د هلمند د سوداګرۍ او پانګونې خونې په ۲۰۲۵ زېږدیز کال کې د ۸۶ میلیون ډالرو پر ارزښت ۱۰۴  زره ټنه پنبه نړیوالو بازارونو ته صادره کړې ده.

د هلمند د سوداګرۍ او پانګونې خونې مسوولانو زیاته کړې؛ د افغانستان د پنبې صادراتو نړۍوالو بازارونو ته لار موندلې او دا محصول اوس د پاکستان پر ځای ترکیې، بنګله‌دېش او ایران ته صادرېږي، چې افغان سوداګرو ته یې نوې اقتصادي هیلې راپنځولي دي.

د هلمند د سوداګرۍ او پانګونې خونې رییس غلام یحیی ویلي، له پاکستان سره د سوداګریزو لارو تړل کېدا که څه هم ستونزې رامنځته کړې؛ خو افغان سوداګر یې دې ته اړ کړل، چې بدیل بازارونه ولټوي.

ویل کیږي، چې په هلمند ولایت کې ترټولو ډېره پنبه کرل کېږي.  

د افغانستان د صنایعو او سوداګرۍ وزارت د مرستیال احمدالله زاهد پر مشرۍ د ملي سوداګرو ۵ کسیز پلاوي د بنګله‌دېش هېواد ته رسمي سفر وکړ.

د افغانستان د صنایعو او سوداګرۍ وزارت د خپرې شوې خبرپانې له مخې؛ ټاکل شوې، چې په دې سفر کې به د افغانستان او بنګله‌دېش ترمنځ پر دوه‌اړخیزو تجارتي اړیکو، د سوداګرۍ د پراختیا، د صادراتو او وارداتو د آسانتیاوو او د ګډو پانګیزو فرصتونو په اړه هر اړخیزې خبرې او بحثونه ترسره شي.

په خبرپاڼه کې راغلي؛ د دواړو هېوادونو ترمنځ به د سوداګریزو همکاریو د پیاوړتیا او د ګډو هوکړه‌لیکونو  د لاسلیک پر لارو چارو هر اړخیزې خبرې وشي.

د صنایعو او سوداګرۍ وزارت د ټینګار له مخې؛ دا ډول سفرونه به د هېواد د اقتصادي ودې، د سوداګرۍ د پراختیا او د ملي اقتصاد د پیاوړتیا لپاره اړین او اغېزناک رول ولري.

ویل کیږي، چې د یاد سفر موخه د افغانستان د ملي سوداګرو لپاره د نویو بازارونو موندل، د افغانستان د تولیداتو لپاره د صادراتي فرصتونو پراخول او د سیمې پر کچه د اقتصادي همکاریو پیاوړتیا بلل کېږي.

د افغانستان د سوداګرۍ او پانګونې خونې چارواکو د بهرنیو چارو له وزیر امیر خان متقي سره وکتل او د سوداګرۍ پر بېلابېلو مسلو یې بحث او خبرې کړې دي.

د افغانستان سوداګرۍ او پانګونې خونې د رسنیزې خبرپاڼې له مخې؛ په دې لیدنه کې، چې د سې‌شنبې پر ورځ تر سره شوې؛ د دې ادارې عمومي رییس سید کریم هاشمي په افغانستان کې د سوداګرۍ، ټرانزیټ، پانګونې او د سوداګرۍ او پانګونې خونې پورې اړوند مسلو په اړه بحث وکړ او په اقتصادي سکټورونو کې یې د بهرنیو پانګوالو پر جذب ټینګار وکړ. هغه له بهرنیو چارو وزارت څخه وغوښتل، چې د بهرنیو پانګوالو لپاره ډېرې آسانتیاوې برابرې کړي.

د بهرنیو چارو وزیر د دوی له وړاندیزونو هرکلی کړی او ژمنه کوي، چې د بهرنیو چارو وزارت به د سوداګرۍ او ټرانزیټ په بېلابېلو برخو کې په ځانګړي توګه د بهرنیو پانګوالو لپاره د ډېرو آسانتیاوو په رامنځته کولو کې هر اړخیزه همکاري وکړي.