Connect with us

تازه خبرونه

امریکا له اسلامي امارت سره د بلې هوکړې په هڅه کې ده

خپور شوی

د

(Last Updated On: لړم ۷, ۱۴۰۱)

د حزب اسلامي رهبر وايي، امریکا له اسلامي امارت سره د لوړپوړیو امنیتي او استخباراتي چارواکو په کچه مهمې خبرې اترې پیل کړي او په دې خبرو کې یو څه پرمختګ هم شوی دی.

ګلبدین حکمتیار په خپله وروستۍ وینا کې زیاته کړې، چې د سیمې هېوادونه په ځانګړې توګه چین او روسیه د کابل او واشنګټن ترمنځ د خبرو له مبهم دریځ څخه وېره لري او که دا ستونزه هواره نشي؛ نو افغانستان به په سیمه ییزو سیالیو کې ښکېل شي او د اوکراین پر برخلیک به اخته شي.

اسلامي امارت د حزب اسلامي د رهبر حکمتیار د دغو څرګندونو په اړه څه ندي ویلي.

د حزب اسلامي رهبر ګلبدین وايي، امریکا له اسلامي امارت سره د هوکړې په لټه کې ده او دواړو لوریو د امنیتي او استخباراتي چارواکو په کچه مهمې خبرې پیل کړي دي.

حکمتیار د جمعې پر ورځ خپلو پلویانو ته ویلي: امریکا له طالبانو سره د مذاکراتو نوې لړۍ پیل کړې؛ د لوړ پوړیو پلاويو او د امنیتي او استخباراتي څانګو د چارواکو په ګډون، امریکا داسې اقدامات کړي، چې ښيي له طالبانو سره د همغږۍ او هوکړې غوښتونکي دي.

د نوموړي د څرګندونو له مخې؛ طالبان غواړي، چې خبرې اترې د دوحې پاتې مادې پوښلي او عملي کوي.

ګلبدین حکمتیار ټینګار کوي، چې د دغو خبرو اترو یوه برخه په پاکستان کې شوې او مهم پړاو یې په دوحه کې روان دی.

د حزب اسلامي رهبر ګلبدین حکمتیار وایي: ټول هېوادونه د کابل او واشنګتن ترمنځ د وروستیو خبرو اترو له پرمختګونو اندېښمن دي او دې پایلې ته رسېدلي، چې ښايي په افغانستان کې به د دوی د ګټو خلاف کارونه وشي؛ خو د دغو تړونونو نه افشا کېدل او د کابل بشپړ چوپتیا دا اندېښنې نورې هم زیاتې کړې دي.

حکمتیار زیاتوي؛ د کابل او واشنګتن ترمنځ په خبرو کې پرمختګ شوی او په افغانستان کې د امریکايي بې پیلوته الوتکو د بریدونو محدودول، د افغانیو د نویو بانکنوتونو چاپول او کابل ته د امریکا له لوري د اوونیزې نغدي مرستو زیاتول؛ ښايي د دې خبرو نورې برخې وي.

نوموړي ټینګار کړی، چې د کابل او واشنګټن ترمنځ خبرې په ابهام کې روانې دي او دې وضعیت د سیمې هېوادونه په ځانګړې توګه چین او روسیه اندېښمن کړي دي.

نوموړي زیاته کړې؛ که د کابل او واشنګتن ترمنځ شوې هوکړې په ډاګه نشي، ښايي افغانستان په سیمه ییزو سیالیو کې ښکېل شي او افغانستان به د اوکراین په برخلیک اخته کړي.

هغه وایي: که مونږ افغانان د هېواد له روانو چارو او روانو حالاتو سره مسوولانه چلند ونکړو او زمونږ د غفلت په پایله کې به کابل د لویو هېوادونو په رقابتي جګړه کې له یوه لوري او د بل لوري په مقابل کې ودرول شي؛ نو افغانستان به له منځه ولاړ او پر یو بل اوکراین بدل شي.

اسلامي امارت تر دې دمه د حزب اسلامي د رهبر ګلبدین حکمتیار د دغو څرګندونو په اړه څه ندي ویلي.

