تازه خبرونه
جان نيکولسن اداري فساد او کمزورې رهبري د افغان ځواکونو کمزوري ټکي وبلل
د ناټو د پرېکنده ملاتړ د ماموریت قومندان په راتلونکي ميلادي کال کې د افغان ځواکونو کمزورې مشري او اداري فساد د افغان دولت دوه لویې ننګونې بولي.
جنرال جان نیکولسن وایي، د کم کاریو له کبله افغان سرتېري په لرو پرتو سیمو کې د خوراکي توکو او تجهیزاتو له کمښت سره مخامخ دي. دغه څلور ستوریز امریکایي جنرال د افغانستان ثبات له یوې خوا او بل لور د پاکستان، روسیې او ایران نفوذ د اندېښنې وړ بولي. دغه امریکایي جنرال روسیه تورنوي چې طالبانو ته د مشروعیت ورکولو په لټه کې ده.
د روان میلادي کال ایله څو ورځې پاتې دي، خو په افغانستان کې د ناټو د پرېکنده ملاتړ د ماموریت قومندان په پنتاګون کې خبریالانو ته ویلي چې راتلونکي کال کې د افغان دولت پر وړاندې لویې ننګونې پرتې دي.
په افغانستان کې د ناټو د پرېکنده ملاتړ د ماموریت قومندان جنرال جان نیکولسن وايي: “مونږ د مشري او اداري فساد په برخو کې د ښه والي په انتظار یو. دا هغه چارې دي چې د جګړې په ډګر کې د افغان ځواکونو د استقامت د کمزورتیا سبب کېږي. نو له همدې کبله د ځینو کم کاریو او د لوجستیک په برخه کې د فساد له امله سرتېري په لرو پرتو سیمو کې مهمات، اوبه او خوراکي توکي چې د جګړې د پرمخ بېولو له پاره یې اړتیا ده، نه شي ترلاسه کولی.”
دغه امریکایي جنرال د افغان دولت د خپلمنځي کړکېچونو په هکله هم اندېښنه ښیي.
جنرال جان نیکولسن زیاتوي: “روښانه ده چې مونږ د افغان دولت د ثبات په هکله اندېښنه لرو. زه پوهېږم چې ټول تاسو له نږدې سیاسي تکامل تعقیبوئ. زما پیغام زمونږ افغان همکارانو او د سیاسي اپوزیسون غړو ته دا دی چې ستاسو سیاسي بهیر ته درنای کوو، خو مهرباني وکړئ اجازه مه ورکوئ چې دغه بهیر امنیتي لاسته راوړنې چې په ستر قېمت سره سږ کال تر لاسه شوي، کمزوري کړي.”
له بلې خوا په افغانستان کې د بهرنیو هېوادونو نفوذ د دغه امریکایي جنرال بله اندېښنه ده.
نیکولسن وايي: “د بهرنیو لوبغاړو کرغېړن نفوذ په ځانګړې توګه د پاکستان، روسیې او ایران دوهمه اندېښنه ده. مونږ ته د بهرنیو له خوا د وسله والو یاغیانو د ملاتړ موارد په ځانګړې توګه په هغو ځایونو کې چې یاغیان د دولتونو له خوا پناه ځایونه ترلاسه کوي، د اندېښنې وړ مساله ده.”
دغه امریکایي جنرال روسیه هم تورنوي چې طالبانو ته مشروعیت ورکوي.
جنرال جان نیکولسن زیاتوي: “روسیې په ښکاره توګه طالبانو ته مشروعیت ورکړ او د هغوی روایت داسې و، طالبان هغه څوک دي چې له داعش سره جنګېږي نه له افغان دولت سره. دا مشروعیت ورکول د حقیقت پر بنسټ نه و دا د افغان دولت او ناټو د هڅو د کمزورتیا او د دښمن د پیاوړتیا اقدام و.”
خو یواځې طالبان د افغانستان له پاره ستونزه نه ده، بلکې دغه امریکایي جنرال وایي، حقاني شبکه هم افغان ځواکونو او بهرنیو سرتېرو ته لوی ګواښ دی.
جنرال جان نیکولسن زیاتوي: “حقاني شبکه امریکایانو، نړیوالو او افغان ځواکونو ته ستر ګواښ دی. هغوی همدا اوس پنځه امریکایي وګړي یرغمل کړي دي. هغوی زمونږ یوه لویه اندېښنه ده او پاکستان کې پناه ځایونه لري.”
له بلې خوا دغه امریکایي جنرال وایي، افغان ځواکونو څلور په سلو کې تر واک لاندې سیمه په تېرو دوو میاشتو کې له لاسه ورکړې ده.
نیکولسن وايي: “افغان ځواکونه د نفوسو ۶۴په سلو کې سیمه تر واک لاندې لري چې له ۶۸ سلنې ټیټه کچه ده چې د سپتمبر په میاشت کې مو پرې خبرې کړې وې. دا کمی په دې مانا نه دی چې طالبانو د ډېرو سیمو ولکه په لاس کې اخیستې ده، هغوی لا هم د نفوسو لس په سلو کې سیمه په واک کې لري، خو اوس ډېرې سیمې د جګړې ځای دی.”
دغه امریکایي جنرال چې د افغان ځواکونو د روزنې، مشورو او مرستې ماموریت پر مخ وړي وایي، په روان کال کې امریکایي ځواکونو د داعش او القاعده پر ضد ۳۵۰عملیات تر سره کړي چې د القاعده پنځوس مشران او د داعش دولس مشران په کې له منځه تللي دي.
