانستان کرنیز، صنعتي او سوداګریز محصولات؛ لکه تازه او وچې مېوې، لوړ کیفیت لري او کولی شي د سوداګریزو اړیکو په پیاوړتیا او د افغانستان د تولیداتو لپاره د سیمه‌ییزو او نړیوالو بازارونو په موندلو کې مهم رول ولوبوي.

نوموړي ویلي:« د سیمې او نړۍ د هېوادونو ترمنځ سوداګریزې اړیکې د سوداګرۍ پر یوه مهم اصل؛ یعنې نسبي او مطلقو امتیازونو ولاړې دي، چې د نړۍ هېوادونه وکولی شي د تولیداتو، صنعتونو او ټکنالوژۍ په بېلابېلو برخو کې خپلې اړتیاوې پوره کړي.»

د ریاست‌الوزراء اقتصادي مرستیال زیاته کړې، هر هېواد د تولیداتو او محصولاتو په برخه کې نسبي یا مطلق امتیازونه لري او دا چاره د سیمه‌ییزې او نړیوالې سوداګرۍ له بنسټیزو عواملو څخه ده.

ملا برادر ویلي، اسلامي امارت د محدودو امکاناتو ترڅنګ د اقتصادي ودې او پراختیا د نیمګړو پروګرامونو له بشپړولو سره، د هېواد د اقتصادي بنسټونو د بیا رغونې لپاره نوي پړاوونه هم پیل کړي دي.

نوموړي د واخان اقتصادي او سوداګریز سړک پرانیستې ته په نغوته کې څرګنده کړه:« دغه سړک چین د افغانستان له لارې په تر ټولو لنډه لار د اروپا له بازارونو سره نښلوي او افغانستان په سیمه کې پر یوه فعال ټرانزیټي او سوداګریز مرکز بدلوي.»

ملا برادر زیاته کړې، د ټرانزیټي عوایدو ترڅنګ به د وخت پر تېرېدو د دې لارې په اوږدو کې لویې او مهمې بېخبناوې هم جوړې شي.

هغه ویلي، د سیمې د نښلولو لپاره د اسلامي امارت هڅې ښيي، چې افغانستان د خپلو پولو د« ګواښ له ټکو څخه د سټراټېژیکې اقتصادي همکارۍ د نښلولو پر ټکو» د بدلولو په حال کې دی او دا چاره د حکومت له لومړیتوبونو څخه ده.

دغه راز د صنعت او سوداګرۍ وزیر نورالدین عزیزي په افغانستان کې د متقابلو ګټو پر بنسټ د بهرنیو پانګونو غوښتنه وکړه.

نوموړي ویلي، اسلامي امارت به په راتلونکي کې له هېواده بهر د افغانستان د کانونو د اومه توکو د لېږد اجازه ورنه‌کړي.

د امام ابوحنیفه(رح) په پېنځم عمومي او نړیوال نندارتون کې د سلګونو کورنیو او بهرنیو شرکتونو محصولات او تولیدات په شاوخوا ۶۰۰ غرفو کې نندارې ته وړاندې شوي دي. په دغو غرفو کې خوراکي توکي، درمل، لبنیات، ودانیز توکي، لاسي صنایع، غالۍ، پلاسټیک او اوسپنې ویلې کولو محصولات نندارې ته اېښودل شوي دي.

دغه نندارتون به اووه ورځې روان وي.

د صنعت او سوداګرۍ وزیر نورالدین عزیزي بېلاروس ته په خپل رسمي سفر کې د دغه هېواد د صنعت له وزیر سره ولیدل.

په دې لیدنه کې دواړو لوریو په افغانستان کې د تولیدي فابریکو پر جوړولو، د افغانستان – بېلاروس سوداګریزې ناستې پر جوړېدا او د دواړو هېوادونو د اقتصادي کمیسیون په غونډه کې د مطرح شویو موضوعاتو پر څار نظرونه وړاندې کړل.

د بېلاروس د صنعت وزارت د دې هېواد د نړیوال صنعت په نندارتون کې د افغانستان د ګډون له کبله مننه کړې او افغانستان ته یې د ماشینونو د تولیدوونکو شرکتونو د استازولیو د لېږدولو لېوالتیا څرګنده کړې ده.

د ورکړ شویو معلوماتو له مخې؛ د ټراکټورونو او ماشینونو د تولیدوونکو شرکتونو ترڅنګ هغه شرکتونه هم شامل دي، چې د کانونو د استخراج په برخه کې کارېدونکي ماشینونه او وسایط جوړوي او بېلاروس غواړي، چې د دغو شرکتونو استازولې په افغانستان کې فعالیت وکړي.

د بېلاروس دوه‌یم نړیوال صنعتي نندارتون هم د بېلابېلو هېوادونو د شاوخوا ۵۰۰ شرکتونو په ګډون جوړ شوی، چې د اروپا او آسیا له هېوادونو څخه یې هم ګڼ‌شمېر نندارچیان لیدنه کوي.

د افغانستان او تاجکستان د سوداګرۍ او صنایعو خونو رییسانو د دواړو هېوادونو ترمنځ د سوداګرۍ، پانګونې او اقتصادي همکاریو د پراختیا لپاره پر ګډو هڅو ټینګار کړی دی.

د افغانستان د سوداګرۍ او پانګونې خونې د خپرې شوې خبرپاڼې له مخې؛ د دې خونې عمومي رییس سید کریم هاشمي او د تاجکستان د سوداګرۍ او صنایعو خونې رییس فرهاد شاه رحمان علیزاده په انلاین لیدنه کې د سوداګریزو اړیکو د پراختیا، د پانګونې د فرصتونو او د دواړو هېوادونو د خصوصي سکټورونو ترمنځ د همکاریو پر پیاوړتیا خبرې وکړې.

دواړو لوریو د سوداګریزو راکړو ورکړو پر زیاتوالي، د سوداګرو او پانګوالو ترمنځ د مستقیمو اړیکو پر پراختیا او د ګډو اقتصادي پروګرامونو پر ترسره کولو ټینګار وکړ.

په دې خبرو کې سید کریم هاشمي د تاجکستان سوداګرو او پانګوالو ته د امام ابوحنیفه(رح) په پېنځم ملي او نړیوال نندارتون کې د ګډون بلنه ورکړه.

ټاکل شوې دغه نندارتون د تلې پر پېنځلسمه په کابل کې پیل شي.

د تاجکستان د سوداګرۍ او صنایعو خونې رییس د افغانستان د سوداګرۍ او پانګونې خونې پلاوي ته بلنه ورکړه، چې د دوشنبه ښار په جوړېدونکي ستر سوداګریز او صنعتي نندارتون کې ګډون وکړي.

دواړو لوریو د خصوصي سکټورونو ترمنځ د همکاریو پر پیاوړتیا ټینګار وکړ.