تازه خبرونه

د داعش خراسانی مشر د پاکستان په بلوچستان کې دی – رویټرز

Published

on

(Last Updated On: وری ۹, ۱۴۰۳)

رویټرز خبري اژانس راپور ورکړی، چې د داعش د خراسان څانګې مشر د پاکستان په بلوچستان ایالت کې ژوند کوي.

د دغه خبري آژانس د راپور له مخې: ۲۹ کلن ثناالله غفاري، چې شهاب المهاجر هم یاد شوی؛ دا ډله یې د داعش پر تر ټولو وېرونکې څانګې بدله کړې ده.

رویټرز دا هم څرګنده کړې، چې ثناالله غفاري په ۲۰۲۰ ز. کال کې د داعش خراسان څانګې مشري پر غاړه واخیسته او د ده د مشرۍ پر مهال دغې ډلې سخت بریدونه وکړل او یو شمېر کسان یې ځان ته جلب هم کړل.

رویټرز زیاته کړې، چې د غفاري په اړه د ۲۰۲۱ کال د کابل پر هوايي ډګر د داعش له وژونکي برید مخکې، چې ۱۷۰ افغان ملکي وګړي او ۱۳ امریکايي پوځیان ووژل شول؛ ډېر لږ معلومات خپاره شوي وه.

د داعش د خراسان څانګې بحث وروسته له هغې ګرم شو، چې د تېرې جمعې ورځ مسکو ته نږدې د کنسرت په یوه تالار کې خونړۍ ډزې وشوې او لږ تر لږه ۱۳۹ کسان په کې ووژل شول.

له دې مخکې پاکستانيو چارواکو اعلان کړی و، چې غفاري د تېر کال په جون میاشت کې د افغانستان په کونړ ولایت کې وژل شوی؛ خو اوس رویټرز خبر ورکوي، چې نوموړی پاکستان ته تښتېدلی او د بلوچستان په ایالت کې اوسېږي.

د افغانستان کورنیو چارو وزارت ویاند عبدالمتین قانع وايي، داعش له څه باندې دوه کلونو راپدیخوا په افغانستان کې ځپل شوی او خپلې عملیاتي وړتیاوې یې له لاسه ورکړي او ګواښ پېښولی نشي.

ویل کیږي، چې داعش په افغانستان کې وروستی برید د کندهار ولایت د کابل بانک پر دفتر وکړ، چې ۳ کسان یې ووژل او ۱۲ نور ټپیان دي.

Continue Reading

تازه خبرونه

د رښتر پر کچه ۵ اعشاریه ۲ درجې زلزلې افغانستان ولړزاوه

Published

on

(Last Updated On: وری ۹, ۱۴۰۳)

د هند د زلزلې ملي مرکز څرګنده کړې، چې نن (پنجشنبه د وري نهمه) له غرمې وروسته د رښتر پر کچه ۵.۲ درجې زلزلې افغانستان ولړزاوه.

دا زلزله د ځمکې په ۷۰ کیلومټره ژوروالي کې رامنځته شوې او مرکز یې د بدخشان ولایت د اشکاشم ولسوالۍ شمال ختیځه غرنۍ سیمه ده.

دغه زلزله پر افغانستان سربېره په تاجکستان، ازبکستان او قرغزستان کې هم احساس شوې ده.

تر اوسه د دې پېښې د ځاني او مالي زیان په اړه څه ندي ویل شوي.

تېر اکټوبر په هرات ولايت کې د رښتر پر کچه شپږ اعشاريه څلور درجې زلزلې له دوه زره زيات کسان مړه او ډېر کلي ویجاړ کړل.

Continue Reading

تازه خبرونه

د بیات بنیاد د روژې مرسته د بلخ ولایت اړمنو ته ورسېده

Published

on

(Last Updated On: وری ۹, ۱۴۰۳)

بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.

د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.

نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.

هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.

بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.

Continue Reading

Trending

Copyright © 2022 Ariana News. All rights reserved!