ملګرو ملتونو ویلي؛ پاکستان ته په منسوبو هوايي بریدونو کې د کونړ، خوست او پکتیکا ولایتونو د بېلابېلو سیمو لږ تر لږه د ۱۱ ماشومانو، یوې ښځې او یو سپین‌ږیري په ګډون ۱۳ ملکي وګړي وژل شوي او ۱۴ نور ټپیان دي.

د ملګرو ملتونو د سرمنشي مرستیال ویاند فرحان حق د دې ټولنې په ورځنۍ خبري غونډې پر مهال ویلي، په افغانستان کې واکمنو چارواکو د دغو ولایتونو په بېلابېلو سیمو کې د څو هوايي بریدونو له ترسره کېدو خبر ورکړی، چې د ملکي وګړو کورونه یې پر نښه کړي دي.

هغه له ټولو ښکېلو لوریو وغوښتل؛ د بشري نړیوالو قوانینو او بشري حقونو په اړه پخپلو ژمنو ټینګ پاتې شي او ټینګار یې کړی، چې ملکي وګړي او ملکي ودانیز جوړښتونه باید په هر ډول شرایطو کې خوندي وساتل شي.

د افغانستان اسلامي امارت د بهرنیو چارو وزارت په کابل کې د پاکستان سفارت شارژدافیر احضار کړی او د افغانستان د هوايي حریم د نقض او د بې ګناه ملکي وګړو پر کورونو د بمبارډ په تړاو یې خپل شديد او قاطع اعتراض ورته وړاندي کړ.

پاکستاني پوځیانو  دچارشنبې پر شپه د غبزرګولي شلمه یو ځل بیا د افغانستان هوايي حریم ښکاره نقض کړ او د خوست، پکتیکا او کونړ ولايتونو په ځينو سيمو کې یې د ملکي افغانانو کورونه بمبارډ کړل، چې له کبله یې ۱۱ ماشومان، یوه میرمن او یو سپینږیری «شهیدان» او ۱۴ کسان نور ملکي وګړي، چې ښځې او ماشومان په کې دي ټپیان شوي دي.

 اسلامي امارت دغه« تېری» او «بشري جنایت» له نړیوالو اصولو او قوانینو ښکاره نقض بولي, غندي او یو ځل بیا ټینګار کوي، چې د خپلې خاورې دفاع او د ولس  امنیت تأمینول خپل شرعي مسووولیت ګڼي.

ویل کیږي، چې پاکستاني لوری باید دا درک کړي، چي نیابتي سیاستونو د تطبیق پر ځاى دي خپلو داخلي ستونزو ته بنسټیز حل ومومي.

د عدلیې وزارت ویلي، چې د بېرته ستنېدونکو کډوالو لپاره د مرستو راټولولو، جلبولو او وېش د پلاوي کړنلاره د اسلامي امارت د رهبر له توشیح وروسته په رسمي جریده کې خپره شوې ده.

د یاد وزارت د څرګندونو له مخې؛ دا کړنلاره یو پیلیزه، درې بابه، څلور فصلونه او ۱۴ مادې لري او د مرکزي او ولایتي پلاویو له‌خوا به د بېرته ستنېدونکو کډوالو لپاره د مرستو د جلب، راټولولو او وېش په برخه کې عملي کېږي.

په دې سند کې د مرکزي او ولایتي پلاویو جوړښت او صلاحیتونه، د مرستو د جلب، راټولولو، ثبت، ساتنې او وېش طریقې، د نغدي، غیرنغدي او خدماتي مرستو څرنګوالی، د مرستو د وېش د څارنې میکانیزم او د مرستو د ترلاسه کولو او وېش په برخه کې ممنوع موارد روښانه شوي دي.

د کړنلارې له مخې، مرکزي پلاوی اړ شوی، چې د مرستندویانو او د بېرته ستنېدونکو کډوالو د اړتیاوو نوملړ جوړ کړي او د نورو مرستو د جلب لپاره له کورنیو مرستندویانو او بهر مېشتو افغانانو سره رسمي خبرې وکړي.

عدلیې وزارت زیاتوي، چې په دې کړنلاره کې د مرستو د جلب لارې چارې هم تشریح شوې دي او له رسمي لارو پرته د بهرنیو یا کورنیو مرستو راټولول د اسلامي امارت د قوانینو او اصولو خلاف او منع شوي دي.

په همدې خپرونه کې د اسلامي امارت د رهبر هغه فرمان هم خپور شوی، چې له مخې یې د چارو ادارې اړوند د کورونو د څېړنې ریاست لغوه شوی او مسوولیتونه یې سترې محکمې ته سپارل شوي دي.