Connect with us

تازه خبرونه

ا.ا د کندهار زندان د نشه يي توکو د درملنې پر مرکز بدل کړ

خپور شوی

د

(Last Updated On: مرغومی ۴, ۱۴۰۰)

د افغانستان اسلامي امارت چارواکو د کندهار مرکزي زندان د نشه يي توکو د روږدو کسانو د درملنې پر مرکز بدل کړ.

د اناتولي خبري سرچینې د راپور له مخې؛ دمګړۍ د کندهار په مرکزي زندان کې ۸۰۰ روږدي او ۱۰۰۰ بندیان ساتل کېږي.

د کندهار زندان مرستيال مولوي منصور ويلي: مونږ د روږدو کسانو لپاره ډېر فرصتونه برابر کړي دي؛ مونږ یو ځانګړی ښوونکی استخدام کړی، چې دوی ته د مخدره توکو د پرېښودو مشوره ورکړي. مونږ د دوی لپاره یو کلینیک هم جوړ کړی، چې هره ورځ یې درملنه کوو. که دلته د دوی درملنه ونشي؛ د روږدو کسانو عمومي او ځانګړيو روغتونونو ته به یې ولېږدوو. مونږ خپله هڅه کوو، چې دوی روغ او ښه وساتو.

يو معتاد محمد نومي ویلي، چې دوى ته ډاډمنې آسانتياوې برابرې شوې دي.

هغه زیاته کړې: مونږ ټول روږدي په زندان کې یوو. مونږ ټول د ښار په ادیره کې وو … په درې یا څلورو ورځو کې مو پوره خواړه نخوړل. اوس په دې زندان کې د ورځې درې ځله خوراک کوو. دا زندان زمونږ د رغېدو لپاره ښه دی.

یو بل بشیر احمد نومی روږدی وایي: زه دوه اوونۍ وړاندې په ارغنداب کې د طالبانو (اسلامي امارت) له خوا ونیول شوم او له یوې میاشتې راپدیخوا دلته یم. که روږدي کسان له روغتیا برخمنېدل غواړي؛ نو روغېدلی شي. اوس زه خپل لمونځ او اودس په وخت ترسره کوم.

دا په داسې حال کې ده، چې په ټول افغانستان کې شاوخوا درې میلیون کسان روږدي دي؛ خو اسلامي امارت دغه شمېره تائید کړې نده.

تازه خبرونه

د داعش خراسانی مشر د پاکستان په بلوچستان کې دی – رویټرز

Published

on

(Last Updated On: وری ۹, ۱۴۰۳)

رویټرز خبري اژانس راپور ورکړی، چې د داعش د خراسان څانګې مشر د پاکستان په بلوچستان ایالت کې ژوند کوي.

د دغه خبري آژانس د راپور له مخې: ۲۹ کلن ثناالله غفاري، چې شهاب المهاجر هم یاد شوی؛ دا ډله یې د داعش پر تر ټولو وېرونکې څانګې بدله کړې ده.

رویټرز دا هم څرګنده کړې، چې ثناالله غفاري په ۲۰۲۰ ز. کال کې د داعش خراسان څانګې مشري پر غاړه واخیسته او د ده د مشرۍ پر مهال دغې ډلې سخت بریدونه وکړل او یو شمېر کسان یې ځان ته جلب هم کړل.

رویټرز زیاته کړې، چې د غفاري په اړه د ۲۰۲۱ کال د کابل پر هوايي ډګر د داعش له وژونکي برید مخکې، چې ۱۷۰ افغان ملکي وګړي او ۱۳ امریکايي پوځیان ووژل شول؛ ډېر لږ معلومات خپاره شوي وه.

د داعش د خراسان څانګې بحث وروسته له هغې ګرم شو، چې د تېرې جمعې ورځ مسکو ته نږدې د کنسرت په یوه تالار کې خونړۍ ډزې وشوې او لږ تر لږه ۱۳۹ کسان په کې ووژل شول.

له دې مخکې پاکستانيو چارواکو اعلان کړی و، چې غفاري د تېر کال په جون میاشت کې د افغانستان په کونړ ولایت کې وژل شوی؛ خو اوس رویټرز خبر ورکوي، چې نوموړی پاکستان ته تښتېدلی او د بلوچستان په ایالت کې اوسېږي.

د افغانستان کورنیو چارو وزارت ویاند عبدالمتین قانع وايي، داعش له څه باندې دوه کلونو راپدیخوا په افغانستان کې ځپل شوی او خپلې عملیاتي وړتیاوې یې له لاسه ورکړي او ګواښ پېښولی نشي.

ویل کیږي، چې داعش په افغانستان کې وروستی برید د کندهار ولایت د کابل بانک پر دفتر وکړ، چې ۳ کسان یې ووژل او ۱۲ نور ټپیان دي.

Continue Reading

تازه خبرونه

د رښتر پر کچه ۵ اعشاریه ۲ درجې زلزلې افغانستان ولړزاوه

Published

on

(Last Updated On: وری ۹, ۱۴۰۳)

د هند د زلزلې ملي مرکز څرګنده کړې، چې نن (پنجشنبه د وري نهمه) له غرمې وروسته د رښتر پر کچه ۵.۲ درجې زلزلې افغانستان ولړزاوه.

دا زلزله د ځمکې په ۷۰ کیلومټره ژوروالي کې رامنځته شوې او مرکز یې د بدخشان ولایت د اشکاشم ولسوالۍ شمال ختیځه غرنۍ سیمه ده.

دغه زلزله پر افغانستان سربېره په تاجکستان، ازبکستان او قرغزستان کې هم احساس شوې ده.

تر اوسه د دې پېښې د ځاني او مالي زیان په اړه څه ندي ویل شوي.

تېر اکټوبر په هرات ولايت کې د رښتر پر کچه شپږ اعشاريه څلور درجې زلزلې له دوه زره زيات کسان مړه او ډېر کلي ویجاړ کړل.

Continue Reading

تازه خبرونه

د بیات بنیاد د روژې مرسته د بلخ ولایت اړمنو ته ورسېده

Published

on

(Last Updated On: وری ۹, ۱۴۰۳)

بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.

د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.

نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.

هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.

بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.

Continue Reading

Trending

Copyright © 2022 Ariana News. All rights reserved!