په ترکیه کې د امریکا سفارت تېره ورځ ( سې شنبه د وري ۱۰) په ډاګه کړې؛ د افغانستان د سولې لپاره د امریکا ځانګړي استازي زلمي خلیلزاد د افغانستان د سولې بهیر د استانبول د راتلونکې ناستې په اړه خپل څلور ورځنی سفر پای ته رسولی دی.

یادې سرچینې په ډاګه کړې؛ د استانبول ناسته له افغان مذاکره کوونکیو سره مرسته کوي، چې په افغانستان کې د جګړې پای ته رسولو لپاره پر سیاسي جوړجاړي او دایمي اوربند د هوکړې لپاره خپلې هڅې ګړندۍ کړي.

په خبرپاڼه کې راغلي: دغه کنفرانس به په دوحه کې د سولې خبرو اترو بشپړونکی وي.

خلیلزاد له څو ورځو راپدیخوا په ترکیه کې و او له یو شمېر ترکي چارواکو سره یې د افغانستان د سولې په اړه بحث او خبرې کړي دي.

د سفارت د څرګندونو له مخې؛ امریکايي او ترکي چارواکو د استانبول کنفرانس پر مهالوېش، وخت ، اجنډا او عمومي اهدافو مشوره کړې ده.

په اعلامیه کې راغلي: دوی هوکړه وکړه، چې د افغانانو په مشرۍ دا کنفرانس به د سولې بهیر د ګړندي کولو لپاره د نړیوالې ټولنې د لوړې کچې له ملاتړه برخمن وي.

دوی هوکړه کړې، چې له افغان لوریو څخه به په دې کنفرانس کې د رغنده ګډون لپاره د چمتووالي غوښتنه هم شوې ده.

دا خبره وروسته له هغې وروسته راپورته شوه، چې د ملي پخلاینې عالي شورا مشر عبدالله عبدالله تیره اوونۍ ویلي؛ هیله من دی، چې د استانبول په ناسته کې به د سولې د حل په برخه کې د پام وړ پرمختګونه رامنځته شي.

عبدالله ویلي، چې د دوحې ناستې به روانې وي؛ خو د استانبول په ناسته کې باید سیاسي هوکړه رامنځته شي.

د نوموړي د څرګندونو له مخې؛ په دوحه کې له تېرو څو میاشتو د دواړو خواوو تر منځ ډېر بحثونه شوي دي. د دوحې بهیر به دوام ومومي او بیا به مونږ د استانبول ناسته ولرو. د استانبول غونډه به په لوړه کچه جوړه شي.

تر دې دمه د استانبول ناستې لپاره کومه نېټه نده تائید شوې؛ خو په پراخه کچه تمه ده چې دا به د راتلونکې میاشتې په پیل کې ترسره شي.