تازه خبرونه
جاپان د افغانستان له سیلاب ځپلیو سره د بېړنیو مرستو ژمنه وکړه
په افغانستان کې د جاپان سفارت د پنجشنبې پر ورځ په ډاګه کړه، چې د افغانستان د شمال له سیلاب ځپلیو خلکو سره به بېړنۍ مرستې وکړي.
د سفارت د خپرې شوې خبرپاڼې له مخې؛ دا مرستې به د جاپان د نړيوالې همکارۍ ادارې (JICA) له لارې د سره صليب او سرې مياشتې ټولنې (IFRC) او افغاني سرې مياشتې ټولنې (ARCS) پر همکارۍ ترسره شي.
دا مرست خیمې، کمبلې او نور اړین توکي رانغاړي.
په یادې خبرپاڼه کې راغلي؛ جاپان پرېکړه کړې، چې ډېر ژر به د افغانستان د سيلاب ځپلیو خلکو د مرستې لپاره بېړنۍ مرستې وکړي. مونږ تل د افغانستان د خلکو تر څنګ ولاړ یوو.
دغه راز د ملګرو ملتونو د بشري چارو د همغږۍ دفتر (OCHA) ویلي، چې په بغلان، بدخشان او تخار ولایتونو کې د سختو بارانونو او سیلابونو له کبله ۸ زره ۹۷۵ کورونه ویجاړ شوي او یا هم زیانمن شوي دي.
روسیې هم د اړتیا په صورت کې د مرستې ژمنه کړې ده.
دا په داسې حال کې، چې د اسلامي همکاریو ټولنې (OIC) هم له اسلامي هېوادونو او مرستندویه ټولونو غوښتي، چې د افغانستان له سیلاب ځپلیو سره مرسته وکړي.
تازه خبرونه
د ترکیې سفیر د افغانستان سیلاب ځپلیو ته د ۶۷۰ ټنو مرستې اعلان وکړ
په کابل کې د ترکیې سفیر د اقتصاد وزارت له چارسمبالي سره په کتنه کې څرګنده کړې، چې سبا (جمعه د غویی ۲۸ ) ته به د افغانستان د وروستیو سیلاب ځپلیو لپاره د لومړنیو توکو څه باندې۲۰ ټنه مرسته راولېږدول شي.
د اقتصاد وزارت د خبرپاڼې له مخې؛ جنګ اونال له دین محمد حنیف سره په کتنه کې له ترکیې څخه د ۶۵۰ ټنو نورو بشري مرستو له رالېدولو هم خبر ورکړی، چې په کې خیمې، خوراکي توکي، درمل، جامې او نور توکي شامل دي.
هغه دا ډاډ هم ورکړی، چې افغانستان ته به دا مرستې د اوسپنېپټلۍ له لارې د هرات تورغنډۍ بندر ته رادننه شي.
په دې کتنه کې دین محمد حنیف له دغو مرستو څخه د هرکلي تر څنګ ویلي، چې د ترکیې هېواد د تاریخ په اوږدو کې د افغانستان یو ښه دوست او همکار پاتې شوی دی.
تازه خبرونه
ملګري ملتونه غواړي په افغانستان کې د ځمکو خړبولو لپاره سولري پمپونه ولګوي
د ریاست الوزراء اداري مرستیال عبدالسلام حنفي د سې شنبې پر ورځ ( د غویی پېنځهویشتمه ) د ملګرو ملتونو د پروژې خدمتونو د دفتر (UNOPS) له اجرائیوي رییس جورج موریرا داسیلوا سره وکتل.
په دې کتنه کې جورج موریرا داسیلوا اداري مرستيال ته د خپلو تېرو هڅو او لاسته راوړنو په اړه معلومات ورکړل او څرګندوي؛ دا اداره غواړي، چې په افغانستان کې د سولري پمپونو پر لګولو د کرنيزو ځمکو د خړوبولو يوه نوې پروژه پيل کړي.
عبدالسلام حنفي د دې ادارې د فعالیتونو او لاسته راوړنو د ستاینې ترڅنګ ویلي، چې اسلامي امارت په افغانستان کې د (UNOPS) ادارې له هڅو ملاتړ کوي او د پروژو د پلي کولو لپاره یې لازمې اسانتیاوې برابروي.
ویل کیږي، چې عبدالسلام حنفي له ټولو نړیوالو مرستندویه بنسټونو وغوښتل، چې کروندګرو ته د کوکنارو د بدیل کښت او افغان ځوانانو ته د کار د زمینې په برابرولو کې همکاري وکړي.
-
تازه خبرونه5 days ago
الله ګل مجاهد د قتل پر تور ونیول شو
-
تازه خبرونه4 days ago
په بغلان کې سېلابونو ۱۹۴۵ کسانو ته مرګ او ژوبله اړولې
-
لوبی2 days ago
د کابل کرکټ غوره لیګ لوبغاړو د داوطلبۍ مراسم ترسره شول
-
تازه خبرونه3 days ago
د یوناما استازې د ایران له بهرنیو چارو وزیر سره وکتل
-
تازه خبرونه4 days ago
د اسلامي هېوادونو همکاریو ټولنې د افغانستان له سیلاب ځپلیو سره د مرستې غوښتنه وکړه
-
سوداگري5 days ago
افغانستان او پاکستان د بار وړونکیو موټرو پر نوي ټرانسپورټي میکانیزم هوکړه وکړه
-
تازه خبرونه4 days ago
څو ایراني شرکتونو د افغانستان په کانونو کې د پانګونې پرېکړه وکړه – قدیر قیافه
-
تازه خبرونه2 days ago
په ننګرهار کې د ناکامورا کانال پروژه بشپړه شوه