د غزې جګړې له پای ته رسېدو سره په منځني ختیځ کې د سولې نوې پېر پیل شو

د امریکا ولسمشر ډونالډ ټرمپ د دوشنبې پر ورځ( د تلې یوویشتمه) د غزې د دوه کلنې جګړې پای ته رسېدا اعلان کړه؛ حماس د نږدې ۲۰۰۰ فلسطیني بندیانو د خوشې کولو په بدل کې د اوربند د یوې برخې په توګه وروستي ژوندي پاتې شوي اسرائیلي یرغمل خوشې کړل.

دې تړون په سیمه کې له لسیزو راپدېخوا له خونړیو او ویجاړونکو شخړو څخه یوه هغه پای ته ورسوله؛ هغه جګړه، چې له ۶۸ زره څخه ډېر فلسطینیان په کې ووژل شول او د غزې تړانګې ډېره برخه کنډواله او یجاړه شوه.

ټرمپ د اسرائیلو پارلمان (کنیسټ) ته په خپله وینا کې ویلي: “آسمان ساه واخیسته، ټوپک غلی دی، زنګونه چپ دي او لمر په یوه مقدسه ځمکه کې وړانګې خپرې کړي، چې په پایله کې یې د سولې خوند واخیست.”

هغه دا معامله د “اسرائیلیانو او فلسطینیانو لپاره د ځنډیدلې معجزې” په توګه تشریح کړه.

د سولې له تړون وروسته د اسرائیلو پوځ تائید کړه، چې پاتې شل یرغمل شوي کسان د سره صلیب پر همکارۍ سپارل شوي دي. په تل ابیب کې د یرغمل شویو کورنیو د خوښۍ اوښکې تویولې او د له هغوی یې تود هرکلی وکړ.

دغه راز زرګونو فلسطینیانو په خان یونس کې خوشې شويو بندیانو ته د ښه راغلاست تر څنګ د “بریا” پر غږ پورته کولو له هغو هرکلی وکړ.

د اسراییلي چارواکو د څرګندونو له مخې؛ په خوشې شویو بندیانو کې ۱۷۰۰ کسان شامل ول، چې په غزه کې د پوځي عملیاتو پرمهال نیول شوي وه او ۲۵۰ نور د امنیتي جرمونو پر تور د اسراییلو په زندانونو کې بندیان ول. حماس هم څلور تابوتونه وسپارل، چې د اسرائیلي یرغمل شویو جسدونه په کې ول.

دغه راز ټرمپ د مصر په شرم الشیخ ښار کې د مصر، قطر او ترکیې د ولسمشرانو په ګډون له ۲۰ څخه د زیاتو نړیوالو مشرانو سره په یوه غونډه کې ګډون وکړ او د “منځني ختیځ د سولې خبرتیا” یې لاسلیک کړه او ژمنه وشوه، چې امریکا به د غزې د بیارغونې او تلپاتې سولې ساتلو لپاره کار کوي.

هغه وویل: “اوس د بیارغونې وخت دی او دا زما د ژوند ترټولو لویه معامله ده.”

د جګړې له پای ته رسېدو سره – سره لویې ننګونې پاتې دي. د ۲۶ یرغمل شویو جسدونه اوس هم ورک دي او مرستندویه ادارو خبرداری ورکړی، چې سلګونه زره فلسطیني کډوال د لوږې او ناروغۍ له خطر سره مخ دي.

په لویدیځه غاړه کې هم تاوتریخوالی روان دی او د میشت ځایونو او ښارګوټو پراخول کولی شي د سولې هڅې له خطر سره مخ کړي.

شنونکي په دې باور دي، چې د غزې د جګړې پای ته رسېدل په منځني ختیځ کې د پراخې سولې لپاره یوه پیلامه کېدی شي.

ټرمپ ان د “ایران او اسراییل ترمنځ د اړیکو عادي کولو” امکان په اړه خبرې وکړې او زیاته یې کړه: “ښایي دا به د منځني ختیځ لپاره د نوي پېر پیل وي.”

د شخړې د دواړو خواوو د خلکو لپاره خوښۍ او غمونه څنګ په څنګ روان دي؛ په اسرائیل کې د خوشې شویو یرغمل شویو کورنیو نندارې جوړې کړې او په غزه کې، میندې د کنډوالو تر څنګ خپلو ماشومانو ته ښه راغلاست وايي. په داسې حال کې، چې ښار اوس هم وینه او ایره تنفس کوي.