د مالداویا ولسمشرې مایا ساندو د افغانستان اسلامي امارت یوه پلاوي ته د ویزې پر ورکړې نیوکه کړې او څرګندوي، چې دغه سفر د حکومت د ځینو چارواکو له لوري د اسلامي امارت په اړه د خپل هېواد له پالیسۍ د ناپوهۍ له کبله ترسره شوی دی.

ساندو له «جورنال ټي‌وي» سره په مرکه کې ویلي، د مالداویا د کرنې وزارت یوه مرستیال د افغان پلاوي د ویزې له غوښتنې وړاندې د خپل هېواد د حکومت له لوري د اسلامي امارت په اړه د پالیسۍ په اړه څېړنه نه‌وه کړې.

د نوموړې د څرګندونو له مخې؛ د بهرنیو چارو وزارت چارواکو هم د ویزې غوښتنه د لېږونکي لوړپوړي مقام له کبله داسې انګېرلې وه، چې غوښتنه له مخکې تائید شوې ده.

د مالداویا ولسمشرې دغه موضوع «د شرم وړ» بللې او د دې پرېکړې پر مسوولو چارواکو یې د انضباطي چلند غوښتنه کړې ده.

ساندو ویلي:« زما د معلوماتو له مخې؛ د کرنې وزارت یوه مرستیال دا نه‌وه څېړلې، چې د افغانستان د رژیم په اړه د مالداویا جمهوریت پالیسي څه ده. دا موضوع د حیرانتیا وړ ده.»

هغې زیاته کړې؛ حکومت ورته ویلي، چې د ورته پېښو له تکرار څخه د مخنیوی لپاره به له مسوولو چارواکو سره انضباطي چلند وشي.

له دې مخکې د مالدووا د کرنې وزارت مرستیال واسیله ساربن ویلي وه، چې د افغان پلاوي سفر د یوه مالداوي شرکت د غوښتنې له مخې ترسره شوی دی.

د نوموړي د څرګندونو له مخې، دغه شرکت کرنیز محصولات تولیدوي او خپل محصولات ازبکستان ته صادروي او غوښتل یې، چې په افغانستان کې هم خپل د پلور بازار پراخ کړي.

ساربن ویلي، افغان استازو د دغو محصولاتو د تولید له بهیر سره د بلدتیا لپاره مالداویا ته د سفر غوښتنه کړې وه.

د افغان پلاوي مشري د کرنې، اوبو لګولو او مالدارۍ وزارت مرستیال صدر اعظم عثماني کوله.

د کویټ عربي اقتصادي پراختیا صندوق ویلي، چې له ملګرو ملتونو بشري چارو همغږۍ دفتر(اوچا) سره یې د پېنځه میلیون ډالرو پر ټولیز ارزښت د بشري مرستو دوه هوکړه‌لیکونه لاسلیک کړي، چې یوه برخه یې افغانستان ته ځانګړې شوې ده.

د دې صندوق خپرې شوې خبرپاڼې له مخې، د دغو هوکړه‌لیکونو له مخې د افغانستان او سوریې بشري صندوقونو ته ۲.۵ میلیون ډالر ځانګړي شوي دي.

د کویټ عربي اقتصادي پراختیا صندوق د څرګندونو له مخې، دا مرستې به د بېړنیو بشري پروګرامونو او پروژو د تمویل، د حیاتي اړتیاوو د پوره کولو او زیانمنو او اړمنو کسانو ته د ژوند ژغورونکو مرستو د رسولو لپاره ولګول شي.

په خبرپاڼه کې راغلي، دا مالي مرسته به د اوچا تر مدیریت لاندې د افغانستان بشري صندوق ته دا وړتیا ورکړي، چې بشري کړکېچونو ته په چټکۍ او ډېرې اغېزمنې همغږۍ ځواب ووایي، له همکارو بنسټونو ملاتړ وکړي او د بشري مرستو د عملیاتو همغږي پیاوړې کړي.

د کویټ عربي اقتصادي پراختیا صندوق زیاته کړې، چې د دغو هوکړه‌لیکونو پر لاسلیک له اوچا سره په ګډو پروژو کې د کویټ ټولې مرستې شاوخوا ۱۶.۱ میلیون ډالرو ته رسېدلې دي.