تازه خبرونه
بیات بنیاد د کابل ښار د شپږمې ناحیې اړمنو کسانو ته خوراکي توکي ووېشل
بیات بنیاد د خپلو ژمنیو مرستو په لړ کې د کابل ښار د شپږمې ناحیې لسګونه اړمنو کورنیو ته خوراکي توکي ووېشل.
په افغانستان کې خلک د اقتصادي ستونزو، بېوزلۍ او لوږې د ډېریدو له کبله د ژوند له سخت کړاو سره مخ شوي دي.
بیات بنیاد د خپلو ژمنیو مرستو په لړ کې د کابل ښار د شپږمې ناحیې پر لسګونو اړمنو او بېوزله کورنیو خوراکي توکي ووېشل.
د بیات بنیاد مسوولین وايي؛ په دې مرسته کې اوړه، وريجې او غوړي شته، چې موخه یې له اړمنو سره مرسته ده.
د بیات بنیاد مرستیال حاجي محمد اسماعیل وایي؛ له نېکهمرغه سږ کال مو ژمنۍ مرستې له مرکز څخه پیل کړې. ان شاالله نورو ولایتونو ته به د مرستو لړۍ ورسیږي. نن د کابل لویديځ ته راغلو او پر يو شمېر مستحقو کسانو اوړه، غوړي او وريجې ووېشل شوې.
هغو اړمنو کسانو، چې دا مرستې ترلاسه کړي؛ له نورو مرستندويه بنسټونو څخه هم غواړي، چې له اړمنو کسانو سره مرستې وکړي.
دوی غواړي، چې په دې سختو او ناوړه اقتصادي شرایطو کې له دوی سره دا مرستې روانې وساتل شي.
بیات بنیاد له جوړېدو راپدیخوا د اړمنو کسانو پر لاسنیوي سربېره په روغتیايي او پوهنیزو څانګو کې هم د پام وړ کارونه ترسره کړي دي.
تازه خبرونه
له سېلاب ځپلیو سره دې د مرستې ځانګړي حسابونه پرانیستل شي – رییس الوزراء
د افغانستان اسلامي امارت رییس الوزراء ملا محمد حسن اخوند په یوه نوي فرمان کې سپارښتنه کړې، چې مالیې وزارت باید د هېواد له سیلاب ځپلیو سره د مرستې او د هغوی لپاره د سرپناه جوړولو لپاره د ډالرو او افغانیو حسابونه پرانیزي.
په دغه فرمان کې راغلي، چې د دغو حسابونو له پرانیستلو سره به د مرستې روښانه ادرس رامنځته او اړمنو هېوادوالو ته به اسانه ورسول شي.
د دغه فرمان له مخې؛ د وزیرانو شورا د عالي مقام له لارښوونې وروسته راټولې شوې مرستې به له تدارکاتي پړاوونو، بودجې، تخصیص او تادیې پرته د ښار او کور جوړونې وزارت تر مشرۍ لاندې د یو شمېر وزارتونو پر غړیتوب ترسره شي.
په دغه فرمان کې له ټولو وګړو، ملي او نړیوالو مرستندویه بنسټونو غوښتل شوي، چې د دغو حسابونو له لارې مرستې وکړي.
تازه خبرونه
د اسلامي امارت پلاوي د ولسمشر رییسي په جنازه کې ګډون وکړ
نن چارشنبه د غبرکولي دوهیمه د افغانستان اسلامي امارت لوړ پوړي پلاوي د ایران د ارواښاد ولسمشر ابراهیم ريیسي د جنازې په مراسمو کې ګډون وکړ.
د ریاست الوزراء د اقتصادي مرستیالۍ له دفتره په خپره شوې خبرپاڼه کې راغلي، چې د ریاست الوزراء اقتصادي مرستیال ملا عبدالغني برادر او د بهرنیو چارو وزارت چارسمبالي امیرخان متقي په دې اړه تهران ته سفر کړی دی.
په دې خبرپاڼه کې راغلي، چې ملا برادر به په خپل سفر کې د ایران له دولتي چارواکو او د ارواښاد ولسمشر له کورنۍ سره وګوري او د افغانانو پر استازیتوب به د خواخوږۍ او خواسینۍ مراتب وړاندې کړي.
د خبرپاڼې له مخې، امیر خان متقي هم په دې سفر کې له ملا عبدالغني برادر سره مل دی.
د ایران رهبر د چارشنبې پر ورځ د دغه هېواد د ولسمشر، بهرنیو چارو وزیر او نورو چارواکو د جنازې لمونځ ادا کړ، چې د یکشنبې پر ورځې د چورلکې د غورځېدو په پېښه کې مړه شوي دي.
