تازه خبرونه
جانګ مینګ او بلاول بوټو زرداري له افغانستان سره پر همکاریو ټینګار څرګند کړ
د شانګهای د همکارۍ سازمان عمومي منشي جانګ مینګ د جمعې پر ورځ (د چنګاښ ۳۱) د پاکستان د بهرنیو چارو له وزیر بلاول بوټو زرداري سره وکتل.
د پاکستان د بهرنیو چارو وزارت په ډاګه کړې؛ بلاول بوټو زرداري د شانګهای د همکارۍ سازمان عمومي منشي او ورسره پلاوي ته ښه راغلاست ووایه او هغه ته یې د دې مقام د تر لاسه کولو مبارکي ورکړه.
هغه د شانګهای همکارۍ سازمان د چوکاټ او اصولو پر بنسټ د موخو د ترلاسه کولو لپاره د پاکستان پر هوډ ټینګار وکړ او په سیمه کې یې د شانګهای همکارۍ سازمان پراخې وړتیاوې په ډاګه کړې.
هغه څرګنده کړې: د دوامدار پرمختګ او ټولنیزې هوساینې د ترلاسه کولو لپاره د شانګهای د همکارۍ سازمان د ټولو وړتیاوو د کارولو لپاره ګډه او ډله ییزه همکاري اړینه ده.
د پاکستان د بهرنيو چارو وزير په ټولنيزو او اقتصادي برخو کې د شانګهای همکارۍ سازمان هراړخيزې او بېلابېلې همکارۍ ته په نغوته کې، د ترانسپورت، غذایي امنيت، د تکنالوژۍ، سوداګرۍ او اقتصاد په ګډون په بېلابېلو برخو کې د پاکستان پر چمتووالي ټينګار وکړ.
بلاول بوټو د شانګهای د همکارۍ د سازمان د غړیو هېوادونو لپاره د ترانسپورت او سوداګرۍ د مرکز په توګه د پاکستان د امکاناتو په اړه وینا وکړه او د شانګهای د همکارۍ ټولنې په پیاوړتیا کې یې د فعال او رغنده رول لوبولو لپاره د اسلام آباد پر لیوالتیا ټینګار وکړ.
هغه د خپلې وینا په یوه بله برخه کې د افغانستان پرمختګونو ته په نغوته کې پر امنیت، ثبات او پرمختګ ټینګار وکړ او د سیمه ییزو اړیکو د پراختیا لپاره یې د عملي، هراړخیزو او اغېزمنو همکاریو د اړتیا په اړه یې وویل: نړیواله ټولنه باید په افغانستان کې د پراخو اقتصادي او بشري ناورین له ننګونو سره د مقابلې لپاره همکاري وکړي.
د پاکستان د بهرنیو چارو وزیر دغه راز د افغانستان له حکومتي چارواکو وغوښتل، چې د نړیوالې ټولنې ټولې اندېښنې حل کړي او له ترهګرۍ سره د مبارزې او د نجونو د تعلیم په ګډون د ښځو د حقونو د درناوي لپاره خپلې هڅې روانې وساتي.
تازه خبرونه
په کابل کې د نجونو کافي خونه او کتابتون پرانستل شو
د نجونو یوې څلورکسیزې ډلې د چارشنبې پر ورځ د غبرګولي نهمه په کابل کې د نجونو او ښځو د مطالعې لپاره یوه کافي خونه او کتابتون جوړ کړی او له ښځو او نجونو غواړي، چې ګټه ترې پورته او خپله پوهنیزه کچه لوړه کړي.
د هغو ښځو لپاره، چې په دې مراسمو کې یې برخه اخیستې وه؛ دا یو ښه نوښت و، په ځانګړي توګه د هغو لپاره، چې د ښوونځي او پوهنتون زدهکړې یې ځنډېدلي دي.
له څه نا څه درې کلونو راپدیخوا په افغانستان کې له شپږم ټولګي څخه پورته د نجونو او ښځو د ښوونځيو او پوهنتونونو زدهکړې ځنډېدلي او له ورتګه بې برخې پاتې دي.
د نجونو دې څلورکسیزې ډلې؛ نجونو او میرمنو ته نه یوازې د زدهکړې لپاره کتابتون او قهوه خونه جوړ کړې، بلکې غواړي هغو میرمنو او نجونو ته، چې د علم او پوهې د ترلاسه کولو په لټه کې دي هم د لوست زمینه برابره کړي.
د کافي خونې مسووله زهرا وایي: هغه نجونې او میرمنې، چې دلته د لوست او مطالعې لپاره راځي؛ یو شمېر نورې نجونې ورته کافي له خواږو توکو سره برابروي، چې ذهنې ستړیا یې راکمه شي.
داسې انګیرل کیږي، چې د ښځو او نجونو د ښوونیزو محدودیتونو له کبله د داسې چاپېریال رامنځته کول یوه اړتیا ګڼل کیږي.
په ټولیزه توګه غوښتنه دا ده، چې د ښوونځیو او پوهنتونونو دروازې د نجونو او ښځو پر مخ پرانیستل شي.
