د ایران بهرنیو چارو وزیر د تهران پر وړاندې د امریکا د نویو بندیزونو د لګولو ګواښ د واشنګټن د «بې‌وسۍ» نښه بللې او ټینګار یې کړی، چې دغه کړنې به هم کومه پایله ونه‌لري.

د ایران بهرنیو چارو وزیر عباس عراقچي د یکشنبې پر ورځ په یوه ویډیويي پیغام کې ویلي، له پوځي عملیاتو وروسته د امریکا له لوري د نویو بندیزونو لګولو ته مخه کول ښيي، چې امریکايي مشران «بې‌وسه» شوي دي.

دا څرګندونې داسې په داسې وخت کې راپورته کېږي، چې د امریکا د خزانې وزیر سکاټ بسنټ ګواښ کړی، چې واشنګټن ښايي پر ایران« تر ټولو سخت تاریخي بندیزونه» ولګوي.

عراقچي ویلي:« دا، چې هغوی له پوځي عملیاتو څخه بېرته د تېر په څېر تکراري طرحو ته مخه کړې؛ ښيي، چې بې‌وسه شوي دي.»

هغه زیاته کړې، امریکا باید د «عادلانه او له عزته ډکې» حللارې د موندلو لپاره له ایران سره له درناوي ډکې خبرې وکړي.

د ایران بهرنیو چارو وزیر ټینګار کړی، چې تهران له فشارونو او پوځي اقداماتو نه وېرېږي او پر وینا یې امریکا پر بندیزونو، کلابندیو او نورو کړنو تر اوسه نه‌ده توانېدلې، چې ایران تسلیمېدا ته اړ کړي.

د تهران او واشنګټن ترمنځ ترینګلتیاوې په داسې حال کې روانې ساتل شوي، چې د دواړو لوریو له جګړو نږدې شپږ میاشتې تېرې شوي او نښتو د ایران اقتصاد او بنسټیزو جوړښتونو ته درانده زیانونه اړولي دي.

ایران اوس هم له پراخو نړیوالو محدودیتونو سره مخ دی او په هرمز تنګي کې د ترینګلتیاوو دوام د تېلو د لېږد د امنیت او په نړیوالو بازارونو کې د انرژۍ د بیو د لوړېدا په اړه اندېښنې زیاتې کړې دي.

دغه راز ایران ویلي، چې د پاکستان لوی درستیز عاصم منیر به د دوشنبې پر ورځ تهران ته سفر وکړي. ایراني چارواکو ویلي، چې دغه سفر په سیمه کې د سولې او امنیت د بېرته ټینګښت لپاره د هڅو په چوکاټ کې ترسره کېږي.

پاکستان په وروستیو میاشتو کې د ترینګلتیاوو د کمولو او منځګړیتوب لپاره هڅې کړې دي او تمه ده، چې وروستي بدلونونه پر ایران د نویو بندیزونو د لګولو په اړه د امریکا ګواښ به تهران ته د عاصم منیر په خبرو کې مطرح شي.

سره له دې، چې ایراني چارواکو سخت دریځ څرګند کړی؛ د ایران ولسمشر مسعود پزشکیان هم د جګړې د پای ته رسولو لپاره د یوې ډیپلوماټیکې حل‌لارې موندلو پر اړتیا ټینګار کړی دی.

د ایران بهرنیو چارو وزارت ویاند اسماعیل بقایي یکشنبه اعلان وکړ، چې د پاکستان د پوځ مشر عاصم منیر به د دوشنبې پر ورځ تهران ته سفر وکړي.

د بقایي د څرګندونو له مخې، دغه سفر سیمې ته د سولې او امنیت د ټینګښت لپاره د پاکستان د هڅو په لړ کې ترسره کېږي.

دا سفر داسې مهال کېږي، چې پاکستان د ایران او امریکا ترمنځ د جګړې د پای ته رسولو لپاره په خبرو کې د منځګړي رول لوبولی دی.

د پاکستان حکومت دوه سرچینو رویټرز ته د منیر د سفر پخلی کړی دی. لومړۍ سرچینې ویلي، چې ایران او پاکستان له یو بل سره په مستقیمه اړیکه کې دي. دوه‌یمې سرچینې ویلي، چې په خبرو کې به د جګړې وروستي بدلونونه هم وڅېړل شي، چې په دې لړ کې د امریکا د ولسمشر ډونالډ ټرمپ له‌خوا پر ایران د سختو بندیزونو د لګولو ګواښ هم شامل دی.

سرچینې ویلي:« هغه(منیر) به له ایراني مشرانو سره د اسلام‌آباد د هوکړه‌لیک له مخې د سولې، د ټرمپ د خبرداري، د پاکستان، ترکیې او سعودي عربستان ترمنځ له هوکړې وروسته د وضعیت او د حوثیانو د موضوع په اړه خبرې وکړي.»

د منیر دغه سفر داسې مهال کېږي، چې ترینګلتیاوې زیاتې شوې دي؛ ایران ګواښ کړی، چې د امریکا د هغو بندیزونو د پلان په غبرګون کې به پوځي اقدام وکړي، چې ښايي د اسلامي جمهوریت پر له مخکې کمزوري اقتصاد ډېر فشار راوړي.