په لسګونه زره کسانو په پلازمېنه تهران کې د هغو پر بیرغ له پوښلو تابوتونو سره د خواخوږۍ ګامونه پورته کړل.
د ایران رهبر خامنهیي پخپل امامت په تهران پوهنتون کې د هغو د جنازي مراسم تر سره کړل.
د اسوشیټیډ پرس د راپور له مخې؛ په دې مراسیمو کې د ایران د سپاه پاسداران مشرانو کډون درلود، چې د هېواد لوی ځواک ګڼل کیږي.
په دې مراسمو کې د نړۍ د نورو مشرانو تر څنګ د حماس مشر اسماعیل هنیه هم ګډون کړی و.
دغه راز به په تهران کې د پاکستان لومړی وزیر شهباز شریف او د عراق لومړی وزیر محمد شیعه السوداني او د ارمنستان لومړی وزیر نیکول پاشینیان هم له دې مراسمو برخمن شي. ان له څلور لسیزو وروسته د مصر بهرنیو چارو وزیر سامح شکري هم تهران ته سفر وکړ.
ویل کیږي، چې ۶۳ کلن رییسي د ایران د رهبر ۸۵ کلن خامنهیي د احتمالي ځایناستي په توګه مطرح شوی و؛ خو اوس سترګې د خامنهيي ۵۵ کلن زوی مجتبی ته اوړي.
تازه خبرونه
د شانګهای ټولنې د اړیکو ډله دې د افغانستان لپاره پخپل حال پاتې شي – پاکستان
د پاکستان د بهرنیو چارو وزیر اسحاق ډار د سې شنبې پر ورځ (د غبرګولي لومړۍ ) د شانګهای په غونډه کې ویلي، چې اسلامي امارت باید د ټولګډونه سیاست اصل او د افغانانو ټولو حقونو ته درناوی ولري.
هغه ویلي؛ د افغانستان لپاره د اړیکو ډله باید په شانګهای ټولنه کې د عملي همکارۍ د غوښتنې په توګه هڅانده پاتې شي.
د افغانستان په اړه د شانګهای ټولنې د اړیکو ډلې غونډه په ۲۰۲۱ کال کې ترسره شوه.
د پاکستان د لومړي وزیر مرستیال او د بهرنیو چارو وزیر یو ځل بیا له اسلامي امارت څخه وغوښتل، چې په افغانستان کې د ترهګرو ډلو مخه ونیسي.
هغه ويلي: مونږ د افغانستان له لنډمهالي حکومت څخه غواړو، چې په دې اړه کوټلي او اغېزمن ګامونه پورته او د افغانستان خاوره د هیڅ هېواد پر ضد ونه کاروي.
دا په داسې حال کې ده، چې اسلامي امارت په ځلونو د پاکستان تورونه رد کړي او څرګندوي؛ هیچا ته اجازه نه ورکوي، چې د افغانستان خاوره د کوم هېواد پر ضد وکارول شي.
ډار د دوشنبې په ورځ (د زمري ۳۱مه)د شانګهای ټولنې د بهرنیو چارو وزیرانو شورا په دوه ورځنۍ غونډه کې د ګډون لپاره د قزاقستان پلازمېنې استانه ته سفر کړی دی.
ویل کیږي، چې د پاکستان د لومړي وزیر مرستیال د افغانستان د اقتصادي وضعیت د ښهوالي او د افغانانو د بشري وضعیت د حل لپاره د نړیوالې ټولنې او اسلامي امارت تر منځ د ارزښتناکو اړیکو غوښتنه وکړه.
-
لوبی4 days ago
راشد خان د افغان بیسیم مخابراتي شرکت رسمي سوداګریز سفیر شو
-
نړۍ4 days ago
د سعودي او امریکا چارواکو په غزه کې پر جګړه او دوه اړخیزې هوکړې خبرې وکړې
-
تازه خبرونه3 days ago
په افغانستان کې د وروستیو سیلابونو له کبله ۵۴۰ کسان مړه شوي – م.م
-
سیمه ییز خبرونه3 days ago
د ایران ولسمشر ابراهیم رییسي د چورلکې د راغورځېدو په پېښه کې مړ شو
-
تازه خبرونه2 days ago
سر له سبا د ترکيي هوايي شرکت افغانستان ته رسمي الوتنې پیلوي
-
روغتيا4 days ago
قطر له افغانستان سره پر زړه د سوریو ماشومانو د درملنې هوکړهلیک لاسلیک کړ
-
تازه خبرونه4 days ago
له سوالګرۍ څخه د مخنیوي قانون په رسمي جریده کې خپور شو
-
سیمه ییز خبرونه3 days ago
د ایران د ولسمشر ابراهیم رییسي راغورځېدلې چورلکه وموندل شوه – د ایران سره صلیب اداره