تازه خبرونه
د اروپايي ټولنې او قطر استازو د افغانستان په اړه خبرې وکړې
د افغانستان لپاره د اروپايي ټولنې ځانګړي استازي توماس نیکولسون او د قطر بهرنیو چارو وزارت سفیر او ځانګړي استازي فیصل بن عبدالله الحنزاب د افغانستان پر روان وضعیت بحث او خبرې وکړې.
د هغې خبرپاڼې له مخې، چې تېره ورځ د غبرګولي نهمه ناوخته د قطر بهرنيو چارو وزارت په ایکس پاڼه کې خپره کړې؛ راغلي، چې دغه ليدنه د قطر په پلازمېنه دوحه کې ترسره شوې او دواړو چارواکو په کې د افغانستان پر روانو حالاتو او سولې او ثبات ته د رسېدو لپاره د ګډو نړیوالو هڅو په اړه خبرې وکړې.
دا غونډه په داسې حال کې ترسره شوې، چې قطر به په نږدې یوه میاشت کې د افغانستان په اړه د درېیمې غونډې کوربه وي.
په دې غونډه کې د افغانستان د چارسمبالي حکومت استازي هم بلل شوي دي.
د افغانستان د چارسمبالي حکومت استازو د دوحې په دوهیمه ناسته کې د افغانستان لپاره د ملګرو ملتونو د ځانګړي استازي له ټاکل کېدو سره د مخالفت له کبله ګډون ونکړ؛ خو په درېیمه ناسته کې د ګډون لپاره د اندونو پر وړاندې کولو غور روان دی.
تازه خبرونه
د زدهکوونکیو د خوراکي خوندیتوب لپاره ۱۰ میلیون یورو مرسته کیږي – اروپايي ټولنه
د خوړو نړيوال پروګرام (WFP) څرګنده کړې، چې اروپايي ټولنه به د افغان زدهکوونکیو د خوړو د خونديتوب پياوړتيا لپاره له دې پروګرام سره ۱۰ ميليون يورو ځانګړې کړي.
د خوړو نړيوال پروګرام د چارشنبې پر ورځ (د غبرګولي نهمه) په يوه خبرپاڼه کې څرګنده کړې، چې دغه مرسته د فراه، غور، جوزجان، ننګرهار، نورستان، پکتيکا، روزګان او زابل ولايتونو له ۱۰ زره څخه زيات د ښوونځيو زدهکوونکي تر پوښښ لاندې راولي.
دغې ادارې زیاته کړې، چې د اروپايي ټولنې د اضافي مالي مرستو په لړ کې به د لس زره ښوونځیو پر زدهکوونکیو غني خوراکي بسکیټ یا ځواکمن تولید شوي غذايي خوراکونه ووېشل شي.
د یادې خبرپاڼې له مخې؛ د څلورم او شپږم ټولګیو نجونو زدهکوونکیو ته به هم د نباتي غوړیو او نغدو پیسو مرسته ورکړ شي.
په افغانستان کې د خوراکي توکو د نړیوال پروګرام مشرې هسیائو ویلی وايي؛ دې بنسټ څه باندې دوه لسیزې وړاندې د ښوونځیو د تغذیې پروګرام پیل کړ، چې د خوړو خوندیتوب او ښه تغذیه له پوهنې سره ونښلول شي.
د نوموړې د څرګندونو پر بنسټ، د خوړو نړيوال پروګرام تېر کال په ښوونځيو کې له یو اعشاریه پېنځه ميليون ماشومانو سره مرسته کړې او اروپايي ټولنه د دې مرستې مهم ونډوال شمېرل شوى دى.
دا په داسې حال کې ده، چې اروپايي ټولنې له دې مخکې هم د افغانستان د ښوونځیو د ښوونیز چاپېریال په ښه کولو کې مرسته کړې ده.
-
تازه خبرونه3 days ago
آریانا نړیوال ټلویزیون “د ویډیو په ثبتولو کې د مرستې غوښتنې” یو نوی پروګرام پیل کړ
-
لوبی4 days ago
د ۲۰۲۴ شل اوریز نړیوال جام سیالیو ټولې لوبډلې په ډاګه شوې
-
سیمه ییز خبرونه2 days ago
نواز شریف یو ځل بیا د پاکستان د واکمن مسلم لیګ ګوند مشري پر غاړه واخیسته
-
تازه خبرونه5 days ago
له ناقانونه مهاجرینو سره به جګړې ته ورته چلند وشي- د تهران والي مرستیال
-
لوبی4 days ago
افغانستان د ۲۰۲۴ فوټسال نړیوال جام په C ګروپ کې راغی
-
نړۍ2 days ago
په رفح کې پر اسرائيلي بريدونو لسګونه فلسطينيانو ووژل شول
-
سیمه ییز خبرونه5 days ago
د هند د لویدیځ په یوه تفریحي مرکز کې اور لګېدنې لږ تر لږه ۲۴ کسان مړه شوي
-
تازه خبرونه5 days ago
د خواف – هرات د اوسپنېپټلۍ د وروستۍ برخې د جوړولو کار پیل شو