تازه خبرونه
افغانستان ته ۳۵۰۰ تازه دمي امریکایي ځواکونه رالیږل کیږي
د امریکایي رسنیو د څرګندونو له مخې؛ جنګ ځپلي افغانستان ته د وسلوالو مخالفینو د له منځه وړلو او د افغان امنیتي او دفاعي ځواکونو د روزنې لپاره ۳۵۰۰ تازه دمي سرتېري رالیږل کیږي.
امریکایي ورځپاڼو ليکلي، چې د امريکا دفاع وزير جيمز مټيس د تړلو دروازو تر شا د کانگريس له غړیو سره کتلي او هغوی ته يې ډاډ ورکړی، چې افغانستان ته به زرگونه نور پوځيان ولیږل شي.
دغو رسنیو د پنټاگون د سرچينو له خولې ليکلي، چې افغانستان ته د نورو پوځيانو د لیږلو شمېر به ۳۵۰۰ وي.
د افغانستان د ملي دفاع وزارت ویاند دولت وزیري د بهرنیو ځواکونو ډېرول یوه اړتیا نومولې؛ خو آریانا نیوز ته یې په ډاګه کړې، چې افغان امنیتي او دفاعي ځواکونه د ځمکنۍ جګړې وړتیا لري او تر هغې ، چې زمونږ هوایي ځواکونه پر پښو دریږي، مونږ بهرنیو ځواکونو ته اړ یو.
دا په داسې حال کې ده، چې امریکايي بم غورزوونکیو الوتکو په تېرو څو ورځو کې د طالبانو یو شمېر مرکزونه په نښه کړي. په داسې حال کې، چې افغان امنیتي او دفاعي ځواکونه هم په کې زیانمن شوي دي؛ خو افغانستان او جنوبي آسیا ته د امریکا د نوي تګلارې پر بنست به د طالبانو د راټولیدو یو ځای هم خوندي پاتې نشي.
د نوموړي په وینا؛ د اړوند سیمو اوسیدونکي باید جنګ جوړوونکیو ته په خپلو کورونو کې ځای ورنکړي.
د پوځي چارو شنونکی میاګل خالد وایي، د بهرنیو ځواکونو له ډېریدو سره په هېواد کې به جګړه نوره هم پراخه شي.
هغه زیاتوي؛ ملکي وګړی دې طالبانو ته خوندي ځایونه نه برابروي که نه دوی به هم زیانمن شي.
جيمز متیس او د امريکا لوی درستيز جنرال جوزف دانفورد په گډه د کانگريس د وسلوالو خدمتونو جرگگۍ ته د افغانستان د جگړې په اړه معلومات ورکړی، خو دا يې نه ده روښانه کړې، چې افغانستان ته به څومره پوځيان ولیږل شي.
جنرال نيکلیسن ويلي: د پوځيانو د شمېر يادول اړين نه دي؛ خو نور پوځيان د وړتياوو د لوړلو په موخه راځي، په نویو پوځيانو کې هوايي ځواکونه هم شامل دي، چې ځينې يې پر لارې دي او ځينې نور به يې په لنډ وخت کې راورسېږي.
د لندن چاپ گارډين ورځپاڼې په خپل تازه راپور کې ويلي، چې په هرات او لوگر کې د وروستي بمبارد ټول قربانيان ولسي وگړي دي.
امريکا پخوا ويلي وه، چې په افغانستان کې ۸۴۰۰ پوځيان لري؛ خو تېره اوونۍ يې وويل، چې هلته مو د ځواکونو شمېر يوولس زره دی. د دغو تازه دمو ځواکونو له راتګ سره به یې د شمېر ۱۴ زره ۵۰۰ ته ورسیږي.
تازه خبرونه
جاپان د افغانستان له سیلاب ځپلیو سره د بېړنیو مرستو ژمنه وکړه
په افغانستان کې د جاپان سفارت د پنجشنبې پر ورځ په ډاګه کړه، چې د افغانستان د شمال له سیلاب ځپلیو خلکو سره به بېړنۍ مرستې وکړي.
د سفارت د خپرې شوې خبرپاڼې له مخې؛ دا مرستې به د جاپان د نړيوالې همکارۍ ادارې (JICA) له لارې د سره صليب او سرې مياشتې ټولنې (IFRC) او افغاني سرې مياشتې ټولنې (ARCS) پر همکارۍ ترسره شي.
دا مرست خیمې، کمبلې او نور اړین توکي رانغاړي.
په یادې خبرپاڼه کې راغلي؛ جاپان پرېکړه کړې، چې ډېر ژر به د افغانستان د سيلاب ځپلیو خلکو د مرستې لپاره بېړنۍ مرستې وکړي. مونږ تل د افغانستان د خلکو تر څنګ ولاړ یوو.