دغه سفر به د دوشنبې له هغې اعلان سره هم‌مهاله وي، چې د پلان شویو بندیزونو په اړه به نور جزئیات خپاره شي. امریکايي چارواکو ویلي، دغه بندیزونه به پر ایران«په تاریخ کې تر ټولو سخت بندیزونه» وي.

ټرمپ ګواښ کړی، چې د هر هغه هېواد پر وړاندې به اقتصادي اقدامات وکړي، چې ایران ته«هر ډول د ژغورنې لاره» برابره کړي؛ ځکه هغه هڅه کوي اسلامي جمهوریت نور هم منزوي کړي.

د هرمز په تنګي کې د تېلو لېږد نږدې بشپړ درېدلی دی. تهران ګواښ کړی، چې هر هغه بې‌اجازې د تېلو لېږدوونکی ټانکر به پر نښه کړي، چې هڅه وکړي له دې مهمې اوبلارې تېر شي. ایران له وړاندې د بندیزونو له کبله له سخت اقتصادي فشار سره مخ دی.

ایراني چارواکو تر اوسه د عاصم منیر د سفر د پروګرام او په تهران کې د نوموړي د لیدنو په اړه نور جزئیات نه‌دي ورکړي.

د امریکا ولسمشر ډونالډ ټرمپ خبرداری ورکړی: هر هغه هېواد، چې ایران ته«هر ډول د ژغورنې لار او حیاتي مرستې» برابروي؛ له اقتصادي اغېزو سره به مخ شي. دا په داسې حال کې ده، چې امریکا هڅه کوي هغه جګړه پای ته ورسوي، چې نږدې شپږ میاشتې مخکې یې له اسرائیلو سره یوځای پیل کړې ده.

په دې جګړه کې زرګونه کسان وژل شوي او نښتو د خلیج هېوادونه هم راښکېل کړي دي. د نړۍ بازارونه هم وروسته له هغې له اقتصادي ټکانونو سره مخ شول، چې ایران د هرمز تنګي له لارې د بېړیو د تګ راتګ د کنټرول وړتیا وښوده. له فبرورۍ مخکې د نړۍ د تېلو د سوداګرۍ شاوخوا پېنځمه برخه له همدې لارې تېرېده.

په ټولنیزو پاڼو کې د ټرمپ ګواښونه او څرګندونې تل بشپړ نه‌عملي کېږي او نوموړي دا نه‌دي روښانه کړي، چې امریکا به د ورته هېوادونو پر وړاندې څه اقدامات وکړي. داسې ښکاري، چې دا ګواښ ښایي د امریکا متحد هېوادونه هم راونغاړي؛ هغه هېوادونه، چې د سولې په خبرو کې د منځګړیتوب رول لري؛ خو ټرمپ د کوم هېواد نوم نه‌دی اخیستی.

د سې شنبې پر ورځ متحده عربي اماراتو، چې د امریکا د یوې سترې پوځي اډې کوربه دی؛ اعلان وکړ، چې تر بلې خبرتیا پورې به له ایران سره ټول سوداګریز فعالیتونه او مالي راکړې ورکړې وځنډوي. دغه اعلان له هغې وروسته وشو، چې د متحده عربي اماراتو دفاع وزارت وویل: له ایران څخه توغول شوي دوه توغندي یې کشف کړي، چې په سمندر کې لوېدلي دي؛ ایران دغه راپور بې‌اساسه بللی دی.

د«کپلر» د احصائیوي شننې شرکت د ۲۰۲۵ز.کال د څرګندونو له مخې: چین د ایران د تېلو د صادراتو له ۸۰ سلنې څخه ډېره برخه اخلي. له چین سره د امریکا د اقتصادي جګړې زیاتېدا، چې امریکا ته له سترو صادرونکو هېوادونو څخه دی او د حیاتي نادرو منرالونو برابرونکی هم دی؛ ښایي د بیجینګ د متقابل غبرګون خطر زیات کړي.

د ایران د رهبر سلاکار محمد مخبر د سې‌شنبې پر ورځ ویلي، ایران اوس هم له امریکا سره خبرو ته چمتو دی؛ خو خبرې اترې له تسلیمېدا سره نه‌ګډوي.

نوموړي زیاته کړې، پوځي فشار او بندیزونه د ایران هوډ نه‌شي ماتولی.

ترمپ د سې‌شنبې پر ورځ ویلي، له ایران سره هیڅ خبرې نه روانېږي. دا په داسې حال کې ده، چې یوه ورځ مخکې د ټرمپ زوم او ځانګړي استازي جرد کوشنر مثبت دریځ څرګند کړی و او ویلي یې ول؛ له ایران سره خبرې اوس هم روانې دي او«ښایي تر بل هر وخت جدي» وي.

ترمپ غواړي د ایران د لوړې کچې غني شويو یورانیمو زیرمې ترلاسه کړي او د یوه نوي او نه‌محدودوونکي تړون په لټه کې دی، چې د ایران اټومي او څېړنیز پروګرامونه محدود کړي.

ټاکل شوې دغه تړون د هغه تړون ځای ونیسي، چې امریکا په ۲۰۱۸ز.کال کې ترې یو اړخیزه ووتله. ایران، چې د اټومي وسلو د نه‌خپرېدا د تړون غړی دی؛ له لسیزو راپدېخوا ټینګار کوي، چې اټومي پروګرام یې سوله‌ییزې موخې لري.