د کلیو د بیارغونې او پراختیا وزارت وزیر عبداللطیف منصور نن له غرمې مخکې په خپل کاري دفتر کې د یو این ډي پي (UNDP) له رییس سټیفن روډریکس او مل پلاوي سره ولیدل.

عبداللطیف منصور په ایکس پاڼه کې لیکلي: د لیدنې پر مهال د یو این ډي پي رییس سټیفن روډریکس په افغانستان کې د یو این ډي پي د پروژو او فعالیتونو په اړه د کلیو د بیارغونې او پراختیا محترم وزیر ته معلومات ورکړل.

سټیفن ویلي؛ دوی د افغانستان د خلکو د اړتیاوو پر بنسټ پروژې طرحه کوي، چې خلکو ته د کار زمینه برابره شي.

هغه زیاته کړې؛ دوی به کوښښ وکړي، چې له یاد وزارت سره همغږي زیاته او د همکاریو له لارې نور هم د پروژو په زیاتوالي کې کوښښ وکړي.

 د کلیو د بیارغونې او پراختیا وزارت وزیر الحاج ملا عبداللطیف منصور په افغانستان کې د یو این ډي پي (UNDP) رییس سټیفن او ورسره مل پلاوي ته د ښه راغلاست ترڅنګ ویلي: د کلیو د بیارغونې او پراختیا وزارت ستاسې د دوامدارو مرستو قدرداني کوي.

عبداللطیف منصور ټینګار کړی؛ پروژې باید په هغو لرې پرتو سیمو کې پلي شي، چې اړتیا ورته لیدل کیږي او ژمنه يې وکړه، چې د کلیو د بیارغونې او پراختیا وزارت د بنسټیزو پروژو د پلي کولو په برخه تل له تاسې سره همکار دی.

ویل کیږي، چې د دواړو لوریو ترمنځ پر نورې همکارۍ او همغږۍ ټینګار وشو.

د امریکا ولسمشر ډونالډ ټرمپ له هغې وروسته، چې د افغانستان په اړه د ناټو د سرتېرو په تړاو د هغه څرګندونې د بریټانیا د لومړي وزیر کی‌یر سټارمر له لوري «سپکاوي کوونکې او وېرونکې» وبلل شوې؛ د بریټانوي سرتېرو رول وستایه او هغوی یې زړور جنګیالي وبلل.

ټرمپ له هغې وروسته، چې وویل اروپايي سرتېري د افغانستان د جګړې له لومړۍ کرښې لرې پاتې شوي وه؛ په بریټانیا او ټوله اروپا کې پراخ غبرګونونه راوپارول.

نوموړي د شنبې پر ورځ په «ټروټ » پانه کې ولیکل: « د بریټانیا عالي او ډېر زړور سرتېري به تل د امریکا ترڅنګ ولاړ وي! په افغانستان کې یې ۴۵۷ کسان ووژل شول، ډېر نور سخت ټپیان شول او هغوی له سترو جنګیالي څخه ول، چې هیڅکله ماتېدلی نشي.»

د ټرمپ لومړنیو څرګندونو د سټارمر غیرمعمولي غبرګون راوپاراوه؛ هغه، چې عموماً هڅه کوي په عام محضر کې پر ټرمپ له مستقیمې نیوکې ډډه وکړي.

د بریټانیا د لومړي وزیر دفتر په دې اړه یوه اعلامیه خپره کړه او څرګندوي، چې هغه د شنبې پر ورځ له ټرمپ سره پدې موضوع خبرې کړې دي.

په اعلامیه کې راغلي: « لومړي وزیر له هغو زړورو او اتلو بریټانوي او امریکايي سرتېرو ستاینه وکړه، چې په افغانستان کې یې اوږه پر اوږه جګړه کړې او ډېری یې هېڅکله بېرته خپلو کورونو ته راستانه نه‌شول. مونږ باید د هغوی قربانۍ هیڅکله هېرې نه‌کړو.»

ټرمپ د پنجشنبې پر ورځ له فاکس بزنس سره په مرکه کې ویلي وه، چې امریکا هیڅکله ناټو ته اړتیا نلرله او زیاته کړې یې وه، چې د ناټو سرتېري د افغانستان د جګړې له لومړۍ کرښې لرې پاتې شوي وه.

د کورنیو چارو وزیر خلیفه سراج‌الدین حقاني په سولې او سیاسي چارو کې د ملګرو ملتونو د عمومي منشي د مرستیالې میرمن روزمري دي‌کارلو پر مشرۍ له راغلي پلاوي سره وکتل.

د کورنيو چارو د وزارت د خبرپاڼې له مخې؛ په دې ناسته کې د افغانستان او نړیوالې ټولنې ترمنځ د تعامل د پرمختګ، د نشه‌یي توکو پر وړاندې مبارزې په برخه کې پر همکاریو، د اقتصادي ثبات پر پیاوړتیا، خصوصي سکټور ته د شته محدودیتونو لرې کولو پر لارو چارو او د ملګرو ملتونو له لوري د بشري همکاریو پر موثریت بحث او خبرې وشوې.

د کورنيو چارو وزير زیاته کړې؛ د نشه‌یي توکو کرکيلې، تولید او قاچاق پر وړاندې جدي او عملي اقدامات ترسره شوي، چې له کبله یې مثبتې پایلې لرلې دي.

همدارنګه د اسلامي امارت او نړیوالې ټولنې ترمنځ د رغنده تعامل او د واقعي شرایطو په رڼا کې د همکاریو د پراختیا په اړه هم خبرې وشوې او څرګنده شوې؛ متقابل درناوی او واقعي همکاري کولی شي، چې د باور فضا نوره هم پیاوړې کړي.

د ملګرو ملتونو پلاوي د امنیتي وضعیت او د نشه‌یي توکو پر وړاندې مبارزې له پرمختګونو ستاینه وکړه او د بشري مرستو د دوام ډاډ یې ورکړ.

ویل کیږي، چې د ملګروملتونو پلاوي د دوامدار تعامل پر ساتلو د ټینګار تر څنګ ویلي؛ د ملګرو ملتونو ټولنې پر نوښت د افغانستان په اړه د دوحې ناستو د درېيم پړاو کاري ګروپونه به خپله راتلونکې ناسته د کابل پر کوربتوب ترسره کړي.