دغه راز د ملګرو ملتونو د بشري چارو د همغږۍ دفتر (OCHA) ویلي، چې په بغلان، بدخشان او تخار ولایتونو کې د سختو بارانونو او سیلابونو له کبله ۸ زره ۹۷۵ کورونه ویجاړ شوي او یا هم زیانمن شوي دي.
روسیې هم د اړتیا په صورت کې د مرستې ژمنه کړې ده.
دا په داسې حال کې، چې د اسلامي همکاریو ټولنې (OIC) هم له اسلامي هېوادونو او مرستندویه ټولونو غوښتي، چې د افغانستان له سیلاب ځپلیو سره مرسته وکړي.
تازه خبرونه
د ترکیې سفیر د افغانستان سیلاب ځپلیو ته د ۶۷۰ ټنو مرستې اعلان وکړ
په کابل کې د ترکیې سفیر د اقتصاد وزارت له چارسمبالي سره په کتنه کې څرګنده کړې، چې سبا (جمعه د غویی ۲۸ ) ته به د افغانستان د وروستیو سیلاب ځپلیو لپاره د لومړنیو توکو څه باندې۲۰ ټنه مرسته راولېږدول شي.
د اقتصاد وزارت د خبرپاڼې له مخې؛ جنګ اونال له دین محمد حنیف سره په کتنه کې له ترکیې څخه د ۶۵۰ ټنو نورو بشري مرستو له رالېدولو هم خبر ورکړی، چې په کې خیمې، خوراکي توکي، درمل، جامې او نور توکي شامل دي.
هغه دا ډاډ هم ورکړی، چې افغانستان ته به دا مرستې د اوسپنېپټلۍ له لارې د هرات تورغنډۍ بندر ته رادننه شي.
په دې کتنه کې دین محمد حنیف له دغو مرستو څخه د هرکلي تر څنګ ویلي، چې د ترکیې هېواد د تاریخ په اوږدو کې د افغانستان یو ښه دوست او همکار پاتې شوی دی.
تازه خبرونه
ملګري ملتونه غواړي په افغانستان کې د ځمکو خړبولو لپاره سولري پمپونه ولګوي
د ریاست الوزراء اداري مرستیال عبدالسلام حنفي د سې شنبې پر ورځ ( د غویی پېنځهویشتمه ) د ملګرو ملتونو د پروژې خدمتونو د دفتر (UNOPS) له اجرائیوي رییس جورج موریرا داسیلوا سره وکتل.
په دې کتنه کې جورج موریرا داسیلوا اداري مرستيال ته د خپلو تېرو هڅو او لاسته راوړنو په اړه معلومات ورکړل او څرګندوي؛ دا اداره غواړي، چې په افغانستان کې د سولري پمپونو پر لګولو د کرنيزو ځمکو د خړوبولو يوه نوې پروژه پيل کړي.
عبدالسلام حنفي د دې ادارې د فعالیتونو او لاسته راوړنو د ستاینې ترڅنګ ویلي، چې اسلامي امارت په افغانستان کې د (UNOPS) ادارې له هڅو ملاتړ کوي او د پروژو د پلي کولو لپاره یې لازمې اسانتیاوې برابروي.
ویل کیږي، چې عبدالسلام حنفي له ټولو نړیوالو مرستندویه بنسټونو وغوښتل، چې کروندګرو ته د کوکنارو د بدیل کښت او افغان ځوانانو ته د کار د زمینې په برابرولو کې همکاري وکړي.
-
تازه خبرونه4 days ago
الله ګل مجاهد د قتل پر تور ونیول شو
-
تازه خبرونه4 days ago
په بغلان کې سېلابونو ۱۹۴۵ کسانو ته مرګ او ژوبله اړولې
-
لوبی2 days ago
د کابل کرکټ غوره لیګ لوبغاړو د داوطلبۍ مراسم ترسره شول
-
تازه خبرونه2 days ago
د یوناما استازې د ایران له بهرنیو چارو وزیر سره وکتل
-
تازه خبرونه4 days ago
د اسلامي هېوادونو همکاریو ټولنې د افغانستان له سیلاب ځپلیو سره د مرستې غوښتنه وکړه
-
سوداگري5 days ago
افغانستان او پاکستان د بار وړونکیو موټرو پر نوي ټرانسپورټي میکانیزم هوکړه وکړه
-
تازه خبرونه4 days ago
څو ایراني شرکتونو د افغانستان په کانونو کې د پانګونې پرېکړه وکړه – قدیر قیافه
-
تازه خبرونه2 days ago
په ننګرهار کې د ناکامورا کانال پروژه بشپړه شوه