د اسلامي امارت ویاند ذبیح الله مجاهد له‌خوا په خپاره شوي پیغام کې راغلي: د پېښور د اکوړه خټک د دارالعلوم حقانیه مدرسې مشر شیخ الحدیث مولانا محمد ادریس  پر شهادت رسول شوی دی.

د خواخوږۍ او خواشینۍ په دې پیغام  کې پر نوموړي دا برید پر سختو ټکو غندل شوی او د علماء کرامو په شهادت رسول یې د اسلام او علماؤو د دښمنانو کار بللی دی.

په دې پیغام کې د نوموړي جید عالم او د زرګونو علماؤو د استاذ شهادت د ټول علمي کهول، علماء کرامو او اسلامي نړۍ لپاره یوه ستره او نه جبرانیدونکې ضایعه بلل شوې ده.

 پاکستاني رسنیو د پولیسو د څرګندونو له مخې ویلي، چې پر نوموړي ډزې د ناڅرګندو وسلوالو له‌خوا ترسره شوي او وسلوالو له سیمې تېښته کړې؛ خو لټون یې روان دی.

د راپورونو له مخې؛ پر مولانا محمد ادریس د ډزو پېښه د چارسدې ولسوالۍ په اتمانزو سیمه کې رامنځته شوې او په دې پېښه کې دوه پولیس هم ټپیان شوي دي.

د مولانا محمد ادریس د جنازې لمونځ به نن( سې‌شنبه د غویي پېنځلسمه / د می پېنځمه) د مازیګر ۵:۳۰ د هغه په ​​پلرني کلي( د چارسدې تورنګزيو) کې ادا او خاورو ته وسپارل شي.

ویل کیږي، چې مولانا محمد ادریس د حدیثو په اړه د لکچر ورکولو لپاره دارالعلوم اتمانزو ته روان و، چې دا خونړۍ پېښه رامنځته شوه.

د روغتیا وزارت د خپرې شوې خبرپاڼې له مخې؛ د دې وزارت د خوړو او درملو مرستیال حمدالله زاهد اوورسره  مل پلاوي یې افغان سوداګرو ته د درملو واردولو په برخه کې د آسانتیاوو رامنځته کولو لپاره روسیې ته سفر کړی.

په خبرپاڼه کې راغلي، چې د دغه سفر موخه د افغانستان او روسیې ترمنځ د دوه‌ اړخیزو اړیکو پیاوړتیا، د خوړو او درملو برابرول، تنظیم او په ځانګړي توګه افغان سوداګرو ته د معیاري، خوندي او د باور وړ درملو او خوراکي توکو د وارداتو لپاره اغېزمنې آسانتیاوې رامنځته کول ښودل شوي دي.

د خبرپاڼې له مخې؛ په دې سفر کې به یاد پلاوی د روسیې د درملو او روغتیايي محصولاتو د تنظیمي ادارو له مسوولانو سره خبرې وکړي او هم به د معیارونو همغږۍ، د ثبت بهیر د آسانتیا، د کیفیت کنټرول میکانیزمونو ښه‌کېدا او د اغېزمنو همکاريو د چوکاټونو جوړولو په اړه هر اړخیز بحثونه ترسره شي.

په خبرپاڼه کې راغلي:« د روسیې د درمل جوړولو معتبرو شرکتونو څخه لیدنه، د تولیدي ظرفیتونو ارزونه، د درملو د تولید او کیفیت کنټرول د دې سفر نورې موخې دي.

یونیسف د ۲۰۲۵ ز. کال په خپل کلني راپور کې د افغانستان پر کچه ماشومانو او کورنیو ته د چوپړتیاوو له وړاندې کولو خبر ورکړی او همهاله یې شته پېچلو ننګونو ته هم نغوته( اشاره ) کړې ده.

د راپور له مخې؛ د یونیسف تر ملاتړ لاندې مرکزونو له لارې له ۲۰ میلیونو څخه زیاتو کسانو، چې ۵.۶ میلیون ماشومان هم په کې دي؛ د دې بنسټ د لومړنیو روغتیايي پاملرنو له چوپړتیاوو څخه ګټه اخیستې ده.

دغه راز ۱۰ میلیون ماشومان او میندې د تغذیې له اړینو توکو او چوپړتیاوو برخمن شوي، چې د خوارځواکۍ او ناروغیو په کمولو کې یې مهم رول لوبولی دی.

د زده‌کړې په برخه کې ۴ میلیون ماشومانو په ښوونځیو کې د ټولنې پر بنسټ ښوونیزو بېړنیو پروګرامونو، درسي او ښوونیزو توکو ته لاسرسی موندلی دی.

یونیسف دا هم ویلي، چې ۲.۷ میلیون کسان د څښاک له پاکو اوبو، حفظ‌الصحې او روغتیایي بېړنیو چوپړتیاوو څخه برخمن شوي دي.

دې ادارې د ملاتړ کوونکو او تمویلونکو له همکارۍ او ملاتړ څخه مننه کړې او ټینګار کوي، چې دغه لاسته راوړنې له ګډ کار پرته ممکنې نه‌وې.

په راپور کې راغلي، چې دا پرمختګونه د افغانستان د خلکو، په ځانګړي توګه د ماشومانو، د ستونزو پر وړاندې د زغم او ملاتړ څرګندونه کوي.