د بیات پاور برښنا رسونې خدماتي شرکت مسوولانو ویلي؛ بیات پاور توانېدلی، چې د جوزجان په مرکز شبرغان ښار کې له طبیعي ګاز څخه د صنعتي شرکتونو، روغتونونو، ښوونځیو، جوماتونو، پوهنتونونو او کورونو په ګډون سلګونه زره مشتریانو ته برښنا ورسوي.

بیات پاور شرکت لومړنی هغه دی، چې له طبیعي ګازه برښنا تولیدوي او د جوزجان ولایت په مرکز شبرغان ښار کې یې د ګاز له سرچینو څخه بنسټونو او د خلکو کورونو ته رڼا ورسوله.

د دغه شرکت چارواکو ویلي؛ دغه کچه برښنا له لومړي فاز څخه تولید شوې او هڅه کوي، چې د دوه‌یم او درېیم فاز له بشپړېدو سره د برښنا تولید له ۴۰ میګاواټ څخه ۲۵۰ میګاواټ ته لوړ کړي.

د بیات ګروپ لوی مشر ډاکټر احسان الله بیات د څرګندونو له مخې؛ دغه شرکت ویاړي، چې د یو میلیارډ کیلو واټ ساعت برښنا تولیدي لاسته راوړنه اعلانوي.

دا زړه راکښونکې لاسته راوړنه په تېرو څه د پاسه څلوېښت کلونو کې له طبیعي ګاز څخه د برښنا د تولید لومړنی برښنایي مرکز راپه ګوته او زمونږ د ګران هېواد افغانستان د طبیعي ګازو د پراخو زیرمو ښکارندویي کوي.

ډاکټر بیات وایي: دا ستره بریا؛ زمونږ له نه ستړي کیدونکیو هلو ځلو، د برښنا شرکت د محترم مشرتابه، د انرژۍ او اوبو وزارت، د افغان ګاز شرکت عمومي ریاست له بېسارې همکارۍ، ارزښتناکو مرستو او د دې شرکت او ټولو اړوند ارګانونو له ملاتړ او مرستو پرته، شونې نه‌وه.

هغه زیاته کړې؛ دا شرکت له ټولو برخه‌والو له ګډون او مرستې له زړه له کومې مننه کوي.

نوموړي زیاته کړې: راځئ، چې دا اړین پړاو ګډ ونمانځو او د افغانستان روښانه راتلونکي ته هیله من شوو.

دغه راز د برښنا د تولید لپاره د طبیعي ګاز کارول د چاپېریال په ښه کولو کې اغېزمن ګڼل کېږي، چې د کارپوهانو پر باور دا برښنا کولی شي د کاربن ډای اکساید د کمولو ۲۰ سلنه مخه ونیسي.

د بیات پاور شرکت رییس علي قاسمي وايي، بیات ګروپ یوازنی شرکت دی، چې په افغانستان کې له طبیعي ګاز څخه د برښنا د تولید په پروژه کې ۴۵ توربینونه لري، چې دا په نړۍ کې یوه بې سارې هڅه ده.

د بیات پاور شرکت رییس اوسنی وضعیت په افغانستان کې د پانګونې لپاره ښه فرصت بولي او څرګندوي؛ افغانستان په تېرو څو لسیزو کې د سولې او امنیت دا کچه تجربه کړی نده.

علي قاسمي په دې اړه وایي: بیات ګروپ په افغانستان کې تر ټولو ستره خصوصي پانګه‌اچونه کړې او اوسمهال په افغانستان کې له ګاز څخه د برښنا یوازنی برښنایي مرکز اداره کوي، چې تر اوسه یې شاوخوا یو میلیارډ کیلوواټ ساعت برښنا تولید کړې ده. افغانستان پانګونې ته چمتو دی او په دې وروستیو لسیزو کې افغانستان دا سوله او امنیت تجربه کړی ندی.

نوموړي زیاته کړې: افغانستان هغه هېواد دی، چې ۳ میلیارډ وګړو احاطه کړی او شاوخوا ۴۰ میلیونه وګړي په کې پر منځنۍ کچه له ۱۹ کلونو څخه ډېر کم عمره وګړي او ډېر امکانات لري. دا له مونږ سره د يو ځای کېدو او په ځانګړي توګه د انرژۍ په برخه کې د پانګونې لپاره یو ښه وخت دی؛ ځکه، چې افغانستان د ګاز ډېرې پراخه سرچینې لري.

بیات پاور د جوزجان ولایت په شبرغان ښار کې له ګاز څخه د برښنا د تولید لوی او ځانګړی برښنایي مرکز دی، چې د زیمنس SGT A-45 توربین پر کارولو د برښنایي اړتیاوو د پوره کولو او د نړیوال مشارکت لئپاره یوه ښه بېلګه ده.

بیات پاور له افغانستان سره د انرژۍ د خوندیتوب په برخه کې د مرستې او د انرژۍ پر ځان بسیاینې ته د لار اوارولو په موخه رامنځته شوی دی.

د یادونې ده، چې بیات پاور تېر کال د ۲۰۲۳ د آسیا پاور لویه جایزه هم ګټلې ده، چې په کې له ټولو آسیایي هېوادونو څخه د انرژۍ بېلابېلې پروژې د دغې جایزې ګټلو ته نومول شوې وې. دغه جایزه د مالیزیا په مرکز کوالالمپور کې د یو لړ ځانګړو مراسمو په ترڅ کې د بیات پاور چارواکو ته ورکړ شوه.

نور اړوند خبرونه:

بیات پاور شرکت د آشین پاور ۲۰۲۳ کال ویاړلې جایزه وګټله

بیات پاور له طبیعي ګازه د حرارتي برښنا هڅې پیل کړې