د راپورونو له مخې؛ د دوشنبې پر ورځ د کویټې ښار په څنډه کې د طبیعي ګاز نل‌لیکه له چاودنې سره مخ شوې، چې له کبله یې څو سیمو ته د ګاز رسولو چارې ځنډېدلې دي.

د سویلي سویي ګاز شرکت ویاند ویلي؛ د بلوچستان ایالت د مرکز کویټې ښار په څنډه کې نامعلومو کسانو د ګاز رسولو یوې ۱۸ انچه نل‌لیکې ته چاودنه ورکړې، چې له کبله یې پېنځه سیمې له ګاز رسولو بې برخې شوې دي.

هیچا د دغې چاودنې مسوولیت پر غاړه ندی اخیستی؛ خو په سیمه کې بیلتون غوښتونکي وسلوال هڅې لري.

بیلتون غوښتونکي له اوږدې مودې راپدېخوا له حکومت سره جګړه کوي؛ حکومت او پوځ پر نښه کوي. دوی په اسلام‌آباد کې مرکزي حکومت تورنوي، چې ځایي خلک یې له هغه څه څخه بې‌برخې کړي، چې دوی یې خپل حق ګڼي.

د سویلي سویي ګاز شرکت ویاند ډاډ څرګند کړی، چې انجینرانو د نل‌لیکې پر رغولو کار پیل کړی دی.

پاکستان د ترکیې، مصر او سعودي عربستان د بهرنیو چارو وزیرانو د دوه ورځنۍ ناستېې کوربتوب ترسره کړ، چې خبرې په کې د ایران د جګړې د پای ته رسولو پر لارو چارو راوڅرخېدې.

د اسلام‌آباد په ترسره شویو خبرو اترو کې د هرمز تنګي د بیا پرانستلو او د انرژۍ د حیاتي لارې په اوږدو کې د بار وړلو د بیا پیلولو پر وړاندیزونو بحث وشو.

د غونډې له لومړۍ ورځې وروسته د پاکستان بهرنیو چارو وزیر اسحاق ډار ویلي، چې د سیمې د هېوادونو بهرنیو چارو وزیرانو «په سیمه کې د جګړې د ژر او دوامداره پای ته رسولو لپاره د ممکنه لارو په اړه بحث وکړ.»

هغه دا هم ویلي، چې ګډونوالو ته په اسلام آباد کې د ایران او امریکا ترمنځ د خبرو اترو د امکان په اړه هم خبر ورکړ شوی دی.

دا غونډه په داسې وخت کې ترسره شوې، چې ایران د امریکا د هر ډول ځمکني برید خبرداری ورکړی او همدارنګه د ایران، امریکا او اسرائیل ترمنځ د روانې نښتې پر مهال په نړیوالو بازارونو کې د تېلو بیې لوړې شوې دي.

د راپورونو له مخې؛ په خلیج کې د بار وړلو د مدیریت لپاره ځینې وړاندیزونه هم شوي دي.

د هرمز تنګی پخوا د نړۍ د تېلو او مایع طبیعي ګازو د نږدې پېنځمې برخې لپاره د ټرانزیټ لارې په توګه کار کاوه؛ خو پر ایران د امریکا او اسرائیلو له هوایي بریدونو وروسته له دې لارې تګ راتګ محدود شوی دی.

اسحاقدار ویلي، چې ګډون کوونکو هېوادونو په ډیپلوماټیکو هڅو کې د پاکستان له رول ملاتړ کړی او چین هم د دې نوښت لپاره خپل بشپړ ملاتړ څرګند کړی دی.

دا په داسې حال کې ده، چې د ایران بهرنیو چارو وزارت ویاند په اسلام‌آباد کې د سیمه‌ییزو هېوادونو (پاکستان، سعودي عربستان، ترکیې او مصر) د وروستیو ډیپلوماټیکو هڅو په غبرګون کې ویلي، چې دا ډول ناستې د دغو هېوادونو له‌خوا رامنځته کیږي او ایران په کې هيڅ راز ګډون نه‌کوي.

د پاکستان بهرنیو چارو وزارت د څرګندونو له مخې؛ ټاکل شوې، چې نن( یکشنبه د وري نهمه) د عربستان، ترکیې او مصر بهرنیو چارو وزیران د ایران د جګړې د تاوتریخوالي د کمولو لپاره  په اسلام‌آباد کې دوه ورځنۍ ناسته ترسره کړي.

د ترکیې بهرنیو چارو وزیر هاکان فیدان د څرګندونو له مخې؛ دا ناسته په سیمه کې د تاوتریخوالي د کمولو لپاره د ګډ میکانیزم جوړولو هڅه کوي.

هغه زیاته کړې، چې دا غونډه به د خبرو اترو ممکنه لار او د جګړې د وضعیت په اړه د څلورو هېوادونو ارزونه هم وارزوي.

راپورونه ښیي، چې دې هېوادونو له تېرو اوونیو راپدېخوا د واشنګټن او تهران ترمنځ د منځګړیتوب هڅه کړې ده. پاکستان هم د جګړې د پای ته رسولو لپاره د امریکا وړاندیز ایران ته رسولی او څرګندوي، چې کولی شي د دواړو خواوو ترمنځ د خبرو اترو کوربتوب وکړي.

دغه راز ډونالډ ټرمپ ویلي، چې له ایران سره خبرې اترې «ښې روانې دي» خو ایراني چارواکو له امریکا سره د داسې خبرو اترو ترسره کول رد کړي دي.

کارپوهانو ويلي، چې د جګړې دوام کولی شي د هرمز تنګي په ګډون د نړۍ انرژۍ او سوداګرۍ لارو ته پوره ګواښ رامنځته کړي.

ویل کیږي، چې ایران د امریکا ۱۵ ماده‌ییز وړاندیز په پام کې نیسي. که څه هم ځینو ایراني چارواکو دا طرحه”یوه اړخیزه او غیر عادلانه” بللی ده.