د بهرنیو چارو وزارت د ویاند مرستیال ويلي، د افغانستان اسلامي امارت په غزه کې د جګړې د پای ته رسولو په اړه د ملګرو ملتونو د امنیت شورا وروستی پرېکړه لیک د غزې د خلکو د نسلي وژنې د پای ته رسولو لپاره هغه ګام بولي، چې پر تلپاتي اوربند خبرو ته لار اواروي.

د بهرنیو چارو وزارت د ویاند مرستیال ضیا احمد تکل د څرګندونو له مخې؛ د دې پرېکړه لیک له تصویب سره به د غزې د خلکو عادي ژوند ښه شي.

تکل وایي، د بهرنیو چارو وزارت د اسرائیلي رژیم د جنایتونو د غندلو په ترڅ کې د یوه خپلواک دولت د لرلو لپاره د فلسطین د خلکو له تاریخي حق ملاتړ کوي.

نن چارشبنه د ايران اير نړیوال هوايي شرکت کابل نړيوال هوايي ډګر ته خپله لومړنۍ الوتنه پيل کړه او ياد شرکت به د اوونۍ يوه الوتنه ولري.

ویل کیږي، چې ايران هېواد ته د آريانا افغان او کام ایر هوایي شرکتونو ترڅنګ ماهان، کېش او یزد شرکتونه هم الوتنې لري، چې ورسره سوداګرو او نورو مسافرو ته د پام وړ اسانتياوې برابرې شوې دي.

د ترکیې حکومت د هرات زلزله ځپلیو ته د بشري مرستو د توکو یوه ټولګه رالېږلې ده.

د لویديځ زون د سرې مياشتې ټولنې دفتر په يوه خبرپاڼه کې ليکلي، چې د تورغونډۍ بندر له لارې د ترکيې د بشري مرستو نهمه ټولګه، چې شاوخوا ٦٢٠ ټنه خوراکي او غير خوراکي توکي لري؛ هرات ته را رسېدلې ده.

د هرات سرې میاشتې ټولنې د رسنیو دفتر لیکلي، چې په دغو مرستو کې اوړه، خیمې، کمبلې، ویلچیرونه، روغتیايي کڅوړې او د اړتیا وړ توکي شته دي.

دغه مرستې د لویديځ زون سرې مياشتې ټولنې ادارې ته سپارل شوې دي، چې ټاکل شوې په راتلونکیو څو ورځو کې د دغه ولايت پر زلزله ځپلیو ووېشل شي.

دې ته ورته نور خبرونه: 

د ترکیې سفیر د افغانستان سیلاب ځپلیو ته د ۶۷۰ ټنو مرستې اعلان وکړ

مرستې ورو او ناعادلانه دي – د هرات زلزله ځپلي